每個人，都試過鍾意一個讀VA既女仔: 第十九章

正當我苦惱著還要說什麼好讓話題得延續之時，cynthia比我更早一步答道﹕「你呢？」
 
「我鐘意……睇戲同行吓書局咁囉。」這個答法，應該是最理想的吧？
 
但身旁的雞脾姐卻不是這樣想，她冒眼瞄了一下我的手機之後忍不住大笑起來﹕「麥俊傑，我真係第一次聽你話鍾意行書局﹗」
 
「唔通直接同佢講我好鍾意打機咩……佢好憎佢呀妹打機架……」想到這裡，我內心倒是考起了自己。
 
到底我會唔會為咗cynthia而放棄打機？
 




很明顯地，現在的我必定會點頭答應。
 
「睇戲？我都好鍾意睇戲架﹗不過冇乜人肯陪我去睇……」
 
「吓？點解呀？」
 
「因為我鍾意睇鬼片，我啲朋友冇一個夠膽同我睇。」不是吧，居然喜歡看鬼片？
 
雖說男人要有一定的尊嚴，但我也必須要誠實地跟大家坦白﹕我除了害怕曱甴，第二樣就是鬼片。
 




「咁我真係恭喜你啦，因為你成功地識到一個肯陪你睇鬼片既人啦﹗」我還依稀地記得當時的我的指頭是發抖地打著字並發送出去。
 
「真係架？喂，我下星期六得閒喎﹗」我立馬查看著上映的電影﹕「你想睇咒怨？」
 
「係呀，我想睇好耐架啦，只不過一直都搵唔到人同我睇……」
 
「唉，既然你叫到，我就陪吓你去睇啦。」口裡說不，身體卻很誠實。想不到日前的幻想，現在居然成真。
 
「睇鬼片，你條友仔會唔會驚到攬住佢架？」雞脾姐打量著我問道。
 




「咁咪好囉，佢恨咗好耐架啦﹗」肥正打著呵欠，沒好氣地回應著，儘管他也不太清楚雞脾姐說著什麼。
 
但我並沒有為自己辯駁什麼，因為我的而且確想借這次機會讓我和cynthia的距離再拉近一點。
 
突然之間，cynthia傳來一個傷心的表情符號，讓我不禁生疑﹕「做咩事呀？」

「我又諗返起佢啦……佢之前每個星期一都會陪我放學……」
 
「不如……」我押上我畢生的勇氣打著那句信息﹕「我今日陪你放學好冇？」
 
「麥俊傑，你一路咁低住個頭係望緊啲咩呢？」突然Miss.Tin一記冷箭飛至，害我亳無還擊之力。
 
「Miss.Tin，我地既傑哥仔依家學人玩追女仔呀，好心你就唔好阻住人啦。」肥正竟然亳不掩蓋地大聲道出。
 
頂﹗洗唔洗俾埋支咪你講呀？




 
「係？追邊個呀？」我發現所有老師，外表看似理性有學識，但實質上與一般師奶無疑……
 
都係咁撚八卦。
 
「我又唔係當時人，唔好意思既﹗傑哥仔，不如你自己話俾Miss.Tin知呀﹗」肥正拍著我的肩膀，示意我回答道。
 
我盯著全班，發現他們的臉上無一不是掛上充滿期待的表情，讓我一時之間不知如何是好。
 
「講完你都唔識架啦。」
 
「講咗先啦，那間學校咁細，實見過既。」Miss.Tin甚至把手上的粉筆和書放下，好等我正視她的問題。
 
「……」我心裡一邊咀咒著肥正，一邊想著有沒有什麼解決方法。
 




就在這時候，火警鐘聲就忽然響了。
 
「係喎，我都唔記得咗今日要走火警﹗大家快啲落去排隊啦。」Miss.Tin也乾脆把課本留在班房，著我們一同去操場。
 
「唉，又要行落去之後上返嚟，都唔知有咩意義。」肥正反了反白眼，半推半就的走出課室。
 
而平時也討厭走火警的我，今日卻喜愛得很。
 
因為佢救咗我一命。