夾錢中左六合彩頭獎, 但keep飛果個唔見左...: (6)

中午兩點既諾士佛臺可謂水靜鵝飛，就連附近既餐廳都只係得小貓三四隻。 

我地來到尋晚間酒吧既門口，發見間鋪落哂閘，仲未開。 

「嗱，一眼睇哂啦，孱仔邊會係度啊。」發仔望著鋪頭出面既空檯空凳道。 

「咁得一個辦法可以証實既者。」泥頭一腳就神左落度鐵閘度，發出「轟隆」既一聲巨響。 

「屌！邊撚個呀？！」 





閘後面竟然有人。 

無幾耐，度閘緩緩升起，走左個中年男人出來。 

個男人本來慶過火屎，但一見到我地，即刻成個笑哂。 

「咁多位大佬，今晚又想包場玩啊？」 

「包場？包咩場啊？」我問。 





「哈，我開左呢間吧幾年，都未見過好似幾位咁大方既。尋晚你地飲飲下，無啦啦好似上左身咁，high 到爆，見人就攬，見女就錫。但係正因為咁....就得罪左唔少人...不過好彩呢位大佬好識做。 」老闆指住紅棍繼續道： 「 佢話請哂全場人任飲任食，大家聽完之後唔計較不特止，仲玩到鬼死咁開心添。」 

我地幾個聽到一舊雲，完全唔知佢講乜。 

「呀老闆啊，咁唔知你有無印象, 同我地一齊來，瘦猛猛果個fd去左邊呀？」紅棍問道。 

「呀哥乜你咁快染左個潮頭呀？瘦猛猛？唔覺喎。 」 

「 你諗真啲, 個樣成日好似就來死果個呢。 」 泥頭加把口。 





「 真係無印象，反而你果個肥頭dup耳既fd我就記得。」 

「肥頭dup耳？我地幾時有個咁既fd家？」發仔一問，個個都擰哂頭。 

老闆陪笑道：「咁多位大佬你地傾住先，細佬我仲要趕住番入去執野開鋪，有咩活動想係度搞，細佬隨時歡迎。」然後再次拉埋左度閘。

「依家點算？孱仔搵唔到，無啦啦又多左個唔知乜水既肥仔.....」發仔跪左喺地抱頭道。 

「咪住，大家睇下我手機入面呢幅相先，時間應該係我地飲完野之後影家。」我隊左部手機出來。 

幾個頭圍埋一齊聚精會神咁望住我個mon。 

只見相入面既孱仔神不守舍, 戇戆鳩鳩咁，而赤裸上身既大舊就企左係佢隔離，一面揮舞住自已件T SHIRT ，一面係度狂嗌。 果陣時既佢，臉上面未有紋身。 

「你地睇下相右下角既位置。」發仔問道。 





「唔…好難判斷, 有啲似女人個胸…」我皺眉道。 

「唔使睇啦, 果個係我個籮來家。」紅棍坦然承認。 

「你又知?」發仔懷疑道。 

「我點會唔認得自己屎忽上面果粒墨呀!」紅棍反駁。 

「等等，相入面既地方好熟。」泥頭尋思道。 

相片僅餘既背景勉強見到我地係喺一間大廈前面。 

泥頭拍一下大脾，大聲道：「我知啦！係街口果幢出哂名俾人叫雞既香檳大廈！」