每個人，都試過鍾意一個讀VA既女仔: 第六十章

「關你咩事呀？我有我愛佢既方法，我開心就得﹗」我猜想不到肥正為何對CYNTHIA有如此的批判。
 
「你開心？你係開心就唔會日撚日咁煩任你身邊既人﹗你係咪要搞到自己唔似自己先安心？咁如果佢都係唔鍾意你呢？咁點呀？」
 
對面著肥正的連番炮擊，內心漸漸被擊碎。
 
「你要改既，就唔該你改吓自己既犯賤人格。」
 
「係呀，我係犯賤呀，咁點呀？」本以為不輕易在眾人面前哭的我，此時淚線卻失守。
 




「我依家係好唔開心呀，但係我知道只要我追到佢，我就會搵到快樂既來源。係佢教我架，條路自己揀，仆街唔好喊﹗」
 
「你睇吓你自己依家似咩？」肥正的語氣從謾罵變成帶點同情可憐﹕「做兄弟既，就係唔想睇住你搞到自己咁樣，點解唔可以好似之前咁，自自在在咁做返自己？」
 
「我放唔低佢呀，我唔可以冇咗佢呀……」
 
說實在，當時的情況就像是八時半電視劇的片段，唯一不同的是，一哭二鬧三上吊的主角是一名中四男生。
 
「我知呀……你地俾我次機會我，只要仆街仆得夠痛，我就唔會再犯賤落去……我一日未知仆街有幾痛，一日都唔願意放手。」
 




肥正未有回答，也許是默認了我這方法。\
 
「有咩再搵我。」
 
他拋下這句話後便拾過書包獨自離去。
 
「唉……睇嚟今日都係冇機打架啦，咁我都返去訓陣先啦，有咩打電話俾我啦。」
 
加拿大仔也沒趣地離開，只留下我一人在課室。
 




「哭泣聲絕無意義，它不會扭轉分開的心意。」
 
不知為何，突然想到王傑的歌。
 
我說過，要幹點事情證明給cynthia看，但做了又如何？她會看到嗎？
 
她還會有興趣看嗎？
 
不知道。
 
回到家後開啟電腦，立馬把裡頭的遊戲全給刪除﹕「就算個機會細到睇唔到，都會堅持落去﹗唔可以做啲會令我後悔既事﹗」
 
翻開英文作業看罷一眼後，剛剛說的什麼承諾都想放棄。
 
「唔得架麥俊傑，你要頂住﹗你諗吓同cynthia一齊拖住手仔，坐響沙灘到睇日落，係幾咁浪漫﹗」




 
嗯，我就是在這場幻想當中，睡著了。
 
「咦？睇你個樣咁精神，尋日一定訓得好足啦。」我在上學的路途中遇到了雞脾姐﹕「你塊臉有粒野喎。」
 
正當她想伸手替我抹去臉上的骯髒，瞄到了自己手腕的手繩。
 
「唔洗啦，我自己嚟得架啦。」
 
要與女生保持一定距離，絕不可再像以往般的亳無避諱可言。
 
「做咩呀你，奇奇怪怪咁既？」就算在我眼前的是一位沒把她當作女生的雞脾姐，也須如此對待。
 
我沒有回答，與雞脾姐維持一個身位的身距步回校園。
 




「唉，如果我都可以畫得咁靚就好啦。」
 
在大堂裡，正展覽著修讀va的學生的畫作，而有些設計的草圖，則放於一角處。
 
「話說你知唔知呀，va有分畫畫同設計。」雞脾姐欣賞著同學們的作品。
 
「你又知？」
 
「因為之前有諗過讀呀嘛，不過好快就知自己根本冇料到。」我未有留意雞脾姐說的話，因為在一幅草圖的右下角，細小地寫上了「cynthia」一字。
 
草圖所畫的，是一個環保袋的設計圖。
 
「你係咪想追返條女呀？」
 
「吓？」我被雞脾姐這一問嚇得魂飛魄散似的。