《我係窮郵差，專門幫陰陽相隔嘅親人送信》（書局上架中）: 128

 
我搖搖頭話：「無可能，妳點扮都好，我都唔會認錯人。」
 
 
佢究竟係咪當我低能，我哋對咗十幾年，我點會認唔出係佢，唔通阿哥連個妹都認唔得。
 
 
佢慢慢咁企返喺身話：「你⋯⋯你乜嘢都唔記得晒？」
 
 


「我⋯⋯係有一部分嘅記憶遺失咗⋯⋯」
 
 
「咁唔怪得⋯⋯」
 
 
「究竟哩段時間妳同媽咪去咗邊度呀？」我緊張咁捉住佢隻手問。
 
 
「我⋯⋯」佢立即鬆開我隻手話：「對唔住呀⋯⋯我真係唔係你個妹。」


 
 
「點解妳仲要扮？我認得⋯⋯」
 
 
「我嘅意思係⋯⋯」佢唔太敢望住我，只係低頭話：「眼前哩個的確係你個妹，但我並唔係你個妹⋯⋯」
 
 
我個腦空白咗一片，佢明明係講緊中文，但我完全聽唔明佢講乜嘢。
 


 
一句自相矛盾嘅說話。
 
 
「妳講緊乜嘢？咩意思⋯⋯？」
 
 
「我⋯⋯我⋯⋯你⋯⋯」佢支吾以對咁，呑吞吐吐，最後話：「你記唔記得邊個係阿龍呀？」
 
 
「我記得呀。」
 
 
「總之⋯⋯你有咩就問佢啦，唔好再搵我啦，我真係唔係你個妹，我已經避得你好辛苦⋯⋯你當畀個機會我啦，係我哋對唔住你哋⋯⋯對唔住呀⋯⋯對唔住呀⋯⋯」佢一邊講，一邊喊住咁走。
 


 
剩返我一個人留喺原地，不知所措。
 
 
究竟⋯⋯發生咩事？又關阿龍咩事？
 
 
哩個時候，一件件事開始接踵以嚟。