夾錢中左六合彩頭獎, 但keep飛果個唔見左...: (19)

「Hey~~~ Sexy Lady~~~」估唔到接駁鈴聲竟然係呢首鳩歌， 

「其實我一路想講，呢首歌點解可以咁紅？好撚唔好聽喎！」發仔插口， 

「咪係囉！不過MV條女真係幾正。」我說， 

「呢Ｄ韓國妹整容啫，上次我去韓國呀…」泥頭又答嗲， 

「等等！發仔你走過黎邊個揸機呀！？」大舊問， 





發仔「屌」左一聲之後衝返入駕駛座，呢個時候電話都接通左， 

「What’s the matter？」接聽嘅係一把鬼佬聲，而且有Ｄ唔耐煩， 

我地幾個你眼望我眼，皆因我地英文都唔太好，亂鳩咁答可能會出事架嘛， 

「Hello？」Mr. Z見冇人答，又問多次， 

「Nothing…just wanna make sure what do I need to do.」紅棍開口，仲特登chok低音把聲， 





「Hold them as long as you can, my men are coming right now.」Mr. Z講完之後就收左線， 

「Sorry我聽唔明last一句。」泥頭問， 

「人地一共都係講左一句之嘛，佢叫個機師盡可能留住我地，有班人黎緊喎。」發仔答佢之餘都不忘串一串佢， 

「你估班人搵我地做咩…？」我問， 

「斷估唔係請我地食豬扒包囉！」發仔雙手唔知係度玩緊咩， 





「揸你嘅機啦！撞撚左就打柒你！」泥頭大聲喝佢， 

「係呀係呀，撞撚左你仲打到我呀！」發仔不甘示弱， 

「唔好嘈！」紅棍一鬧兩個人即刻靜左， 

「照咁睇黎，呢班好有可能係澳門嘅黑幫，我地應該一落機就會見到佢地。」大舊分析，警察確係唔同Ｄ。

「咁點算？返轉頭？」紅棍問， 

的確，呢個點睇都係最合理嘅選擇， 

「我地一於返去諗下辦法先啦，就咁去都唔知會出咩事。」我和議， 

眾人點頭之下一致通過取消澳門行，大佬搭個直昇機都咁大穫俾你都驚啦！ 





可惜事與願違。 



「唔好意思咁大位，架機必須降落啦！」發仔大聲宣佈， 

「點解呢？」 

「機入面嘅油唔夠我地返轉頭，除非你地打算游水返香港啦！」發仔答， 

「咁我地係碼頭降落搭船走囉。」紅棍說， 

大家都認為呢個係最好辦法，直昇機亦都慢慢下降， 





「喂喂發仔，呢度好似唔係碼頭黎喎！」紅棍望望窗外後大聲講， 

「架機set左programme要停呢度，我唔識改呀！」發仔好認真咁望個控制板， 

我地同時望出去，只見呢度離碼頭都有一段距離，如果行路都要3-4個字， 

「如果一落去撞到班人就真係走都唔使走啦….」泥頭把聲驚到震震地， 

「唔使驚，我地應該快佢地少少，只要搵到架車我地就一定冇事。」大舊探頭出去望下環境， 

「其實我係呢頭有Ｄ當差嘅朋友，可以問下佢地發生左咩事。」大舊話， 

「返香港打電話問啦….」泥頭有Ｄ坐立不安， 

呢個時候，直昇機安穩咁停定左。