《我係窮郵差，專門幫陰陽相隔嘅親人送信》（書局上架中）: 4
有一個盛傳嘅奇聞，喺日落黃昏之時，會一個男人搭小巴。
「兩個人呀司機。」
怪就怪在，佢每次會畀兩個人嘅錢。
但全車嘅人，明明見到佢係一個人上車，根本無其他人。
所以有人猜測，話佢錢太多⋯⋯但亦有人話，嗰個人根本已經上咗車，仲坐埋喺車度，只係⋯⋯我哋睇唔到。
事實上有唔少人都話曾經見過哩個畀兩個人錢嘅男人，越傳越盛，就成為咗一個熱門嘅傳說。
我今次嘅目標就係哩個男人，預咗要小巴一日遊。
飲咗幾啖咖啡，提下神之後，喺上咗車無幾耐，好自然地，我又瞓著咗覺。
瞓到咁上下，我隔離嗰個要落車，就拍醒咗我，我側身畀佢落車之後，就有一個男人上車。
「司機，兩個人呀唔該。」
我本來都無留意佢，但係喺我前面有對情侶喺度竊竊私語咁講：「喂，嗰男人明明得一個人都入兩個人嘅錢，會唔會太奇怪。」
一聽到哩句，我即刻成個人醒晒，留意住上車個男人。
佢係一個五十幾歲嘅男人，名牌手錶同POLO衫，一睇就知非富則貴，照計應該自己揸車、唔洗搭小巴嘅人嚟。
果然如傳說中所言，無人喺佢前面同後面。
真係有兩個人？定還是我睇唔到？
死啦，越講好似越覺得有啲寒。
司機聽到佢講之後，好疑惑咁較個八達通機。
「咇⋯⋯」
「負咗錢呀。」司機大聲咁話。
「咁我一陣再畀。」佢講完之後，就坐咗喺我身邊，一路係度數散紙，只係似乎佢唔太多似有散銀。
到底點解會畀兩個人嘅錢呢？
「 Sorry，介唔介意唱個五蚊嚟，我一陣還返畀你？」佢突然開口問我。
「喔⋯⋯可以呀。」
我拎咗個五蚊畀佢，佢向我講咗聲唔該，入完錢坐返低之後。
我發覺佢嘅目光一直望過嚟，一時皺眉，一時笑顏頓開。
我背部有啲涼陣陣嘅感覺，因為⋯⋯我覺得佢根本唔係望住我。
佢嘅目光係望緊另一個人，眼神好關懷。
「啊⋯⋯係呢，你又會入兩個人嘅錢咁得意嘅？」
佢笑咗一笑話：「因為我係幫屋企人畀。」
「你屋企人？」我左右環望話：「但我又見唔到你嘅屋企人？」
「的確正常。」佢苦笑咗一下。
「其實照我目測，你應該唔洗搭小巴呀。」
「因為已經慣咗。」
「你一定係好念舊嘅人嚟。」
「呵呵，還可以啦。」佢笑起嚟，唔知點解，覺得佢笑容帶點苦。佢伸手出嚟握：「我姓孟。」
「我叫南門亮。」孟生嘅手好有力，睇嚟係好有自信嘅人。
「我始終好奇，你啱啱話，『見唔到你屋企人係正常』係咩意思？」
「應該無乜人見到⋯⋯」佢望住我，好認真咁話：
「我媽媽⋯⋯就正正坐咗喺你個位上面。」
小巴繼續飛快咁奔馳，穿過喺繁華熱鬧嘅大街小巷中。車上卻係一片死寂。
搖晃不停嘅窗桿、街市檔口嘅叫賣聲、汽車廢氣、司機嘅粗口，變成靜默時間嘅主角。
落咗車之後，孟生小心翼翼咁扶住「空氣」，喺外人嘅眼中，佢簡直就係一個神經失常嘅人。
由扶、擔遮到開門，孟生終於返到自己嘅屋企，一間唔夠200尺嘅狹小公屋。
佢望住廚房，然後又望住個廳。
我好奇咁樣問：「你媽媽而家做緊咩？」
「佢⋯⋯煲緊湯。」孟生尷尬咁講。
「喔⋯⋯」
「頭先你話，可以幫我送一封信畀我媽咪、究竟係咪真係得？」
「可以，我係郵政局嘅職員。你介唔介意講多啲背景資料俾我聽？」
孟生望住「空氣」，就開口講：
「我叫孟宗。今年五十一歲⋯⋯
喺我三十歲嗰一年， 我做咗倫敦金。
好多人都會有一個疑惑，點解倫敦金可以咁無良，連阿婆嘅儲咗一生嘅棺材本都呃。
因為我哋大部分人都畀一個信念洗腦，就係：「佢咁蠢，我唔呃佢，佢遲早都畀人呃㗎啦。倒不如我呃佢仲好，可能仲無咁盡。」
倫敦金個世界好簡單：賺錢，唔賺錢；佢死，我死。反正簽咗約，根本就責任可追討。越多交易我哋越多佣，我哋就係咁跑數。」
「今個月嘅家用。」孟生將五位數嘅支票放喺枱面。孟媽啱啱由細到淨係容納到一個人嘅廚房，轉身拎住湯出嚟一個唔夠一百呎嘅廳。
當孟媽見到支票嗰刻就板起口臉，放低煲湯、低頭睥住地下講：「我咪叫咗你辭職囉。」
