《我係窮郵差，專門幫陰陽相隔嘅親人送信》（書局上架中）: 12

有時有啲人會覺得，乜郵差咁得閒，仲可以成日去蛇王。
 
 
做咗十八年郵差嘅誠哥拎住一封信，苦瓜乾咁返嚟郵局。
 
 
「做咩？」娟姐問佢，佢一邊R頭一邊話：「我畀人投訴⋯⋯」
 
 
成個Office笑咗出嚟。


 
 
「咪玩啦，你都畀人投訴，咁其他人咪炒得？」娟姐都忍唔住笑咁講。
 
 
郵局HEA做嘅人好多，但敬業樂業嘅都唔少，誠哥明顯係其中一個。
 
 
守時、有責任心，簡直係最好員工，我都唔信佢會畀人投訴。
 


 
「誠哥你畀人投訴咩？」
 
 
「偷懶⋯⋯蛇王⋯⋯」
 
 
有哩個諗法嘅人唔少，係因為有時，見到郵差著住制服，好休閒咁去咗食下午茶。
 
 


直覺上就覺得佢哋蛇出嚟食嘢。
 
 
但事實上，郵差嘅工作係用信量嚟計，限咗一個鐘要派完幾多封信。
 
 
有啲郵差好鍾意一嘢「爆Seed」，係短時間之內做晒所有工作，咁所以你見到嘅下午茶，多數都係午飯嚟。
 
 
因為咁，老細轉咗「限紅」，無OT錢補，再加重咗工作量。
 
 
結果個個郵差都苦不堪言，誠哥仲因為急住派信整傷咗隻腳。
 
 


就由我哩個閒人去陪誠哥去睇醫生。
 
 
去到醫院，一如往常要等勁耐。
 
 
「誠哥，其實你唔洗咁搏命㗎啵。」我同隻腳受咗傷嘅誠哥講。
 
 
「唔得啦，哩排大家都知局長為咗節流，不知幾想CUT部門CUT人手，如果我係哩個時候表現唔好，真係唔知點算。屋企有老有嫩，個仔仲啱啱先上大學。」誠哥面嘆息咁講。
 
 
估唔到政府工，去到哩一刻都要驚畀人炒。
 
 


誠哥睇睇下報紙話：「嘩你睇下，而家啲人真係無公德心！」
 
 
「做咩？」我好奇問。
 
 
「『獅星號遭惡意破壞，數千人旅期受影響！』到底邊個會咁大惡作劇，請咗假啲人就慘囉。」
 
 
「係囉可⋯⋯唔知咩人⋯⋯」我越講越細聲。
 
 
喺哩個時候，唔知點解前面有啲嘈。
 
 


忽然間，一把聲喺度大叫：「去死啦！」
 
 
我即刻推開誠哥，一大堆紅油連埋豬肺同一啲血淋淋嘅內臟飛埋嚟。
 
 
有一個著黃色衫嘅老太太，右手拎住一膠袋，入面袋住血水同好噁心嘅內臟；左手拎住一個湯殻。
 
 
「太太、太太⋯⋯你冷靜啲！」四周圍嘅護士已經衝晒過來，手執紙巾，准備包圍佢。
 
 
「走開！同我走開！」嗰個老太太面色毫不畏懼。
 
 


