《我係窮郵差，專門幫陰陽相隔嘅親人送信》（書局上架中）: 130

 
返到郵局時，Maggie已經喺門口等緊我。
 
 
佢笑一笑，揚起上面嘅信話：「今次哩封信⋯⋯我已經改好。」
 
 
我有啲無力微笑回應佢：「我諗一定好睇。」
 
 


「確定今次係唔會變啦。」
 
 
「嗯⋯⋯」Maggie坐低後，有啲擔心咁望住我話：「究竟人喺陰間，會唔會⋯⋯死？」
 
 
「喺陰間已經係死人啦啵。」
 
 
「我嘅意思係⋯⋯會唔會有第二次嘅死⋯⋯應該唔會㗎可？」


 
 
「點解咁講？」
 
 
「無呀，我只係好驚⋯⋯佢睇到哩封信會好激動。」
 
 
Maggie嘅爸爸係一個好暴躁嘅人，動輒就會發脾氣，所以屋企啲嘢成日都爛晒。
 


 
「會呀。」我答佢。
 
 
「吓？」
 
 
「陰間嘅人當然都會有可能死。」
 
 
「咁⋯⋯」
 
 
「妳決定好未？」
 


 
冇幾耐之後，我就帶住Maggie封信，同滿載嘅疑惑往陰間去。
 
 
阿龍⋯⋯究竟關哩個人咩事？
 
 
今日實在發生太多事，個腦完全處理唔到。
 
 
細妹⋯⋯王胤瀅爸爸嘅死⋯⋯
 
 
太多太多事一時之間湧嚟，實在接收唔到。
 


 
因此一定要藉住呢個機會好好了解究竟發生咩事。
 
 
步向夕陽小棧，每一步都好沉重。