夾錢中左六合彩頭獎, 但keep飛果個唔見左...: (12)

「喂, 你做咩呀? 」正要搭中港城既扶手電梯果陣, 我回頭見到身後既發仔全身無力咁跪左係地度。 

「頭先有銀行職員打俾我, 話我戶口啲錢無哂。」發仔絕望道。 

「你又係咁呀? 我今朝都收到個類似既電話呀。」我走過去扶起發仔。 

「唔係掛, 我都check下先。」泥頭一講完, 紅棍同大舊就跟住佢衝去最近既櫃員機。 

無幾耐, 紅棍首先帶住一副死老豆既樣返番來, 道: 「一蚊都無得剩…」 





我驚訝道:「嘩, 你用邊間銀行家, 咁大件事都唔打俾你既, 咁睇來恆生都真係幾好喎。」 

「你估依家拍劇呀, 賣咩植入式廣告呀係度。」發仔情緒恢復番啲。 

「泥頭同大舊點?」我問。 

「唔知喎, 佢地去左中銀果邊, 應該仲近過我, 照計無理由要咁耐家?」紅棍答。 

突然, 頭頂傳來一連串急速既腳步聲。 





我地抬頭一望, 只見大舊同泥頭係二樓搏哂命咁追緊一條友, 但佢地跑得太快, 我睇唔清條友係咩樣。 

「仆街, 你同我企係度呀!」泥頭既咆哮聲我地隔成層都聽到。 

「我成日都唔明, 呢句對白究竟有咩意思, 好似講左出來人地就真係會乖乖地企係度咁。」發仔不解道。 

「仲抽水! 快啲趕上去睇下咩事先啦!」紅棍道。

我地三個跑到樓上既時候, 就見到泥頭係閘口同啲碼頭職員爭執緊。 

「俾我入去打鳩死條友呀!」 

「先生, 你無船飛係唔入得去家!」 

見三四個職員都拉唔住泥頭, 我地都跑埋去幫手。 

泥頭見到我地, 繼續嗌:「你班仆街放開我呀! 我要打佢老母臭閪!」 

「咁究竟你係想打佢定係打佢老母呢?」發仔問。 

「你傻撚左呀, 依家仲刺激佢。」我用盡九牛二虎之力先勉強挾制到泥頭隻右手。 

「大舊去撚左邊呀?!!」紅棍一邊抱住泥頭, 一邊尋找大舊既踪迹。 





就係呢個時候, 一聲只有金毛獅王既獅吼功先能夠與之匹敌既叫喊從後而來。 

「泥頭你做乜撚啊!!!!!!!!!!」 

全場人都忍唔住要用手塞住耳仔。 

而叫聲既來源就係大舊, 只見佢就連個口罩都除埋，臉上緊繃既肌肉令到隻Hello Kitty 變得好撚恐怖。 

泥頭俾佢一喝, 個人好似冷靜番啲, 道:「咁唔通我地就咁俾佢走?」 

大舊道:「佢有船飛, 我地入唔到閘都吹佢唔漲。」 

泥頭道:「所以你去左買飛?」 





大舊搖搖頭, 道:「唔係, 我唔夠錢。」 

「下, 即係話你地個戶口都無哂錢?!」我插嘴問。 

大舊見人多耳雜, 帶番口罩道:「我地行埋一邊先講。」