「唔入得㗎，唔入得㗎！」身型上顯然係姑娘輸蝕，完全Stop唔停嗰位老太太。
 
 
老太太如入無人之境，直衝過去時，猛然揮動佢手中嘅湯殻同膠袋，左揮右舞，班姑娘嚇到哇哇大叫，你推我嚷，老太入萬軍之陣中卻不傷絲毫。
 
 
「喂Jannine！仲唔去禁住佢！禁住佢呀！」一個老護士對住一個後生護士落命令，後生護士面有難色：「吓⋯⋯點⋯⋯禁呀⋯⋯」
 
 
佢硬住頭皮上，唔夠兩秒就被人KO。
 
 
哩一幕令我諗起一個好經典嘅場面：西遊記裏邊嘅孫悟空大鬧天宮。
 
 
最終亦都好似西遊記入邊咁樣記載，天兵全軍覆沒。
 
 
老太左手一揮，醫院白色嘅牆上面，四處都染成紅色。
 
 
最後孫悟太被保安制服咗。
 
 
擾嚷咗四十分鐘，個老太太畀人「的」咗喺我哋隔離坐低。
 
 
其實我都有啲驚咗佢，畢竟我哩啲瘦弱書生，身上只有濃濃嘅書卷氣而無肌肉，可惜書卷氣護唔到體，一陣打死我點算。
 
 
老太太喺度整理緊膠袋，見到我刻意坐開就話：「唔洗驚到咁呀？又唔係搞你。」
 
 
「呃⋯⋯我無咁嘅意思⋯⋯」
 
 
「無咁嘅意思但又坐開係咩意思？」
 
 
「呃⋯⋯⋯⋯」
 
 
突然覺得哩個老太太嘅戰鬥力唔單止係物理上表現，嘴巴上都好勁，毫不留情。
 
 
由於好奇再加幾分內疚，我就問老太太：「婆婆，你⋯⋯好憎哩度㗎咩？啱啱⋯⋯」
 
 
「憎？我直頭想殺咗佢添啦。」佢嘅眼神充滿仇恨，青筋頓現，手上嘅膠袋都揸到咯咯聲。
 
 
「咁深仇大恨⋯⋯啊？」
 
 
吳太太（即係嗰個老太太）老公，早一排因為腎病入院，確診患咗甲型免疫球蛋白腎炎。
 
 
但因為醫咗幾個月嘅治療效果都唔理想，所以醫生開咗一種類固醇，叫潑尼松龍，唔識唔重要，重要嘅係吳生嘅情況有改善。
 
 
但問題嚟啦，因為吳先生係患有一個乙型肝炎嘅人。
 
 
乙型肝炎咁又點？
 
 
原因係雖然醇潑尼松龍（嗰隻類固醇）有效，但食咗之後，副作用係免疫力會下降，有可能令吳生體內的乙肝病毒活躍度增加，咁係一件好危險嘅事，所以正常醫生要處方預防性抗病毒藥畀佢。
 
 
但唔知點解，醫生無咁做。
 
 
最終吳生肝衰竭而死。
 
 
「喺香港要吿醫生做錯嘢簡直就係冇可能。」吳太太好悲痛憤怒咁講：「我哋向醫管局投訴咗好多次，但佢哋根本自成一個王國，無透明度，愛理不理。啲醫生為咗保護同行，又唔會篤佢。」
 
