《我係窮郵差，專門幫陰陽相隔嘅親人送信》（書局上架中）: 111

今次真係我第一次接觸哩個行業嘅人，以前會覺得佢哋好唔潔身自愛，但今次遇到被生活所逼嘅人，又有啲唔同嘅諗法。
 
 
我唔知邊度嚟嘅勇氣同感動，就同佢講：「呃⋯⋯如果唔介意，我可以幫你送信畀佢。」
 
 
「可以？真係可以咩？」
 
 
「你信咩？你唔會好覺得奇怪？」


 
 
「我信呀。」而家到我覺得佢嘅反應奇怪。
 
 
「你同大叔都係咁好人。」
 
 
「佢？」
 


 
「我聽聞佢同你一樣，從來嚟哩度都係淨畀錢傾計咁樣。」
 
 
「吓？佢條雞蟲會咁？」
 
 
「佢不斷嚟都係幫我哋啲姐妹寄信，你都知我哋平時無乜人理㗎啦。」佢有啲感觸咁話：
 
 


「係佢先會貼埋錢係度問長問短，幫我哋寄信⋯⋯只係一直都未排到我啫，但聽聞佢真係幾好人。」
 
 
嘩真係估唔到，個雞蟲會咁好死？
 
 
過咗一陣，小雨就寫好佢封信交畀我。
 
 
「拿，我相信你㗎啦。」
 
 
「放心，我會送到佢嘅手上。」
 
 


到我出返去時，大叔就喺出面等緊我。
 
                         
「喂，搞掂啦？第一完生意？」佢照舊RR佢個啤酒肚。
 
 
我有啲驚訝，佢一早估到我會幫個女仔？
 
 
「行啦。」
 
 
返到郵局，佢就開始向我介紹做嘢嘅程序，帶我入返嗰間白色嘅房。
 
 


「拿，我哋要做嘅嘢好簡單。送信去陰間嘅第一步，就係⋯⋯瞓覺。」