每個人，都試過鍾意一個讀VA既女仔: 第五章

「我好鍾意食譚仔架。」在到達譚仔的那段路程中，她的步伐明顯輕快了許多。
 
「有幾鍾意呀？」眼見如此，我也樂得讓她保持住開心的心境。
 
「嗯……我願意呢一世，三餐都食譚仔！」她笑的時候，雙眼依舊是如此的大，臉頰有著微微的包包臉，與她斜撥的劉海可說是十分合襯。
 
「雞肉墨丸，走韮芽，小米三小辣。」餐牌都還未放在桌上，Cynthia已把她日常食的東西說出。
 
但因我不太常食譚仔的原故，我還是老實地查看著餐牌的配菜，隨後再思考了一會，害得點餐呀姨都等得有點不耐煩。
 




「炸醬牛肉……清湯走韮菜。」
 
接下來，我倆就經歷了一場互相了解的過程，原來她除了修讀VA之外，和我一樣還有修讀地理。
 
更甚，就連家庭都搬出來一同討論。她生於一個不太富有的家庭，父母關係也不算是十分和諧，幸好的是她與妹妹的感情卻十分深厚。
 
不過她妹妹可是有一個缺點﹕佢好鍾意玩英雄聯盟。
 
「咁你咪可以同佢呀妹一齊玩囉﹗唔錯喎，又可以進一步親近埋佢屋企人。」隔天肥正聽罷我的分享後不時點頭讚好。
 




「肥正佢又錯唔晒喎，你諗吓有幾多伴侶就係過唔到對方屋企人嗰關呀，依家你同佢呀妹都有一個共通點，佢呀妹又同佢咁姐妹情深，你得米啦﹗」加拿大仔這次總算是帶了個書包回校。
 
「重點係Cynthia最憎人打機呢……」
 
「我真係好憎人打機﹗完全浪費自己啲時間﹗」還記得她當時氣得擲下筷子，隨口叫了一罐可樂。
 
而我，則是低著頭，默默地食著碗內的米粉。儘管我飽得要死，胃臟更是不明地隱隱作痛。
 
「頂，我差啲就同佢講我都好鍾意打機，好彩……」現在思憶過去，還是覺得當天我採取了一個絕佳的回應方法﹕乜都唔應。
 




「朋友，你咁在意佢點諗做咩呢？」
 
加拿大仔這一記問題，問得我一時語塞，無法回答。
 
「因為……我唔想佢對我既印象好差……」到最後，我還是道出一個較為模稜兩可的答案。
 
「唉……又如何呀？佢最憎人打機，啫係佢鍾意對方有上進心啦，你睇吓呢條友，大大個「頹」寫響屎忽到，人地點會睇得上你呀。」肥正與加拿大仔對我評頭論足。
 
「你又知佢屎忽寫咗個字既？」
 
「乜你唔知咩？我以為人人都知先講﹗」
 
「我遲啲就del咗英雄聯盟佢﹗」我無視他倆的批評，一心只想讓Cynthia看見我美好的一面，雖說那一面的面積可說是細小得很。
 
「係囉係囉，遲吓先啦，今日放早喎，不如去網吧打返幾粒先啦。」死黨說到底，還不是魔鬼的化身。




 
「打你屎忽，今日約咗人呀。」
 
「喂，唔係咁有異性冇人性呀嘛？」肥正一臉不悅的控訴。
 
「唔知點解呢句野由你把口講出嚟就特別冇說服力既，仲有一個月就係水運會，要同佢傾吓啦啦隊啲口號呀。」
 
「傾口號定傾心事呀？」加拿大仔甚至用出那騷得要死的聲線問道。
 
答案？
 
Why not both?