 
「我仲好記得，醫管局宣判佢無罪嗰一日，佢行出嚟嗰刻仲要係度笑笑口，佢根本就係無任何嘅歉意！」
 
 
「睇嚟你好愛你先生。」我聽完都覺得有啲嬲，就同吳太太講。
 
 
「咁又唔係啵⋯⋯我都係為錢啫，要賠償呀，搞成咁想唔賠錢！」吳太太神氣咁話。
 
 
我同誠哥都聽到呆咗。


 
係呢個時候，一個四十出頭嘅靚仔醫生由走廊行出嚟，吳太太立馬就衝上前，打算又向個醫生淋紅油，好彩個醫生及時反應，一個轉身避開咗。
 
 
「殺人兇手！殺人兇手！」吳太太不停咁大叫，最終又驚動保安，將吳太太趕出咗醫院。
 
 
「真係好慘。」誠哥望住吳太太，有啲感嘆咁話。
 
 
我同誠哥講：「誠哥，你啱啱差啲畀佢淋到啵。」
 
 
誠哥無再講啲咩。
 
 
陪咗誠哥睇完醫生，好彩無咩大礙，我哋拎咗一啲藥就開始離開醫院。
 
 
喺哩個時候，我突然收到一個電話。
 
 
本來飲咗兩罐咖啡仍然好眼瞓嘅我，當堂醒晒。
 
 
「喂，阿亮。我搵到你媽媽同阿妹呀！」
 
 
我飛奔趕到去深水埗，雖然只係十五分鐘內嘅事，但感覺漫長到好似已經過咗一個世紀咁。
 
 
我全身都濕晒，大汗揼細汗咁去到地鐵站，就見到明叔企咗喺度。
 
 
明叔一見到我就話：「你都算快啵。」
 
 
「佢哋係邊？你話搵到⋯⋯？」
 
 
「啱啱我送信時，喺地鐵站附近見到你細妹，我跟咗一段路話諗住確認下，應該都有九成似，啱先入咗去商場呀。」佢指住黃金商場講：「你知啦，著住制服入去唔係咁好啦嘛，應該未走嘅。
 
 
明叔拍拍我膊頭話：「我返去送信先呀。」
 
 
「唔該明叔。」
 
 
我個心呯呯咁跳，一路急住行入商場，一路百感交集，心情復雜到唔識形容。
 
 
見返佢哋，第一句講咩好
 
 
點解唔見咗咁耐？唔返屋企？
 
 
知唔知我好擔心你哋？
 
 
定係⋯⋯對唔住？
 
 
入到人流熱鬧嘅黃金，塞到水洩不通，行步路都難，沿途都係情侶或者一個人揹住背囊嚟買嘢。
 
 
窄路、USB線、大螢幕、寸嘴Sales，我每行一步都急速但好小心，好留意身邊嘅人，望住每個人嘅面孔、身型，好驚自己走漏眼。
 
 
「先生，搵緊啲咩產品？睇啱介紹翻。」
 
 
「唔洗唔洗，借過就得。」
 
 
窄路、USB線、大螢幕、情侶、電腦主機。
 
 
細妹⋯⋯細妹⋯⋯細妹⋯⋯細妹⋯⋯
 
 
妳喺邊度？
 
 
我喺黃金兜兜轉轉出一個圈，都搵唔到佢。
 
 
細妹⋯⋯
 
 
我開始急，心情極度煩躁。
 
 
好想搵番細妹。
 
 
前面突然見到一個背影，無論頭髮或者身型都同佢有幾分相似！
 
 
我急不及待咁上前，想去搵佢。
 
 
「南⋯⋯南門澄⋯⋯！」
 
 
「南門澄⋯⋯！」
 
 
「南門澄⋯⋯我係你阿哥呀！」
 
 
全世界都望住我喺度瘋狂大叫，覺得我好似痴咗線咁，但我已經唔理咁多。
 

我喺黃金一直叫，逆人流而前，叫到喉嚨痛，不過佢都好似聽唔到咁。
 
 
「澄⋯⋯！」就嚟追到上去時，突然唔知哪來的小孩，一嘢撞落埋扯住我褲腳跌倒。
 
 
「喂小朋友你睇路好無！知唔知撞到人㗎！」
 
 
唔知佢係痛定係乜嘢，竟然喊咗出嚟。
 
 
⋯⋯
 
 
「對唔住呀小朋友，係哥哥惡咗啲，你痛唔痛呀？」
 
 
「嗚嗚⋯⋯」
 
 
「你唔好喊啦。」我真係最怕見到人喊。
 
 
到我哄完佢再起身，已經唔見咗細妹身影。
 
 
之後，我圍住黃金同大半個深水埗行咗一次，都無佢蹤影，好似係人海蒸發咗咁。
 
 
點解又唔見咗⋯⋯
 
 
 
