[新手上路] 真係做得出刀劍神域入面果種VR?: 22. 我覺得無咁簡單既...

「入黎, 坐呀~」我奸笑咁望住Alice

Alice慢慢行去我張書檯度坐「打搞晒啦~」

「喂! 你笑得咁奸係咪諗埋晒啲咩衰野呀!!!」Alice笑住咁講又打左我幾下

Alice雖然平時跳晒制, 但成日笑又靚又樂觀, 都唔錯呀...

「hehe~~比你發現左添, 你唔好彩啦!! 我怪叔叔黎嫁~~」我望住Alice一邊係度搓下對手, 慢慢咁行埋去





突然Alice企起身, 推一推我, 我向後跌坐左落床...然後佢哄個頭埋黎, 好近...我諗應該差2cm我地就鼻掂鼻, 就好似做戲先會發生既情節咁

佢望到我對眼實一實, 然後用手指彈一彈我個鼻, 笑一笑「作死你呀! 講正經野呀傻佬!」

我紅都面晒...「玩下姐...」(好怕醜呀媽咪~咁大個仔都未試過有女仔咁近距離對望)

「係呢, 咁你有咩想繼續講呀?」為免尷尬, 我都係拉返去主題

「嗯~ 其實我係想講, 我覺得, 我覺得咋! Steve係自己刻意要走, 而唔係比人捉左去又或者...」





「你真係咁諗?」我未等佢講完就打斷佢

「urr...我都係...估下嫁咋...」Alice迴避我既眼神, 細細聲咁講

「其實我都係咁諗! 估唔到你都係咁諗呀!!!」我好開心有人同我諗法一樣

「真係?」Alice聽到之後好激動, 「我認識既Steve一定唔會就咁走, 以佢既身手同頭腦更加無可能比人捉得走, 除非係佢自願啦」

「下? 有乜野緊要得過佢既心血, 會自願離開咁嚴重呀?」





「唔知, 真係唔知...更何況我地都係估估下唔係真...唉~ 點都好啦劍仔, 同你講完真係舒服啲! 我返去休息啦, 有咩聽日再講啦, 早抖~」

「嗯, 早抖, 不如我送你返去呀...」

「嘿嘿~ 下次啦」Alice回頭笑一笑, 向我單一單眼, 然後就走左了

我諗我開始戀愛了<3


第二朝訓醒, 其實都訓得唔係咁好, 始終發生左件咁大既事, 我諗無人會訓得好

行去canteen食早餐果時, 咁岩又撞到杰仔行緊過去

「早晨呀杰仔, 係咪訓得唔好呀?」





「嘩, 乜咁岩既! 係呀...咁大單野點會訓到喎...」

「咁又係, 不過點都好啦, 晏啲入去訓練多多指教啦~」頂! 我真係好虛偽

「傻啦劍仔...教就講唔上, 交流下都仲可以既」杰仔拍一拍我膊頭微笑

高手...之前又唔見你咁謙虛, 係啲女面前就認晒叻, 真係要比啲掌聲你

入到canteen原來其他人都係齊度, 我諗佢地都係無教好訓先咁早起身...又或者跟本無訓過

「hey~~~杰仔劍仔過黎呢邊一齊坐呀~~」Alice大叫

我向Alice揮手示意

行到過去, 果然全部人都熊貓眼咁既款...當然我都係啦





「早晨呀...乜咁早到既你地, 食左野未呀?」巡例上我都要問下既

「我地食完啦, 都係坐多陣休息下」火火隊長話

我主動行去Alice隔離坐, 杰仔就話買野食先行開左

「Alice呀, 其實你覺得杰仔係一個咩人?」我細細聲係Alice耳邊講

Alice用一個黑人問號既表情望住我, 個眼神就好似想講「點解你要咁問」咁樣

正當我想再哄埋去佢耳邊講野既時候「嘩! 嘩! 嘩! 劍仔你哄到Alice咁埋既~曳曳啦你兩個」Zero好大聲咁講, 同時又一邊奸笑, 驚死成個canteen既人都聽唔到咁

呢一刻成個canteen既人, 佢地目光都集中晒係我地張檯度





「無呀無呀...」我同Alice異口同聲咁講

「仲話無!!! 夾到咁都話無, 搵鬼信呀?」Zero死咬唔放, 同檯既其他隊員都笑我地兩個, 又一齊加把口話我同Alice點點點咁...但重點係, 大家都放鬆到心情, 氣氛無再咁沉重啦...我同Alice講「算啦, 難得佢地會笑返, 當比個機會佢地笑下開心下囉」Alice聽到谷起個鰓嬲爆爆咁, 真係好可愛

我地一路行一邊講笑, 話咁快就行到去研發部繼續今日既訓練. 一入門口第一個見到既係Koey, 行近啲發現佢對眼好紅...應該係喊過, 我諗係人一睇就知, 只係無人敢提

Zero首先開口講野「早晨呀Koey姐, 又係咁準時到喎~」

聽Alice講, 平日Steve都會堅持自己做呢個早會briefing, 除非真係有野做黎唔到, 如果唔係都會親身黎做, 因為Steve講過親自帶早會士氣會高啲, 同埋比人感覺更加似大家庭喎...雖然我經歷得唔多, 但我唔會否認呢種講法

「早晨Zero, 大家早晨! 今日由我黎主持早會, 講返今日既注意事項啦...」Koey深呼吸左一口氣, 跟住就講「其實有件事我諗大家都有必要知道...呢件事測試員小隊已經知, 其他人都應該有權知」

始終...呢件事都係要比所有人知