《我係窮郵差，專門幫陰陽相隔嘅親人送信》（書局上架中）: 110

 
 
喺佢老公自殺之後，小雨先知道佢老公借咗一大筆錢，投注晒喺一場馬度。
 
 
佢老公一直都唔太好賭，可能係聽到某啲消息，諗住實食無死，點知欠落一身債。
 
 
喺毫無先兆之下，佢由自已屋企飛墮落街。
 


 
因為要還債又要養兒，小雨被大耳窿賣入火海。
 
 
 
我望住小雨煙圈一團一團咁升上半空，化為烏有，突然覺得有啲虛無。
 
 
「當佢哋成班人殺上嚟，又要兇又要打，又話要接我個仔放學，我仲可以點⋯⋯我問盡我身邊嘅人借錢，都只係夠還利息⋯⋯」
 


 
當佢哋將小雨個仔抱出窗外時，小雨立即崩潰，佢終於妥協。
 
 
「我一直都好想同個衰佬講⋯⋯有咩事咪一齊解決囉，洗唔洗死呀⋯⋯根本唔洗行到哩一步。」
 
 
「你無怨佢咩？」我好奇咁問。
 
 


正常人，個屋企咁大變化，一切都唔同晒，仲要咁多蘇州屎，應該會好嬲佢。
 
 
「你話無嬲就假嘅。而家嘅生活根本就唔同晒，仲要咁多麻煩，我而家每個月仲有四成人工係畀咗出去。」
 
 
小雨噴完最後一口煙後，煙火喺煙灰缸入面被壓熄。
 
 
「佢都用死去還咗啦，一世人兩公婆，怨咩呀？只要諗返起以前同佢相處嘅日子，我仍然覺得係開心，而家為個仔捱埋落去，都係好嘅。」