救命，我都想喊，睇醫生可唔可以醫返好我？
 
 
過咗幾日，我繼續陪誠哥返去復診，醫生話康復嘅進度畀想像上快同良好。
 
 
當我哋行返出醫院時，又嘈到拆天，聽咗一陣先發現又係吳太太。
 
 
吳太太又被保安轟咗出門口，一個人六神無主坐喺醫院門口，望住兩個膠袋發呆。
 
 
本身正想搭的士走，點不知誠哥開口話：「阿亮呀，不如你接咗哩單案件啦。」
 
 
我回頭望一望吳太，既然係誠哥開聲叫到，我實在諗唔到原因去推辭。
 
 
我哋行過去，吳太太見到我哋都無講啲咩，我就同佢講：「吳太太⋯⋯雖然我哋幫唔到啲咩手，但我係郵差。」
 
 
「你咁講人哋會唔會唔知你講咩呀？」誠哥喺我身邊推咗一下，好細聲咁講。
 
 
對唔住⋯⋯
 
 
我再重新解釋一次：「吳太太，我係郵差，我識送信。」
 
 
誠哥個樣好似就暈咁。
 
 
「你識送信關我叉事？」吳太太不屑挑眉咁講。
 
 
「我可以幫妳⋯⋯」
 
 
「你殺咗個衰人就真係幫我啦。」我都未講完嘢，吳太太已經一嘢斬斷咗我。
 
 
 
 
我無奈咁望一望誠哥，再講：「雖然哩個我真係唔可以幫妳，但送信可以。」
 
 
「我無神神做咩要寫信？」
 
 
「如果我可以幫你送信畀吳生呢？」
 
 
吳太太呆咗一呆。
 
 
「你知隻老嘢去咗邊？」佢緊張咁捉住我衣領問。
 
 
「都算知嘅。」
 
 
終於，佢放開咗手話：「應該傻嘅先會信你。」
 
 
吳太太真係一個好頑固嘅人。
 
 
「咁你送佢返去啦不如。」誠哥講，然後佢自己返去繼續開工。
 
 
我揹起護送服務，雖然送信方面幫唔到佢，但扶下阿婆哩啲我都做到。
 
 
老實講其實吳太太嘅生活唔算差，住私人樓，有自己嘅會所，退休前又係會計師。
 
 
「唉。送到哩度得啦。」
 
 
「唔洗，送埋妳入去啦。」
 
 
「⋯⋯」
 
 
「嘩你屋企都幾大啵。」
 
 
「一個人住咁大嘅地方有鬼用咩。」佢一坐低喺梳化，就腰痠背痛咁款。
 
 
「我幫你按摩下。」
 
 
「吓⋯⋯唔洗啦。」
 
 
「唔洗同我客氣啦。」
 
 
一路幫吳太太按摩，我一路用眼參觀佢間屋。好多佢同吳先生嘅合照，成雙成對嘅擺設。
 
 
「你哋好幸福喎。」
 
 
「錯啦，我都唔知點解會嫁咗畀佢去。」
 
 
吳太太話，婚姻係愛情嘅墳墓。
 
 
「市面上99.9%嘅愛情小說同電影都係教壞人，佢哋只會講追求前同熱戀期嘅嘢，但唔會同你講熱戀期過咗之後嘅嘢。平淡嘅生活點過，明明哩個先係重點。」吳太太語重心長咁講。
 
 
「人呢，追求前，就係鬥虛偽嘅遊戲，將自己最好畀人睇，最差嘅一面就收埋晒。到追到後就完形畢露，咩R屁股放屁出晒嚟。特別結婚後更加係咁，因為你無得退貨嘛。」
 
 
「嗯嗯嗯。」成粒鐘，我淨係聽佢發表偉論。
 
 
「所以你真係諗清楚先好結婚呀。」
 
 
「我應該唔會咁快⋯⋯」
 
我去咗廁所，暫避一下風頭，畢竟耳仔會痛。
 
 
唔知點解，我覺得吳太太講嘅都唔係真心話⋯⋯
 
 
到出返廁所時，只見吳太太好急咁收埋相架，然後話：「你⋯⋯係咪話可以寄信畀老嘢？」
 
 
「你改變主意？」
 
 
「嗯⋯⋯我改變主意。」
 
 
 
明明屋企好多一雙一對嘅嘢。
 
 
 
 
 
