《我係窮郵差，專門幫陰陽相隔嘅親人送信》（書局上架中）: 146

 
細妹一點一滴咁講返件事出嚟，記憶都慢慢返緊嚟。
 
 
好記得⋯⋯當時我嘅心情係點，但而家諗返起，只係覺得自己好幼稚。
 
 
「對唔住⋯⋯對唔住我拋低咗你哋⋯⋯」
 
 


佢只係搖一搖頭。
 
 
「咁之後點⋯⋯」
 
 
「跟住得返我哋三個人喺度，氣氛好尷尬，正當大家都唔知可以講咩時，有個男人出現咗。」
 
 
「男人？」


 
 
細妹點點頭，思緒又回到當初嘅情況。
 
 
嗰個男人走埋嚟，笑住講：「我叫阿龍，係阿亮嘅好朋友，你哋好。」
 
 
嗰一個叫阿龍嘅男人，解救咗本來好冰冷嘅氣氛，因為佢講好多嘢，包括你喺度係點，你哋三個點成日都一齊玩，哩啲嘢都令媽咪好有興趣聽。
 


 
「平時佢喺屋企都唔係咁。」媽咪講。
 
 
對住屋企人好冷淡。
 
 
「可能佢對住朋友有另一面。」
 
 
「龍⋯⋯係咪？阿龍你可唔可以再講多啲？」
 
 
「阿亮有你哋屋企人真係好⋯⋯咁關心佢⋯⋯」阿龍講：「不過可惜⋯⋯佢唔識得珍惜⋯⋯」
 


 
聽到嚟哩到，我已經估到啲嘢，我好激動咁問細妹：「所以⋯⋯阿龍帶咗你哋去陰間嘅屋企？綁妳哋喺度？」
 
 
細妹搖搖頭。
 
 
「唔係。」
 
 
「唔係？」
 
 
「唔係嘅意思⋯⋯並唔係佢，係你鍾意嗰個女仔，佟蓳萓。」
 


 
我背脊有啲發涼，同時間我感覺到自己就嚟醒，但係我仲有好多野想問。
 
 
「對唔住對唔住⋯⋯細妹⋯⋯」最後我只是不停咁重複呢句。
 
 
「你要小心啊。」
 
 
望住細妹好唔捨得、同時充滿內疚感咁，我張開返眼，翻返嚟現實。
 
 
返咗嚟無幾耐，Maggie已經喺電話問我，佢爸爸有無講啲乜嘢。