《新居》－粵文短篇小說: 新居（中）
佢見到一隻白兔。係貨真價實嘅白兔，唔係戴住單眼鏡，手執陀錶，身穿禮服，兩腳直立匆匆趕路嘅兔仔。白兔企喺對面馬路，用血紅嘅眼珠注視住阿康。阿康打咗個冷震。白兔嘅神態同眼神話到畀阿康知，呢隻並唔係普通走失咗嘅寵物兔。阿康並唔眼瞓，亦冇食藥飲酒，佢唔認為自己處於換態意識。佢捽一捽眼，再望。兔仔依然喺度，紋風不動，眼神透射出堅毅嘅光芒，似乎唔會咁易放棄。
阿康有兩個選項，一係理，一係唔理掉頭走。不過佢尚未思索之先，身體已經蓄勢待發。喺阿康提起腳嘅半秒之前，白兔搶先一躍，迅如疾風，連跑帶跳，拉開同阿康之間嘅距離。白兔衝過馬路，沿住雲咸道奔馳。阿康緊隨其上。追唔夠幾步，佢見到白兔閃身跳入一間地舖。阿康趕至，舉目一望，上面係塊大型招牌－啞黑嘅表面，透射出「Ori-gin」兩組字嘅白光。阿康右手自動握住門柄，將門拉開。
一陣幽幽涼風向外飄盪，阿康覺得好似有對冰冷嘅玉手輕撫自己面龐咁。呢一下大動作嘅開門，令到舖頭蘊釀以久嘅空氣霎時默止，顧客不約而同轉身擰轉頭，向呢位不速之客投以好奇嘅目光。阿康定一定神，思考𡁵發生咩事。好彩顧客好快對佢失去興趣，店入面嘅時針再次轉動，大家回歸習而為常嘅時間線當中。
Ori-gin入面，燈光暗淡，四周昏昏沉沉，隱約睇見裝潢係以啡黑色為主調。右面有一大埲紅磚牆，左面係一個長方型吧檯。一層交叉網格包圍住吧檯上方。網格中間有幾個大半圓開口，成為接通顧客同調酒師嘅惟一通道。沿住牆邊係一張張方形木紋檯，檯上都放住一杯蠟燭。點點燭光安穩晃動，恰似一個個星系中心; 人係流盪者，被殘弱嘅恆星吸引住，緩緩轉動。
阿康左顧右昐，想尋找白兔嘅蹤影。但係環境昏暗，要搵都唔容易。阿康雖然覺得唔好意思，但係抱住一試無妨嘅心態，行近吧檯，向一身黑色打扮嘅調酒師打聽。
「啊...啊...可能有啲唐突，想問吓啱啱有冇見到一隻白兔入過嚟？」
調酒師似笑非笑，不置可否。
「白兔就冇嘞，Jack Rabbit就有，有冇興趣飲一杯？」
阿康諗返啱啱講嗰句，自己都覺得尷尬難堪。好在調酒師神色溫柔，似乎叫佢不必介懷。阿康拉出其中一張吧檯凳，坐喺上面。
「唔好意思，講埋晒啲奇怪嘢。」
「哈哈，唔緊要，人總會喺某啲關頭見到啲只有自己先睇得見嘅嘢嘅。」調酒師微笑，平和嘅語調帶住友善，一啲批判意味都冇。
阿康諗住還掂本身都想飲酒，𣎴如就索性喺度飲。
「我好少落酒吧飲酒，有冇咩酒推介？」
調酒師喺身後拎咗個菜單。
「我哋呢度有好多唔同款嘅酒㗎喎，你對啲咩有興趣？」
「不如你幫我揀吖。」
「嗯...咁啊，一係The Last Word？酸酸甜甜咁，幾醒神。話唔定幫到你搵你搵𡁵嘅嘢。」
「好吖。」
「嗯，好好好，請你等等，好快過嚟。」遠處有位男士揮手呼叫調酒師。
「我陣間過嚟整畀你。吖，講咗咁耐都未介紹自己㖭，我個名叫Jack，依家暫時喺Ori-gin呢度做𡁵調酒師。」講完之後，Jack步履輕盈咁行過去顧客身邊。