好似被人開咗個制咁，孟生激動咁話：「個個呀，個個媽咪見到家用都開心！人哋陳師奶個仔畀咁少，佢都笑笑口，係得妳一個先會見到家用都黑臉㗎！」
「人哋陳師奶嘅仔起碼係做教師，正當收入，收得心安理得！我講咗幾多次，做人堂堂正正，唔好要哩啲不義之財啊！」
「人哋搵幾錢我搵幾多呀？佢TA仔嚟咋！」
「唔係搵幾多嘅問題！」
「妖，我哋屋企咁窮，我點讀得好書呀！仲有咩工可以做！」孟生一手將一隻湯碗掃落地下，湯碗四裂，發出清脆嘅破裂聲。
孟太無再講嘢。
孟生知道每次佢提起讀書，怪孟媽無錢畀佢去補習班、興趣班時，孟太就會好內疚。
另一樣會令孟太傷心，就係『爸爸』。
有一次孟生鬧孟太，留唔住爸爸，令爸爸離開佢哋時。因為咁，孟太傷心咗一個星期。
孟生都知道，其實係佢爸爸唔要媽媽。
「飲湯啦。」孟媽打破沉默，再幫佢拾起啲碎片，拎入廚房扔掉，孟生睇到佢入廚房時偷抹眼淚。
每次有咩大事，孟媽都會叫孟生飲湯，當係平息風波。
孟媽係一個收銀，日前頭係百貨公司收銀，夜晚返嚟係酒店做保安。
總係要出去做野，由早去到晚，屋企得返孟生一個人，仲有四面牆，冷冰冰。
唯一一樣熱嘅野，就係孟太煲嘅湯。
唔知幾時，邊一次孟生講過佢鍾意飲西洋菜豬骨湯，從此，孟媽就瘋狂煲，總係會早啲起身喺出去前，煲湯留喺枱面。
「你阿媽係收銀妹咋，夜晚做雞！」
唔知係邊個同學講咗哩句，孟生將佢打到流血，牙都甩埋。老師叫咗本來應該返嚟工嘅孟太嚟，佢要不停向人哋家長同老師道歉。
孟生本來以為孟媽會狠狠咁打佢，因為佢哋賠咗一個月人工畀人，但返屋企嘅路上，孟媽攬住我喊。
「媽媽無用，媽媽窮，要你保護。」
都係以前嘅事。
孟媽最後都係決定，收咗張支票。
「張支票我都係幫你收咗佢啦。」
孟生一邊飲湯，一邊猶豫考慮，最後開口講：「我⋯⋯我⋯⋯我可能搬出去同Mandy住，我哋都決定咗下個月結婚。」
「咁⋯⋯咁快？」
「我哋諗咗好耐啦。」
「媽咪閱人無數，都睇得出哩個女人唔係真係鍾意你㗎，佢關心你買咩畀佢仲多個你健康。」
「唔洗講。總之我一定同佢一齊，亦都搬硬。」
「你聽我講得唔得啫！」
「咁你聽我講一次又得唔得呀！」
孟生好大力咁推張枱，今次成煲湯倒瀉滿地，佢拎埋自己嘢就呯門走咗。
嗰次係孟生最後一次見佢媽咪。
孟生繼續有定時畀家用佢，孟生覺得憑住啲錢，孟老太應該會生活得幾好。
而無幾耐，孟生真係同Mandy結咗婚，亦如孟老太所言，喺倫敦金炒咗孟生之後，Mandy好快咁同孟生離咗婚。
見返孟媽，係直到佢急性腎衰歇死。
當孟媽走咗嗰晚，孟生無喊。
當送孟媽出殯嗰日，孟生都無喊。
「直到某一個平常嘅晚上，我返到以前嘅屋企時候，係街上面，我見返我媽咪。」
「我點叫點喺佢面前，佢都見唔到我咁，我又摸唔到佢。其他人又好似睇唔到佢咁。
孟媽就好似一個影像回顧咁。
佢一個人企起條街，四圍望嚟望去，自然自語咁問：「我⋯⋯我係嚟做咩？」
過咗好耐，佢先話：「啊，我係嚟買餸煲湯畀個仔⋯⋯」
佢繼續喺街市買餸、買菜、買豬肉⋯⋯停喺度一陣，再買菜、買豬肉⋯⋯ 發現自己已經買咗，停喺度一陣，再買菜、買豬肉⋯⋯
「係呀⋯⋯我買餸煲湯畀我個仔呀。」佢笑笑口咁對住空氣講，好似真係見到人咁。
買完餸，佢就會搭小巴返屋企。佢又唔記得畀錢，成程車都無畀到，應該係畀司機鬧，佢要不停道歉。
返到去，佢好辛苦頂住腰痛煲湯，成日唔記得熄火，煲好湯就望住門口，一直等⋯⋯一直等等我返嚟。
只不過，係我一次都無返過嚟飲。
我好想佢煮嘅飲湯，可惜我點拎都拎唔到⋯⋯佢只係一個影像⋯⋯
哩個影像，不繼咁重復，只要每次我返嚟都會見到。
「所以你就搭車入兩個人嘅錢，係為咗孟老太？但⋯⋯應該係無用⋯⋯」我話。
「其實無咩用，因為已經過咗去，但我心裡只係想做啲嘢，想自己好過啲，雖然都真係太遲，我連佢⋯⋯有病都唔知。甚至我連佢無用過我啲家用，反而全部捐晒出去做善事都唔知。」
「孟生，如果你可以對孟太寫最後一封信，你會寫咩？」