拼命也要尋回他: 第二章

“匿係到...等我去睇下賣甩佢未”我地跑到一個轉角位 ，滔滔示意我匿係到...
“小心啲...”我好擔心咁望住滔滔既背影
*******************************************************
“唔得...都係一齊去好”係滔滔走出去唔夠3秒 ，我即刻轉出去
“點解無人...”我望住前面一條直路 , 周圍都唔見滔滔既蹤影
“滔滔...出黎啊 ! 唔好玩啦”我大嗌，希望會有人答我 。 可惜既係 , 無任何聲回應我既呼喊..
我好驚...三秒，唔係都未夠三秒 ，無可能跑得咁快... 無可能架...
跑 ! 我跑返回頭路 。
依家係半夜 ， 周圍都好黑... 人影都無個 ，全條街就淨係得啲街燈同埋我呢個拎著對高踭鞋赤腳跑既傻婆...
由於我一路跑一路喊 ，視線早已經被淚水搞到模模糊糊 ，直至到我撞到啲野...




*******************************************************
“哎...”我唔知撞到啲咩 ，搞到失平衡跌左落地
“你有無事啊 ? ”有把好熟悉既聲音問我 , 我唔會認錯...係滔滔
“你去左邊啊...嚇死我啦 。 你知唔知岩先你突然之間唔見左我幾驚啊 。 ”我用盡全力攬住前面呢個男人...好似一唔用力攬住佢就會消失
“你認錯人啦”佢推開我
“認錯 ? ”我望住前面呢個男人 , 無論身形 、 樣貌都同滔滔一模一樣
“唔好玩啦…”我伸隻手出去摸佢塊面
奇怪...點解有疤痕
我望住前面呢個男人 , 的確佢同滔滔係生得一模一樣 , 但係滔滔塊面無疤痕 , 雖然佢同滔滔好似 , 但係佢既神態同滔滔唔同 , 佢比滔滔更加成熟 , 似一位經歷過好多野既人...
“對唔住...我諗...我”




“結果你地都係黎左...要發生既 , 始終都係要發生 , 真係改變唔到...”正當我打算同佢道歉既時候 , 佢突然講左句咁既說話
“你講緊咩...”我好疑惑咁望住前面呢個男人
“我叫啊蹈...但係唔好搞錯 , 我唔係你要搵既人 。 原本以為可以阻止呢一切既發生 , 結果都係唔得... 跟我黎 , 我話你知究竟發生咩事...”啊蹈示意我跟住佢行
*******************************************************
“明明岩岩跑過黎既時候係一條大直路 ，完全無印象有條分叉路...”我一直跟住啊蹈
“到啦”啊蹈係前面停低
“商場?”我望住前面座建築物 ，好疑惑咁問
“行啦…我地入去 , 入面有人會解答到你既疑問”佢向住商場既入口行入去
“等埋我啊...滔...啊蹈”望住佢既背影，有一刻我差啲以為佢係我男朋友
*******************************************************




“我地到啦…”啊蹈帶我上左2樓“琼姐...”
“洗衣鋪?”我望住前面唯一一樣有著燈既鋪頭 , 無錯呢間所謂既商場 , 除左呢間洗衣鋪 , 係無其他商鋪有著燈
“你就係梓曰...”有個女人坐係櫃檯前面嗌我
“嗯...我係...究竟發生咩事?有無人可以解答我...”我望住佢地兩個
“蹈仔...乜你無同人地講發生咩事架?”琼姐好驚訝咁望住啊蹈
“無啊...我唔知點開口...都係你講啦...話曬你都係老大”啊蹈將個波射返比琼姐
“你又知人地一定肯參加...始終咁危險”琼姐用好擔心既語氣講
“發生咩事...咩危險?”我插左句嘴埋去
“歡迎你黎到我地既世界...”琼姐突然同我講歡迎
“你地既世界?你講咩?”我被佢搞到一頭霧水
“我地可以幫你搵返你男朋友 , 不過當中有一定既危險 , 有可能...我話有可能姐...有可能會無命”