阿康單手托腮，望住面前嘅酒櫃發呆。酒櫃上面有林林總總嘅酒，全部都係阿康唔識嘅。阿康又諗起消失咗嘅嗰張吧檯。其實阿康並唔係真係咁鍾意飲酒。咁點解當初想要張吧檯呢？呢個諗法幾時注入腦入面㗎呢？點解會一直喺心入面縈繞？無論阿康點諗，佢都諗唔起原因，所以就此作罷。頭頂天花喇叭播住音樂，到咗呢一刻阿康先留意到呢件事。Sgt. Pepper's Lonely Hearts Club Band悠然傳入耳中。Hearts係眾數，又點會lonely呢? 阿康失笑，笑自己有咁無聊嘅諗法。
「諗起咩開心嘢?」Jack好似笑面貓咁憑空出現，露出好奇嘅微笑。佢遞過一個酒杯，裡面裝住半透明、淺青色嘅液體。「你嘅The Last Word。不過大家通常飲完呢杯酒，就會開口講the first word㗎喇，哈哈。」Jack打趣咁講。酒吧入面人唔算多，Jack今晚嘅工作尚算輕鬆。
阿康接過杯酒，細心端詳，然後杯邊貼住唇畔，淺嚐咗一啖。一陣酸甜清新嘅涼意流入喉嚨，伴隨住微微嗆喉嘅感覺。
「覺得點？」
「幾好吖。」
「咁就好。」Jack將自己手上杯酒一飲而盡，滿足咁微笑：「呢間酒吧叫Ori-gin，食個gin字，其實即係專做氈酒嘅。你啱啱飲嗰杯The Last Word都係氈酒溝青檸水、蕁麻酒同瑪拉斯奇諾櫻桃酒。本身鍾唔鍾意氈酒？」
「啊...其實之前冇特別飲過。」
「喺咁多種酒之中，我對氈酒情有獨鍾。如果你唔介意嘅話，有冇興趣聽吓我講氈酒嘅故事？」
阿康覺得Jack把聲低沉渾厚、略帶磁性、婉柔跌宕，好似一部歷練嘅低音大提琴一樣，聽落令人舒暢。阿康興趣盎然咁伸出手，做出「請講」嘅手勢。
「我成日都覺得蒸餾酒個英文名好有趣，叫Spirit，靈魂咁話。我都信酒係有唔同嘅靈魂㗎。伏特加太中立、冧酒太甜美、特基拿太孤僻、拔蘭地太老，都係氈酒比較適合我。氈酒同伏特加本來係好似，不過有樣嘢令佢嘅靈魂昇華到另一個層次。有個比喻係我後生嗰陣諗到嘅，或者有啲長篇大論，或者冇乜大不了；但係對我嚟講，佢係我人生一把重要嘅尺。Gin呢個英文名，嚟自荷蘭文嘅jenever。再推上去，字源就係嚟自拉丁文juniperus，亦即係杜松子。juniperus再拆開，就係指『青春』同『萌生』。
Jack斟多杯酒，但係並冇飲到。
「年青係衝動同愚蠢嘅。我曾經衝動到即興飛去東歐歷險，愚蠢到冇預備回程嘅錢；衝動到踏上教堂，愚蠢到傷害兩個愛我嘅人。於是我迫自己學識成熟。我不斷背誦、不斷做、不斷背誦、不斷做，好似預備考公開試咁，最後成功將佢銘記於心。過程當中我又學多咗幾個概念，譬如成熟嘅人要識得『距離』、『理性』同『接受』，好似樹幹同樹枝嘅關係一樣。
