生化危機下，你會點樣保護你女神？: 第十二章

「我唔係咁既意思呀……我既意思係，你地買既野食根本唔足夠我地長期生存……有冇諗過去超級市場到……拎啲返去？」陳sir嘗試為他的詞彙修正，但還是於事無補。

「行啦。」

不不不，你們完全誤會了。我並不是有著乘火打劫的心態，我只不過認為……

我只是覺得……

咁……人去到呢個地步係咪應該互相幫助先？咁我地依家又係咪好需要幫助先？咁好明顯……我地唔係去偷野，我地……我地只係接受人地既幫助啫！





「喂，你都仲未夠十八歲，做咩放支紅酒入嚟呀？」陳sir正想把我剛放下的紅酒放回櫃上時，我卻出手阻止：「如果你真係咁講道德既，我地就唔會響到出現啦！好彩超級市場冇煙賣，如果唔係我仲唔拎返十幾廿盒返去玩吓！」

說到這時，陳sir也只是眼巴巴的望著我，沒有再說什麼話，也沒有繼續把手上的紅酒放回櫃子裡。

「我……唔係咁既意思呀……」當然，我也知道我的嘴巴有時候還挺傷人的，所以我也立馬道歉。但陳sir還是無動於衷，彷似被點了穴般的站著。

「你覺唔覺……呢到好靜？」原來，陳sir根本沒把我的話放在眼裡，虧我剛剛還在那邊跟他道歉！

不過陳sir所說的話並不是沒他的道理，如果喪屍們真的那麼怕陽光的話，室內的地方的確是他們的天堂。再加上在喪屍爆發之前，超級市場理應有不少人流，不管是人是喪屍，都必定會在這裡出現吧！





「感覺上……唔係好對路，都係快啲走啦！」被陳sir這一道，我便不時覺得有人在暗角裡盯著我們般，很不自在。

「你地係咩人？」幹，果然是一個陷阱。

眼前是一個二十出頭的男子，他裸著上身，顯得一身肌肉。儘管他個子不高，但是從他手中握著的AK47已告訴了我，我們是打不贏他的。

「我地只係普通人，我地唔小心行咗入嚟你地頭，好對唔住！」陳sir面對著機關槍，依舊是不慌不忙的解釋著。

「資源就得咁多，如果每個人都分到啲既話，根本就唔會足夠。唯一既方法就係……」那時，他的機關槍早已瞄準著我：「殺晒啲人，咁啲資源可以足夠分配俾我地。」





我地？

所以是說，這裡還有別的人嗎？看來我們還真是有夠大意的，居然連這點也看不出來，便走進了這死路來。

「你冷靜啲先，你想唔想呢場喪屍爆發一直咁落去？」陳sir微微一笑，看似是有十足把握的。

「你咁講係咩意思？」不只是他，就連我也不太懂陳sir所說的話有什麼含意。

「我會搵出呢場喪屍爆發既源頭，同時我亦會搵到有咩方法可以預防我地都變埋喪屍。」陳sir突然舉起我的手：「證據就係，你依家用槍指緊嗰個人。」

我？你係搵藉口都唔好搵我呀！

「峰，放低槍先。」在呀峰把槍口離開我胸膛的時候，身後忽然多了一個人，從呀峰的反應可見那個人應該便是這裡的首領。

「未請教。」那位首領手持一甁快將喝光的果汁先生，原來只是一位甚至比我還要小的男孩。但從他的老練的語氣和凌厲的眼神卻一點也看不出他是一名小孩。





「我係一個中學老師，叫我陳sir得啦。而我身邊嗰個叫麥俊傑，佢只係一個普通中學生。」如此冷靜的陳sir，令我有種安心的感覺。如果只有我一個的話，恐怕我早已嚇得不成人形，任人魚肉了。

「我叫張森堡，你啱啱話你有辦法可以解決呢場喪屍爆發，係咪真架？」張森堡一步步的走近著我們，個子不高的他，再加上幼稚的臉蛋，實在很難相信呀峰會聽他的話。

「我需要既係時間同埋資源，我手頭上已經有最基本既資料……」陳sir有的沒的說著，聽得張森堡也覺得不耐煩：「唔好講咁多廢話，一句到尾，你係咪肯定你有辦法？」

「係。」

「歡迎加入我地。」