[新手上路] 真係做得出刀劍神域入面果種VR?: 12. 凡事有原因

「隻Game唔係我寫!」Steve講出一句令大家都呆晒既野

「係呀, 隻game唔係我寫, 係我偷偷咁攞返黎」Steve繼續講

即係偷啦...不過對我黎講, 我聽完係無咩感覺, 反觀其他人, 好似一臉難以置信咁

「我一直想去破解入面既資料, 但一直都做唔到, 可以話呢種加密唔係我能力範圍內做到既事...而我能力範圍內既極限, 就係不斷探索同fix bugs,  呢個遊戲比我既感覺係好似遇左比你偷黎玩咁, 因為只會比你fix野, 而唔比你增加到任何內容落去, 好似set左條路比你行咁, 就好似你去幫佢做義工, 搵晒啲bug出黎幫佢改, 他朝一日佢會攞返走我地既努力...」Steve好沉重咁講, 一路搖頭, 大家都感受到佢既無奈

「咁VRT呢個idea都...?」Koey好失望咁問





「呢樣絕對唔係! VRT係我既心血, 亦都係我要成功既目標」聽到比人質疑自己既努力, 難免會有少少火, 跟住Steve再補充, 「VRT呢個技術其實PS(Playstation)一早已經掌握到 , 而且呢隻game都係佢地既! 呢隻game表面上係好似普通練功打怪既game, 事實上...事實上係收埋左好多關於PS既秘密」

「秘密? 咩秘密呀?」我口快快咁問左出口

「Everything!」Steve張開雙手

我又忍唔住好奇咁問「知道左對我地有咩好處先? 我地唔係一直都領先PS好多咩?」

「少年, 你太年輕了! PS雖然話唔再研究落去, 但事實係咪咁呢? 我就唔信佢地會斷自己米路!」





「但你果隻game係幾年前攞過黎, 咁啲資料同秘密應該都係幾年前嫁啦?」我又口快快講左出口

「......你講得岩, 係幾年前攞返黎果時就無再update過, 但入面有一個陰謀, 係PS五年之後既計劃黎, 我一直想知道係咩, 但奈何我一個人既能力, 真係無辦法...所以我有一個請求, 希望你地可以一齊合作, 幫我手入去打爆機, 拎到入面既秘密!」Steve好認真咁講

當時Steve心諗: 其實我都唔知入面有咩, 當初就係知道呢個遊戲係需要過關先得到資訊, 用呢一樣野作為加密...我真係無辦法自己解決到, 但為左完全我既心願, 我一定要咁講, 要你地同我一齊去冒呢個險, 對唔住...

呢一刻我都唔知講咩好, 心入面有好多矛盾

請我返黎做開發定打機嫁? 做研究員又變左做測試員咁奇怪?





「Sword, 我知你一定有好多問題想問! 放心, 我唔會要你咁快入去住, 你熟習基本操作同測試流程先, 之後就到你有機會上埸!」Steve拍一拍我手臂「我知你得!」

其他人既反應, 都係佢地眼入面睇到對Steve既信任

「好! 唔係Steve你執我返黎做測試員, 我到依家可能仲宅係屋企唔肯面對人!」講出呢番說話既人究竟係火火, 睇黎佢既過去都會係一個幾特別既故事

「我好乖嫁~一定會聽Steve哥哥既話」Bobo笑得好甜

其他測試員同Steve對望, 點一點頭

「我會同Andy, Koey maintain個system嫁啦」Suki話

「咁Andy你過一過黎, 你幫我帶一帶Sword去睇下啲野點用」「Suki幫我同班system maintainers講, 下星期一, 我會帶隊入去」「Koey, 帶test team同事去休息室, 準備好下星期再去入」「Sword, 呢一星期快啲上手啦, 下星期要一齊努力!」