[懷舊甜故] 木屋區: 第十五章 - 山泥傾瀉 (二)

街坊正在大嗌, 「走啦明嫂, 好危險呀, 啲山泥仲係咁冧住落黎呀, 走啦!」「嗚嗚嗚….我唔走, 你地快啲搵人幫我入去救吓呀明啦, 呀……救命呀!」
 
呀昌見到咁, 「老豆老媽子, 你地快啲過去扶走個明嫂先!」 講完, 呀昌即時就衝左入去隔離屋度, 「呀昌, 唔好入去呀, 好危險架, 明嫂, 妳快啲起身走先啦, 快啲啦…」 「嗚嗚嗚….我唔走, 我要見到我老公出番黎我先至肯走, 嗚嗚嗚……」
 
屋內, 呀昌正係咁望住明叔會有可能係響邊個位置度, 突然, 咦, 果便好似有隻手掌物體嘅野響啲泥面度突左出黎咁喎, 呀昌即時就大嗌住, 「喂, 明叔響呢度呀, 快啲搵啲人入黎幫手掘泥啦!」 講完, 呀昌就已經衝住過去開始用手挖掘。
 
門外有幾個壯男街坊亦即時衝左入去幫手, 屋外, 妹豬剛剛行到路口聽到消息之後, 已經嚇到即時就向住屋企方向跑去,
 
「媽, 入面點呀?」 「嗚嗚嗚….妳老豆響入面比啲山泥責住左, 呀昌佢地而家入左去…救緊妳老豆呀, 嗚嗚嗚….…..」
 


正心急如焚嘅妹豬兩母女, 已經響屋外出面正喊到收唔倒聲咁滯, 等左一陣, 屋內啲人已經抬住滿身泥濘, 但似係已經昏迷左嘅明叔出黎, 呀昌正在大嗌, 「報左警未呀? 快啲攞啲板黎幫手抬明叔出路口度先啦!」 「呀明…嗚…」 「呀爸…嗚….」
 
警察同白車已經到左村口出面度, 好快, 明叔亦已經被送左入去醫院去……….
 
第二朝, 木屋區大部份地方經已被列為封鎖區, 呀明佢地亦需要登記同暫時安置住響九龍灣啲臨時房屋區度, 是晚, 妹豬同明嫂亦終於番到黎臨屋區處, 老豆問住明嫂, 「呀明叔佢點呀?」
 
明嫂正有啲淚眼同無厘神氣咁同老豆講, 「呀明佢….頭先…已經醒番, 不過隻右腳同隻手就有啲斷骨, 但好彩, 醫生話總算個人都叫做無事!」
 
明嫂望住呀昌, 「呀昌….多謝你….(已經開始喊住)….救番…我個老野!」 豬妹亦都有啲喊住, 「昌哥…鳴…多謝你……」
 


明叔已經住左成個幾星期醫院, 呢一晚, 妹豬收工後正趕番黎臨屋區度, 見佢正大包細包, 又飯壺又呢樣果樣咁出住門口。
 
老媽子見到佢咁, 「妹豬, 妳又要去醫院度探明叔呀? 嘩, 妳一個人攞住咁多野, 一陣間點樣行去搭車呀? 係呢, 妳呀媽係唔係響醫院度陪緊明叔呀?」
 
妹豬呢哂 ha 咁答住, 「光嫂, 呀媽尋日佢番左去大陸度還神, 所以我而家要自己攞啲野去醫院度探呀爸呀!」
 
「但妳有咁多野要攞……, 一陣間妳仲要搭車….呀, 係嘞, 呀昌佢已經番左黎, 不如我就叫呀昌佢幫吓妳手啦, 呀昌……」