每個人，都試過鍾意一個讀VA既女仔: 第十三章

其實都好難話唔好。
 
「好呀……咁你畫完畫好早啲訓啦，聽日我要見到一個精精神神既Cynthia呀﹗」說罷，我帶著不依的心態掛上電話。但隨即於空中不停揮拳。
 
「各位，我得咗啦。」我嘗試盡量壓低住我的興奮之情，雖然未有在字句間透露出，但從我打字的力度不難發現。
 
「唔係識得幾日就表白咁勁呀嘛？」加拿大仔看罷群組中的留言便回覆道。
 
「咁又冇咁早，不過佢話聽日同我睇醫生呀﹗」
 




「冇啦啦睇咩醫生？佢唔係知道咗你係低能既事實，要捉你去睇吓個腦呀嘛？」
 
點解……佢會同肥正講既野一模一樣？
 
「等我幫你睇吓加拿大啲機票有冇平啦。」
 
「唔洗講咁多啦，留名等聽賽後報告。」還是肥正這句順耳一點。雖然想真一點，其實也沒有什麼正面的鼓勵，但總比一盆冷水來得還要好。
 
簡單的討論過後，我便重新開始執拾背囊，而這次我更是把塵封不知多少年的禮物盒帶上﹕「你終於有用武之地啦﹗」
 




其質…也真的沒什麼要帶。
 
見天色都黑得只剩下路邊的街燈作微弱的照明，都差不多到了睡覺的環節了。儘管我自覺今晚不會睡得著，但我還是樂得盡早躺在床上，反正對著課本也提不起勁，倒不如盡早休息。
 
「媽，我訓先啦。」刷過牙後，我持著電話攤軟於床上查看著IG的更新，Whatsapp的鈴聲突然一響，隨即影入我眼前的是一對腳，右腳大腳上更是畫上了一朵花。
 
「靚唔靚呀？」是Cynthia，她居然想到用她的大腳作為畫布，真不愧為VA科的門生。
 
「你講你對腳定咩先？」我打趣地問道，這張相片可說得上是目不暇給。先別說她那雙腳，我還很難利用一個較不狗公的形容詞，因此也不多作評論。但就連腳上那朵花，也足以證明她的畫功可是無容置疑。
 




「緊係講朵花啦﹗我都知自己隻腳好粗，如果唔係點會夠位畫喎﹗」才不，若你這也稱得上是粗的話，恐怕捐錢給非洲兒童的原因都會變成幫他們減肥了。
 
「靚係幾靚既……不過你好地地做咩要響隔離寫朵花既名出嚟呢？寫都唔緊要啦，你仲要寫錯呢吓先係重點……」的確，她本應想在一旁寫上「洛神花」三字，誰不知一個手誤就寫上了「神洛花」。
 
「係咩？原來我一直都記錯咗個名架﹗」
 
「傻豬。」我不忙試探著她的反應，嘗試從中得知她對我的感覺。
 
「屎忽你同我收聲﹗」看來……她應該是接受了這個稱號吧。
 
「你唔係話咩VA人好忙既咩？做咩依家又咁得閒畫畫既？」明明剛才的確是有點睡意，但現在卻睡意全消的，集中精神盯著那電話。
 
「係好忙架，不過今日星期五，咪當抖吓囉。」
 
「但係你聽日同我睇醫生喎，你夠時間做其他野架啦？」我還真是不懂Cynthia的時間是如何分配。




 
「唔夠架，所以聽日我會帶埋啲功課去做。」什麼？在醫院裡頭做功課？
「咦……咁我都帶埋地理啲野過去做先，有咩唔識就問你。」我趕緊走下床，把那份多項選擇題題目放進背囊。
 
應該……冇野仲要帶啦掛……
 
「我今日想早啲訓。」這句話，是否想暗示著什麼？
 
「咁你就早啲訓啦，聽日醒咗就打俾我啦。」我想……還是不要太過多心什麼好了。
 
「嗯，早抖啦。」
 
「嗯。」