吳先生住嘅地方，係山林嘅小木屋，有一塊中規中矩嘅田，佢正喺度收成。
 
 
人生前總係會做好多傷害其他人嘅事，無論係流血；言語、排斥；係有意，定無意。
 
 
而陰間，就係一個地方，畀你靜靜咁去反思，過程就係你所收成嘅糧，上繳當係填補返你曾經做過嘅「孽」。
 
 
不過我總係質疑，孽係量化到嘅嘢咩？
 
 
當吳生見到我嚟到，就好奇問：「你係⋯⋯？」
 
 
「我係人間嘅郵差，受親人受託，送一封信畀你。」講完我就將吳太太嘅信交畀佢。
 
 
「信？」
 
 
吳生打開，就開始讀起嚟。
 
 
「喂死老嘢呀。我真係好憎你講大話。
 
 
今年原來你都75歲。
 
 
我叫你老嘢都叫咗45年⋯⋯
 
 
成日又阻掟⋯⋯」
 
 
吳生一邊讀，畫面一幕幕咁浮現。
 
 
「你好阻掟，又唔識幫手！」吳太太拎住食完嘅飯碗講。
 
 
吳生瞓喺梳化度緊睇明珠台，成條懶蛇咁R屁股，無理太多。
 
 
當吳太拎完啲碗入廚房後，就諗住去廁所，點知入咗無耐，吳生就聽到吳太喺裡面大叫。
 
 
「啊！」吳太猛然打開門，喝問：「又係你啦，你搵次唔好整污穢個地方得唔得呀！」
 
 
吳生皺一皺眉頭，繼續睇電視。
 
 
但吳太一路喃喃自語：「落雨又唔識收衫⋯⋯買餸又總係買貴咗；出街又總係一枝箭行咗去，完全唔等我⋯⋯」
 
 
「你唔好嘈啦好無呀？」
 
 
「做咩？我有話錯你咩？出街食飯又無儀態，成日食到周圍都係，失禮死人。」
 
 
「廢事同你嘈。」
 
 
「係啦你啱晒啦。」
 
 
我都唔知點解會嫁咗畀你，嫁咗畀你一個又唔浪漫又麻甩又口臭嘅死老野。
 
 
但老嘢呀，你唔喺度，無人阻住我睇電視，無人畀我鬧整污嘈個地下，無人畀我話儀態，我真係好唔習慣。
 
 
屋企得返我一個人，真係好唔習慣。
 
 
望返啲相，我都會諗返起，你當年向我求婚嘅情況。
 
 
你傻更更咁，同朋友合好晒要畀一個驚喜我，喺公司門口諗住等我，點知嗰日我早收工，你一個人追住㗎巴士跑呀跑。
 
 
跑到下一個站，你先滿頭大汗咁上車，拎住一束皺折不堪嘅花，喺車度向我求婚。
 
 
邊有人喺巴士求婚㗎，你準備好嘅嘢咪無晒用囉？唔識等㗎咩？
 
 
但你淨係笑笑口咁講：「因為我真係好想即刻向你求婚。」
 
 
你跪低，手震震咁打開戒指盒然後問：「嫁畀我好無？我會永遠咁照顧你。」
 
 
你真係好蠢，我都唔知鍾意你啲乜嘢。
 
 
雖然你係一個又唔浪漫又麻甩又口臭嘅死老野，但唔浪漫、唔浪漫咁我哋都一齊渡過咗大半個人生啦。
 
 
老嘢呀，原來你走咗之後，我先發覺今世好幸福。
 
 
好幸福，有你可以陪我變成老太婆。
 
 
所以我好憎你，你講大話，你承諾會照顧我一世。
 
 
你放心，我一定會幫你報仇，你等我呀！」
 
 
吳生睇完，沉思咗一陣就問：「郵差先生，你有無拍過拖？」
 
 
「無⋯⋯」
 
 
「如果你有，應該可以明白⋯⋯你可唔可以幫我一個忙？」
 
 
拍拖⋯⋯
 
 
係咪真係無？
 
 
