夢醒時份: 第八章

「般恩冰，你今日唔好走咁快呀！」沙係佢個位到大叫出黎。

我呆一呆，心裡暗忖：「我今日好似無得罪佢喎！我係咪有咩野未俾佢定做咩要大嗌我全朵呢？」

我偷望沙一下，佢仲係佢個位到做緊野，我望向我最近嘅一位同事，對佢做個口型問：「知唔知咩事？」佢亦只攤開兩手唔清楚。

我只好慢慢收拾自己嘅工作然後靜候一陣沙搵我嘅事。

不消一會，沙走過黎問：「你行得未呀。」我錯愕地望一望佢：「我今日約左你咩？」





沙扁咀啤住我：「唔好扮野！今日係七月嘅邊一日？」

我望一望枱上嘅日曆，就係準備答嘅時候：「啊！乜原來係今日呀！唔好意思，真係唔記得左添。不過，今日應該係我話事喎。」

沙拉住我：「得！食咩你話事，但其他我話事。」

我就咁俾佢扯住走。

我地都係落左銅鑼灣，去左千両。





我：「我揀好左食咩啦。叫個南鰭吞拿兩食，其他個D 你揀啦。」

沙歡喜地話:「好呀！」

我傻傻地問：「你之前唔係讀男女校咩？點解你到而家仲未拍拖？」

沙示意要我等佢食埋舊刺身先答我，見到佢食到谷起塊面個樣好可愛。

沙答道：「好多男仔都好衰，而且我鍾意同我D 女仔朋友一齊，又想專心讀書，所以無拍拖呀。」





我好奇地問：「無人追你咩？」

沙笑著答：「有呀！不過無興趣囉！」

我唔敢再追問落去，然後我地傾左下關於工作上面嘅野。

到上左藍鰭龍船嘅時候，沙主動叫侍應幫我地合照。

沙對住我講：「呢張相証明左有人陪你過同慶祝生日！唔好成日咁自閉唔理自己，淨係諗人地！」

個一刻，我好感動，但我只微微點頭，並無回應一句說話。

到食完走個時，我同沙講：「多謝你呀！你生日我陪返你啦。我知你鍾意睇蝙蝠俠，好快就上畫，你有無興趣同我一齊睇呀？」

沙考慮左一陣：「如果你記得我生日嘅話無問題呀。睇戲.. umm... 放工去睇再食飯會好夜，一係等到星期六、日先去啦。」





我個心跳得好快：「好呀！你邊日得閒我就去買飛啦。」

就由睇蝙蝠俠開始，我同沙就愈走愈近，就只差一句情侶肯定嘅說話。

係睇第一齣戲嘅一日，因為沙有野做未食飯就返屋企換衫再出黎銅鑼灣JP，我唯有暗地裡買定雞蛋仔同格仔餅俾佢入戲院睇。

係睇戲期間，沙依偎落我肩膀，我隻手卻唔敢搭著佢。

到完戲走個時，沙同我講：「你真係好傻好蠢呀，你隻手肯定好攰啦！多謝你嘅細心，雖然D 雞蛋仔淋左，但我都感到你份細心。」

我口窒窒地回應：「你開心就得啦。我係比較遲鈍，希望你唔好計較。」

「唔知你願唔願意同我一齊呢？」





<續>