《我係窮郵差，專門幫陰陽相隔嘅親人送信》（書局上架中）: 113

 
大叔開始行，我都跟住佢走，慢慢咁穿過棧道，就係一片綠野嘅城市。
 
 
「喂，又嚟送信呀？」行經時，附近一個漁夫打扮嘅人同佢打招呼。
 
 
「係呀，你捉魚捉成點呀？」
 
 


「都係咁啦。」
 
 
大叔繼續講：「人死之後，就會嚟到哩個地方，目的係清洗自己嘅孽。
 
 
每個人都會係生前，都會有意無意咁傷害好多人。所以積咗好多孽。嚟哩度就係為咗反思。」
 
 
附近啲人努力咁係度耕田。


 
 
我同大叔一路行喺河邊嘅路，一路沿途都有人望住我哋。
 
 
「記住，做郵差有所謂嘅『第一條戒命』，千萬唔可以忘記。」
 
 
但佢講到一半又唔講埋落去。
 


 
哩個時候，喺河邊有一個白髮、大概五十幾歲嘅、著黑衫嘅老女人，揮住手熱情咁向我哋打招呼。
 
 
「你哋係陽間嘅人？」
 
 
「係呀。」我應佢。
 
 
「天口熱呀，你哋不如入嚟坐下呀。」