我都唔係好記得，但有種好類似嘅感覺。
 
 
我第二次遇見紅衣嘅女孩，已經係我第五次做實驗嘅事。
 
 
今次嘅我亦唔例外咁拎咗細妹隻米妮公仔，仲偷偷地買咗安眠藥。
 
 
當我瞓著咗，張開眼之時，一個極大嘅夕陽喺我眼前，四周圍都係山林草地。
 
 
果然！我嘅猜想係無錯！
 
 
我係度諗緊返去可以大大聲同老師加同學講，真係有第二個世界存在，我並唔係故意收埋啲簿。
 
 
但好可能我醒返就會當係一場夢就算，所以我立即放低手中嘅米妮公仔。
 
 
「點解你又會喺度嘅？」
 
 
哩把聲⋯⋯
 
 
我轉身，正正就係之前紅裙嗰個女仔，佢用充滿好奇嘅眼神望住我。
 
 
「妳⋯⋯」
 
 
佢打斷我嘅說話，繼續自說自話：「你點解又喺度嘅？明明未死？」
 
 
「哩度，哩度係咪第二個世界！？」我好似終於搵到答案咁，走上前問佢。
 
 
「當然啦，哩度係陰間嘅靈薄鎮，只有死咗嘅小朋友或者BB會嚟，你唔應該喺到㗎！」佢搖搖頭講，似乎對我嘅出現唔太明白。
 
 
等等先！
 
 
我突然諗返起，偷咗我哋啲簿嘅，咪就係眼前嘅佢囉，我立即話：「喂！賊女，畀返啲簿嚟呀！」
 
 
佢唔滿意咁話：「你話緊邊個呀！」
 
 
「邊個偷咗我啲簿咪話邊個囉！」
 
 
「哼，邊個稀罕你啲爛簿！」
 
 
「唔稀罕咁妳就拎返嚟！」
 
 
「我係唔畀，吹呀！？」
 
 
佢係咁走，走入山林嘅當中，我追趕住佢，佢跑得好快，我完全跟唔上。
 
 
佢仲要不時轉頭過嚟對住我做鬼臉：「哈哈，跑得咁慢㗎！」
 
 
「妳睇住嚟，我實追到你！」
 
 
雖然話係咁講，但我真係完全追唔上佢，佢又熟悉地形，我淨係好似一個傻仔咁畀佢帶住咁遊花園、逛大圈。
 
 
「吓吓⋯⋯」
 
 
我跑到喘晒氣，正想放棄之際，聽到前面嘅佢好大聲咁叫：「啊！」
 
 
我慢慢咁行前，好驚係一個伏，但定睛一睇先發現佢跌咗落一個懸崖，正係用一隻手捉住崖邊。
 
 
「妳無事嘛？」
 
 
佢好倔強咁唔應我。
 
 
「唉。」
 
 
我將佢拉返上嚟，佢仍然好倔強咁，一句多謝都無。
 
 
「算啦，唔洗多謝我。」我拍拍身上嘅塵灰，佢條紅裙都變咗灰黑色。
 
 
「我無諗住多謝你啵。」
 
 
「⋯⋯」
 
 
佢叫我等一陣，無幾耐，佢就拎返我啲簿返嚟。
 
 
「畀返你。」
 
 
我打開啲簿，發現裡面滿滿嘅筆痕，好似係度做緊筆記。
 
 
「嗰啲⋯⋯係我想學就跟住寫⋯⋯」
 
 
「妳無讀書咩？」
 
 
「我好細個就死咗啦，唔係人人都可以好似你咁幸福。」佢瞪住我講。
 
 
「咁我哋交換。」
 
 
「交換？」佢不明所以地問。
 
 
「妳畀返啲簿我，我送返隻公仔，畀佢陪妳。」
 
 
佢接過隻公仔，雖然無話鍾唔鍾意，但眼神充滿喜悅。
 
 
佢問：「佢叫咩名？」
 
 
「我叫南門亮。」
 
 
「我唔係問你呀，我係問佢。」
 
 
「佢好似叫細細粒。」
 
 
「細細粒。」
 
 
「咁妳叫咩名？」
 
 
「我叫佟蓳萓。」
 
 
 