「三十歲嗰年，我揀定咗一個籠，準備入去長居，直至老死。我唔係晦氣咁揀，亦唔係求其決定。我係經過多重考慮、細心衡量，最後達到理性嘅結果。好似一個電腦程式咁，輸入幾個參數，經過一堆迴路，輸出某個結果，就係咁。係一種不容置疑、毫無例外嘅肯定。不過呢個究竟係穩重嘅選擇，定只不過係必然嘅因果，我都慢慢分唔清楚。
「嗰排我好鐘意睇魯布·戈德堡機械嘅短片，因為我覺得腦入面都有部差唔多嘅機械。一粒小鋼珠喺起點靜默等待。某個機關被突然觸動。噠。銀色球體接受由引力而嚟嘅加速，沿住既定路徑同規則慢慢轆、一直轆、向下轆。轟轟轟，細細粒鋼珠轆𡁵嘅時候會發出好似野獸沉厚嘅低號，下次你可以留意吓。鋼珠會推郁各種離奇古怪嘅機械，滑輪啊、橡筋啊、紙杯啊、天秤啊、油壓泵啊、法碼啊、火機啊、鎚仔啊、齒輪啊，咩都有。咁終點係咩呢？見證住無數次驗證牛頓定律依然運作嘅碰撞，又係為咩呢？冇㗎。我曾經見過一個機械，經過無數次推推撞撞，最後只係為咗將枝啤酒倒落個杯度。我諗我個腦或者都係咁運作。結果早有定案、軌度早已預設，經過一輪漫長過程，最後只係決定飲唔飲眼前呢一杯酒。哈哈，都幾好笑㗎諗落。
「再過多幾年，我突然諗唔明白，理性咁死有咩意義。如果我憑住理性而生，帶住理性而死，都只不過係一堆粒子碰撞。咁我唔理性咁生，唔理性咁死，都係另一堆粒子、另一個氣球、另一嚿法碼、另一條魚絲；然後達至另一杯酒、另一段感情、另一種遺憾；最後同一種死。咁有咩分別呢？過程當然係有唔同，我知。但係過程唔同，最終嘅結果都係虛無，咁有咩分別呢？可能我真係唔係咁聰明，睇唔到個竅門。哈哈。」
Jack摸一摸後尾枕，靦腆苦笑。佢繼續：
「就係嗰排我愛上咗氈酒。機械繼續運轉，但係零件好似愈嚟愈複雜咁。我開始睇唔穿個過程，不過我清楚個結局係點。我知道自己會放唔低，停咗喺度，一邊衰老，一邊冀昐住七老八十嗰陣會睇得開。但係粒鋼珠已經行到好遠，前面嘅機關早已觸發。係一條單行線，冇得返轉頭。就算時間有所謂物理上嘅對稱，熵都唔容許鋼珠向後倒帶。無論我點思考都好、做咩都好，似乎都只係同一條路、同一個結局。每晚幾杯gin and tonic，幫我短暫解構呢個龐大而無謂嘅機械。
「有一次喺某個聚會度見到佢。佢已經結咗婚幾年，老公係個對佢好好嘅男人，又有一個嬌滴滴嘅女，生活得幸福美滿，呢啲我都知道。或者喺呢一點上，我甚至比佢有更深體會。嗰晚我哋寒喧咗幾句，交換咗聯絡方法。之後間唔中約出嚟飲杯嘢食餐飯傾吓計咁。有幾次仲同埋佢老公出去飲酒㖭。每次見到佢，我都會諗，或者粒鋼珠可以轆去另一個站、觸發另一啲機關、去到另一個終點呢？但係每當我靜落嚟，理性咁分析，循住機械嘅機理同法則去推斷，我就知道前面其實不過係同一條路，都係冇彎轉。假如我打算做任何例外嘅嘢，我就必定係個不折不扣嘅蠢才，又係個不負責任嘅賤人。係冇得返轉頭。
