《我係窮郵差，專門幫陰陽相隔嘅親人送信》（書局上架中）: 126

 
我好似已經估到一啲嘢。
 
 
「咁係⋯⋯？」
 
 
「我想問⋯⋯我嘅面試係咪已經過咗關？」
 
 


我點點頭。
 
 
佢拎出一封信，有啲遲疑咁樣遞上，又收返埋。
 
 
「我⋯⋯可唔可以返去再改一改？因為呢封信對我嚟講好重要，我好驚咁樣寫係唔啱。」
 
 
「當然可以。」


 
 
Maggie走咗之後，亦都係我放飯時間。
 
 
當例牌去到Starbucks買咖啡時，一個熟悉嘅聲音勾起我注意。
 
 
「唔該，一杯⋯⋯」
 


 
我循住聲音嘅方向望去，無錯係一個好熟悉、我每晚發夢都會夢見嘅身影。
 
 
細妹。
 
 
「細妹！」
 
 
我激動咁喺咖啡店大叫，四圍啲人都畀我嚇親，本來正在係收銀買咖啡嘅細妹，愕咗一愕。
 
 
「細妹！」
 


 
我再叫一次，終於佢有反應。
 
 
個反應係轉身向後跑！
 
 
個店員好緊張咁叫：「小姐杯嘢啊！未找錢呀！」
 
 
話咁快佢已經衝出咗店外，直奔遠方。
 
 
「先生⋯⋯佢走咗啦啵⋯⋯」有個好心人喺我側邊提醒我。
 


 
我哩個時候先反應過嚟。
 
 
係啵！
 
 
追佢！
 
 
完全唔知佢走咗去邊，我喺天橋四處觀望，終於畀我喺對面馬路見到佢。
 
 
「咪走呀。」
 


 
我急急腳咁跑，哩個時候佢唔知我仲追緊嚟，放慢晒腳步咁行。
 
 
我絕對可以捉到佢。
 
 
我哋距離之間得返唔夠100步嘅時候，佢突然間好似預感到我會出現咁，忽然望後，知道我追嚟就加速狂奔。