《我係窮郵差，專門幫陰陽相隔嘅親人送信》（書局上架中）: 147

 
我唔知點答佢，因為阿龍喺中途出現，中斷咗同佢爸爸嘅相處，到最後佢爸爸係點我都唔知，忽然間過得自己有啲失職。
 
 
「我⋯⋯遲啲再答妳⋯⋯」
 
 
同Maggie收咗線之後，我收到無號碼嘅電話。
 
 


正常我係唔會聽無號碼嘅電話，因為多數都係廣告電話，所以我直接CUT咗線就算。
 
 
只不過過咗一陣，我又收到另一個無號碼嘅電話。
 
 
「喂？」好奇之下，我就拎起聽咗。
 
 
「喂？」


 
 
無聲。
 
 
 
我收咗線之後，唔夠兩秒，就再有電話打返返嚟。
 
 
我再接，第一句已經係：「累夠人未呀！？殺人兇手！」


 
 
一秒之後，又再收咗線。
 
 
我完全唔明白發生咩事。
 
 
電話已經開始不停咁震，無數個不明來歷嘅電話接連打過嚟，接二連三咁，電話就好似中咗詛咒咁係咁響！
 
 
我要不停咁樣cut線，當係咁cut係咁嘅時候，娟姐嘅電話就出現係螢幕，我即刻停手接聽。
 
 
「大件事啦，你出事啦！」娟姐喺電話裏面，語氣好緊張咁講。


 
 
「出事？我出乜嘢事？」我唔太明白咁樣問。
 
 
早前自殺潮事件喺網上牽起熱烈嘅討論，好多人都喺討論區追查哩件案件。
 
 
眾說紛紜，有啲人話係受外星人嘅影響，外星人唔知用咗啲乜嘢方法，令佢哋情緒低落自殺。
 
 
有啲人呢就話，係新興嘅宗教，又再發動自殺潮，好似以前美國啲邪教咁樣，煽動人去自殺。
 
 
當討論得好激烈嘅時候，突然流傳出一份文件。


 
 
 
嗰份文件就係披露郵政局架構下有一個特別嘅部門，幫人由人間送信去陰間，畀佢哋死去嘅親人。
 
 
「一定就係咁所以出事！」
 
 
「究竟係咩部門嚟？有咁荒謬嘅嘢㗎咩？」