《我係窮郵差，專門幫陰陽相隔嘅親人送信》（書局上架中）: 18

 
 
「你唔幫我，就無人可以幫我㗎啦，好多嗰啲所謂法士根本都無用嘅。」
 
 
佢咁樣哀求，唉我又衰心軟。
 
 
「妳話妳媽咪煩住妳，到底係點？」
 


 
「係點......」佢望下左又望下右，然後開口講：「你有無試過畀人搞嘅經驗。」
 
 
「無。」
 
 
「咁你時運高。」
 
 


「我相信⋯⋯哩啲只係妳幻覺。」
 
 
「你嘅意思係無鬼？」
 
 
我都唔知點同佢解釋，都係算數。
 
 
「妳媽咪點解會嚟搞妳？」


 
 
「我親生阿媽，好早就唔要我，拋棄咗我哋一家人。」
 
 
睇嚟又係一個長故事，今晚都唔洗旨意早走。
 
 
「而我爸爸係一個生意人，屋企係做賣衣。
 
 
有一段時間，爸爸都係好忙咁返大陸工作，嗰段得我同媽媽嘅日子，大概係我對佢最有印象嘅日子。
 
 
我哋一齊煮飯，一齊沖涼，一齊返學放學，一齊玩煮飯仔。


 
 
每次兩個人去買嘢嘅時候，我都問媽咪：「媽咪，爸爸呢？」
 
 
「爸爸好努力咁返緊工呀。」
 
 
「佢忙緊呀，好快會返嚟㗎啦。」
 
 
直到一日，爸爸真係由大陸返咗嚟香港。