當我重返人間時，仍然有啲頭痛⋯⋯記憶重臨嘅感覺太唔好受。
 
 
 
佟蓳萓⋯⋯
 
 
點解我唔記得咗哩段記憶⋯⋯究竟我仲有幾多嘢係唔記得咗？
 
 
 
「你返嚟啦？」哩個時候，誠哥敲敲門入嚟我間房。
 
 
「係呀⋯⋯」
 
 
「吳太太封信點？」
 
 
我猛然驚覺：「唔講住誠哥！我有緊要嘢做！」
 
 
當我趕到吳太太嘅屋企時，已經無人，我心知不妙。
 
 
我直接就撲去醫院搵吳太太，啱啱仆到去，就已經見到佢喺人群之中，手暗暗執一個類似啤酒瓶嘅物品，左手拎住打火機，正係想點燃。
 
 
「吳太太！」我立即喝住佢。
 
 
佢回頭，見到我好驚咁問「你⋯⋯你做咩會喺度？」
 
 
「吳太太，妳唔好咁傻啦！」我趁佢唔為意，一手搶過佢手中嘅打火機。
 
 
「畀返我！畀返我！」吳太太轉身想嚟搶，我哋就係醫院纏成一團。
 
 
「妳根本就唔想傷害人，妳心底裡面就唔係咁諗！」
 
 
「佢害死老嘢呀！」
 
 
「妳知道係意外嚟！無人想㗎！」
 
 
「唔得⋯⋯唔得⋯⋯佢要賠返⋯⋯」
 
 
「妳其實唔係想要錢，妳只係好愛吳生，妳唔慣無佢嘅生活啫，係咪？」
 
 
吳太太爭唔過我，無力咁跌喺地上，眼淚湧流出嚟。
 
 
「咁多年啦⋯⋯無咗佢真係好⋯⋯好唔慣⋯⋯我唔得㗎⋯⋯」
 
 
「我知道㗎。」吳太太連吳生喺洗手間啲杯同牙刷都無扔到就知。
 
 
「你唔明⋯⋯你唔會明⋯⋯」佢搖搖頭講。
 
 
我捉住佢隻手話：「吳生有啲嘢托我同妳講，佢話：『生有時，死有時。人總有一死。我無怪過醫生，我相信佢都唔想。但我更唔想見到妳為咗報仇咁辛苦，因為憎一個人，係一件好痛苦嘅事嚟。老太婆，即使無咗我，都勇敢咁活落去好無？』」
 
 
「『因為⋯⋯我唔想因為報仇，而破壞咗原本美麗嘅老太婆。』」
 
 
吳太眼睛瞪大，我慢慢扶佢企返起身。
 
 
吳太太平靜咗一啲，但仍然話：「唔得，我唔可以無咗佢⋯⋯」
 
 
「妳知唔知道，吳生仲託我做一樣嘢。」
 
 
「？」
 
 
我由袋中掏出一個草製嘅戒指。
 
 
「哩個係⋯⋯？」
 
 
「佢親手做嘅戒指。」
 
 
「戒指⋯⋯？」
 
 
「吳生第二次向妳求婚，約定繼續照顧妳一生一世，但條件係妳要好好活落去。」
 
 
吳太太望住草戒指，喊住咁不停細觀。
 
 
「吳太⋯⋯你知唔知陰間並唔係人要去嘅終點站⋯⋯我相信吳生同妳將來一定會喺嗰個地方重聚⋯⋯咁妳願唔願意？同吳生許下哩個承諾？」
 
 
吳太太望住空氣，仿佛有個人企係嗰度咁，佢柔情咁望住佢。
 
 
唔知點解，眼前嘅吳太太突然變返年輕咁，青春可愛動人。
 
 
高大帥氣嘅吳先生亦跪喺佢身邊，為佢戴上戒指。
 
 
吳太太用最幸福嘅表情，咽泣嘅聲線講：「我願意⋯⋯」
 
 
 
 
 
 
 
讓我們將來繼續一起，永遠也不分離。