每個人，都試過鍾意一個讀VA既女仔: 第十八章
「難得傑哥仔初開情竇，咪俾佢發吓春夢囉。不過唔好發咁耐呀，差唔多上英文堂啦。」加拿大仔說罷立馬回到自己的座位之上，靜待著老師來臨。
「你條友個腦入面有上堂呢個詞架咩？」
「冇，不過有Miss.Tin呢個人存在囉。」肥正沒好氣地從書包裡頭把上課所需的書本放在桌面。
「咁我仲講唔講落去呀？」
「咁如果你地之後都冇啲咩進一步的行動既話，其實你唔講，我諗我地都唔會介意既。」肥正再也沒多說什麼。
正當我懂趣地閉上嘴巴時，雞脾姐卻問道﹕「但係我想知道佢俾咗啲咩你喎。」
難得有聽眾，我也亳不介意地把時間再次回到星期六。
----------------------------------
「呀媽我返嚟啦。」「同完女仔食完飯啦咩？」
其實打從我看見老爸後，我便知道必定會發生這對話。
「朋友唔係男就係女架啦，可唔可以唔好咁多疑？」可是這次，我沒有為此而爭持。
因為有件事更加重要同趕快。
回到房間，小心翼翼地從背包取出那個索袋。在不顯眼的右下角，畫上「CL」兩個英文字。
CL，應該正是cynthia的名字，因她中文名正好姓李。
打開袋子，第一樣映進我眼簾的是一張合相，一張二人在游泳池所拍下的照片，照片中的二人樣貌都十分青澀，臉上掛著一抹幸福的微笑。
合照壓著兩張學生相，分別是cynthia和她的前度，兩位都在鏡頭下生硬的笑著。
裡頭還有一個毛公仔，被一串頸飾所纏繞著。
最後，還有好幾張電影票票尾，記錄著他們看過一套套電影，以及那些該死的過去。
「不過唔緊要，今日開始就由我嚟守護住你，我唔會俾你再傷心多一次架！」
----------------------------------
「佢俾埋佢之前嗰個啲野我喎，咁都唔算係俾機會我？」
「咁只係表示佢想放棄上一個，但係冇話過要你做下一個喎！」轉過頭來，只見肥正正聽得像小雞般不停點頭。
「我就追佢返嚟俾你地睇！」
「你估追巴士咩，唔係咁易架麥師父。特別係呢條VA女，入埋佢中路都未必成事。」希望愈大失望愈大，這道理我倒是明白。
但係今次，都好難失敗到啦嘛？
「嘩嘩嘩，Miss.Tin下次要拎咁重既野就早啲叫我落去幫你拎呀嘛﹗」加拿大仔眼見Miss.Tin手持補充練習走進課室，立馬一個箭步上前幫忙。
「你算吧啦，聽PE張講你連九分鐘耐力跑都跑唔完，最後幾分鐘直頭慢慢行，Miss我鍾意啲運動型既男仔。」
的確，Miss.Tin也稱得上為美人胚子，特別是她嬌小玲瓏的身材，更是令人有衝動想保護她的慾望。
如硬要說Miss.Tin是我們的英語老師，倒不如說是我們的朋友，她上課時總是愛跟我們有講有笑，亳無架子可言。甚至我們有什麼心事，大可跟她傾訴，大吐苦水。
「喂，上緊咩堂咩？」可惜的事，各多科目來說，我最差勁和最討厭的正是英文。因此每次上課，我總是愛做別的事情。
「又係中文堂呀……」
「其實呢……你平時有咩做架？」若然要投入在她的生活之中，首先必須知道她的生活習慣﹗
「冇架，主要都係響屋企到畫吓畫溫吓書咁囉，再唔係既咪約吓朋友食個飯。我除咗畫畫之外就冇乜嚐好架啦。」
「……」突然間，我發現我倆的對話再沒有任何進展空間。