《我係窮郵差，專門幫陰陽相隔嘅親人送信》（書局上架中）: 141

 
「因為⋯⋯推你落去嘅人，正係我。」
 
 
我感到強大嘅推力，一失重心，就跌落谷底⋯⋯
 
 
「你知唔知，我哋同樣試過咁。」
 
 


講完哩句，佢一手將我推咗落山崖。
 
 
黃河泉水湧湧而來，不見泉頭。
 
 
佟蓳萓正喺拉高褲腳，雙腳浸浴喺河水之中，踢濺水花。
 
 
「好凍好舒服呀。」


 
 
我哋啱啱先做完練習，聽日嘅功課就擺喺河邊。
 
 
唔知由幾時開始，我已經慣咗將每日嘅功課帶去陰間，同佟蓳萓一齊做。
 
 
佢將水淺起到我腳上，問：「喂，你唔洗每日都帶功課畀我做㗎啵。」
 


 
「我自己都唔識做，咪嚟搵下妳幫手啫。」我狡辯。
 
 
「你成日都都嚟，唔洗陪屋企人咩？」
 
 
「唔洗啦。」
 
 
「明明我覺得你屋企人對你好好，特別係你細妹。」佢皺眉頭話，似乎喺度抱怨我唔識珍惜。
 
 
「少少啦⋯⋯我都覺自己唔識珍惜。」
 


 
有人對你好，反而覺得好理所當然，但人性就係咁，越對你好嘅人，越唔識珍惜。
 
 
「對妳細妹好啲啦。」
 
 
「妳嘅屋企人呢？」
 
 
「我咪講咗，我無屋企人囉。」
 
 
我記得佢講過佢無家人，一出世就無父無母。
 


 
「無家人嘅意思係⋯⋯」
 
 
夕陽餘暉照喺水面，河面粼粼閃爍，佢用幼小嘅腳搞動河水，渾成波浪。
 
 
「我淨係知我媽媽係一個妓女，而我喺媽媽嘅肚入面就已經死咗啦⋯⋯未出世就係咁，靈薄鎮嘅人大多都係咁⋯⋯」
 
 
「好慘⋯⋯」
 
 
「所以我對我屋企人都無感覺⋯⋯淨係知有父母，爸爸好傷心，淨係咁多。」
 


 
「對唔住⋯⋯」
 
 
「傻啦，我好早就知哩啲嘢係注定，無得改變。」
 
 
「注定？」
 
 
「好似係由陰間一本嘢決定。」
 
 
「但如果一切都係注定，人生唔會無意義咩⋯⋯好似機械人。」我討厭咁講。
 


 
「唔知呢⋯⋯都唔係我哋可以改變。」
 
 
「佟蓳萓。」
 
 
「嗯？」
 
 
「妳係我第一個好想保護嘅人。」
 
 
佢只係莞爾一笑。