《我係窮郵差，專門幫陰陽相隔嘅親人送信》（書局上架中）: 76

 
我送陳太太返屋企嘅時候，佢就一邊講返佢同陳生嘅故事出嚟。
 
 
佢一直都覺得陳生只係一個好聰明嘅人，但都無乜嘢，亦對佢好好，所以佢哋開始咗。
 
 
不過漸漸，佢發覺陳生唔係一般人咁，佢嘅醋意係極大。
 
 


「同我一齊嘅時候，唔好同其他男仔有聯絡！」喺拍咗拖無幾耐，陳生就咁樣同佢講。
 
 
嗰時因為係熱戀期，所以陳太都無為意啲乜，咁咪照做。
 
 
「我・咪・同・妳・講・咗・唔・好・同・其・他・男・仔・聯・絡！」
 
 
喺戲院入面，陳太只喺同一個男仔SD 訊息，就成部電話畀佢扔爛咗。


 
 
「嗰個係我莊員嚟㗎，有啲莊務我哋傾緊咋！」
 
 
「都・唔・可・以！」
 
 
即使喺漆黑嘅戲院入面，仍然睇到陳生佢青筋暴凸。
 


 
「我⋯⋯」
 
 
「仲講！」
 
 
陳生一巴摑落去陳太臉上，紅紅嘅掌印頓現。