《我係窮郵差，專門幫陰陽相隔嘅親人送信》（書局上架中）: 3

今年係香港郵政第176年。
 
 
第176年代表咩？代表真係好耐。
 
 
係哩個電子郵件同通訊APP大盛嘅年代，除咗政府部門、銀行、大公司之間嘅商業來往外，你問仲有無人會寄信？
 
 
有，仲有一班鍾意交筆友嘅寫信，或者寄下明信片咁，但數量都越嚟越少。


 
 
寫信係唔少人心目中，已經係老土，係過去時代嘅產物。
 
 
畢竟除咗小學生同中學生之外，仲有邊個會願意拎住枝筆寫嘢，有幾多大學生連筆袋都無。
 
 
加上郵局近年一直為人詬病，畀人鏟到上天花板。鬧開放時間朝8晚5，根本無打工仔會用到。
 


 
由於郵局嘅不思進取，已經連續幾年蝕錢。（郵局係自負盈虧嘅部門）
 
 
所以局長一直都想開源節流，CUT一啲部門。不過，除非你學日本咁改革郵局，如果唔係都會蝕落去。
 
 
雖然鬧就易，郵局做嘅嘢又真係唔易。
 
 


一封信，由入郵筒，就會被送返郵局，然後送去喺揀信部，係揀信枱分揀，再放信入地址坑槽，最後由郵差分派。
 
 
哩個係正常派信嘅流程，我想講嘅係唔正常嘅流程。
 
 
有無人諗過，郵局一年運作成本52億，近25億去咗員工成本，22億係郵務運作成本，咁仲有嗰5億去咗邊？
 
 
5億行政費開支？你信唔信？
 
 
5億，其實當中有部分都去咗一個好少人知嘅部門度。
 
 


唔係朝8晚5，有特別嘅派信方法，同時人手好少。
 
 
哩個部門嘅郵件係寄去另一個世界，死人嘅世界。
 
 
事實上，每個市民都有公民權利，享有一次使用嘅機會⋯⋯向嗰個世界寄一次信。
 
 
至於點解淨係一次咁多？哩個法例規定，我都唔知點解要咁定。
 
 
雖然話每個人都享有嘅權利，又並唔係乜信都寄，為避免服務被濫用，所以要嚟哩度寄信，首先要面試，了解下寄信嘅對象同必要性。
 
 


痴線㗎，寄信都要面試？
 
 
的確係痴線，不過痴嘅唔係我哋，而係其他人。
 
 
因為哩個世界真係乜人都有。
 
 
「請問⋯⋯慈禧太后⋯⋯係閣下邊位親人？」
 
 
「吓？一定要親人㗎咩？咁我份歷史報告嘅人物專訪論文點算呀？」
 
 


「我諗你約過另一位歷史人物做訪問好啲。」
 
 
下一位。
 
 
「點解你會覺得⋯⋯米奇老鼠會喺陰間收到你封信⋯⋯？」
 
 
「佢唔係陰間唔通係陽間呀？」
 
 
「？」
 
 


「你有見過佢係人間出現咩？」
 
 
「又真係無。」
 
 
「咁你都答咗啦。」
 
 
下一位。
 
 
有時唔知做咩，十個客十個客都唔太正常，所以除咗面試之外，有時我哋都會主動出擊，物色一啲特別嘅客人。