《我係窮郵差，專門幫陰陽相隔嘅親人送信》（書局上架中）: 115

 
「送信，送到門口就得啦。哩個世界好嘅人好多，而立心不良嘅人亦實在太多，你自己小心啲。」
 
 
「知道⋯⋯」
 
 
大叔咁講完，我開始淨係咁跟住佢，一步都唔敢行開。
 
 


大叔繼續開口講，陰間都有分開唔同嘅區域，例如大孽區，就係畀啲生前犯咗重孽嘅人住，越近黃泉河就係大孽區。生前無咩犯事嘅，就會住喺小孽區。
 
 
我哋再沿河邊直上，穿過一個大草原，隔離有好似雲南咁嘅梯田，上面有無數嘅人係度耕田。
 
 
「每個人喺度都要耕田，越大罪孽嘅人，耕嘅田無論肥力同面積都會最差最細。只要達到某個數量嘅收成，交畀陰間嘅政府，佢哋就會去下一個地方。」
 
 
「交收成⋯⋯又會咁奇怪嘅。」


 
 
「陰間政府定嘅規矩。」
 
 
「咁所謂下一個地方？」
 
 
「人生嘅下一站⋯⋯你將來就會知。」
 


 
我哋嚟到一個英式建築物度，睇落好舊香港嘅殖民地風格。
 
 
「我哋嚟送信，就係要知道自己送去邊，哩度門口嘅地址簿就幫到我哋。」大叔指住講。
 
 
「可以知道晒所有人嘅名同地址？」我問。
 
 
佢點點頭。