「有一晚，當我放工返到屋企，屋企四周圍籠罩住厚沉嘅悶意。呢陣悶意伸手可及，仿佛當我掄手一撥，萬千旋渦會將我捲入更深更渾沌嘅迷霧裡面。我悶到發癲，坐立不安。想搵啲嘢做，又咩野都唔做。霧霾將成間屋佔據，無論我行到邊、做乜嘢，嗰陣令人窒息嘅空氣都絲毫冇減退嘅跡象。我無路可退，於是就斟咗杯gin and tonic。」
Jack稍作停頓，若有所思，好似喺雜亂無常嘅廢墟當中搵𡁵珍重之物一樣。佢將手上杯酒一飲而盡。
「唔記得係五杯定十杯定廿杯落咗肚之後，我以為會醉，再順理成章咁匿入夢境。點知嗰晚愈飲，個腦竟然愈嚟愈澄明。每一啖都好似幫𡁵隻錶上鏈咁。但係分針秒針並唔係順時針咁轉，而係逆時針轉。睇住一圈又一圈，我就諗返起舊時。我諗返起年青係衝動同愚蠢。就喺嗰一刻，有把聲喺我耳邊響起：『邊個話衝動一定係愚蠢呢？』我先至發覺呢個係自己一直以嚟嘅前設。我從來都係將兩者視為對等，確信不疑。只不過，假如我衝動走去東歐，但係又帶夠錢呢？假如我衝動步入禮堂，但又冇傷害人呢？『邊個話衝動一定係愚蠢呢？』衝動幾時成為咗愚蠢嘅替死鬼？
「我隱約感覺到有啲嘢正喺度滲透全身，由天花板、地板、酒杯、檯燈、窗口、大門，四面八方，緩緩擴散，用不規則嘅邊界，將我包圍，將我框住，一點一滴咁滲過嚟。佢一時好似日冕嘅火舌，伸手過嚟挑釁我；一時又好似羅馬軍隊嘅龜甲陣，一面銅牆鐵壁向住我緩緩推進。佢好似無形但高密度嘅氣體，逐漸將霧霾取替，步步進逼，要用我身上嘅七竅同毛孔鑽入體內。我並唔係講𡁵比喻。當時身體真係有種異樣嘅感覺，喺度蘊釀𡁵一種能量咁。
「我本身想掙扎，但係每一吋肌肉都好似畀人換成鉛塊咁，完全出唔到力。眼前畫面突然變成舊式電視畫面，先係一陣雪花，然後倏然一閃，全部變黑。一點白光喺屏幕中心發出臨死嘅信號，一瞬閃動，最後歸於暗淡。隔多一陣，畫面又突然打開，影住一個白色背景，同Matrix嘅某一幕差唔多。你有冇睇過Matrix？」
阿康答話：「有啊。」
「係嘞，就係嗰種空白、空無一物嘅感覺。鏡頭慢慢擺向左，影住一個男人嘅背面。男人面前係一座巨大嘅魯布·戈德堡機械，好似怪獸一樣，蜷伏喺地面。男人面前有一條紅線，紅線將佢同機械隔開。我睇唔見男人嘅表情，不過佢似乎專心致志觀察𡁵機械嘅運作。楓木製成嘅零件各安其位被安放喺唔同部份。大小不一嘅齒輪好似一朵朵轉動嘅花，蝸桿轉軸將轉動力矩輸出，傳遞至遠方另一處花瓣。粗鐵枝被扭成羊腸九曲嘅軌道，化身成一條長蚯蚓，左穿右插，四通八達。蒸氣機關吞雲吐霧嘅節奏，同竹制鹿威敲落石頭嘅脆響同步化為一體。督...督...督...。附近兩枝電桿劃出耀眼嘅紫色電弧，點燃由滑輪懸垂嘅火把。辦公室水機噴出潺潺清水，竹水道將流水引導至一個大水輪。大水輪上面有塊哈哈鏡，鏡入面嘅世界變幻無常。帶有磁力嘅鐵球轆到去一塊木柱林立嘅斜平面，仿如走入寒冬之下光禿禿嘅樹林一樣。鐵球跌跌撞撞，以不規則嘅路線曲折前行。斜平面之上舖咗塊纖薄嘅木紋膠板，膠板上面放咗無數隻腳底鑲有磁石嘅木馬。當磁鐵球喺木馬腳下經過，木馬就被賦與一閃即逝嘅生命，喺佢短促一生之間，恣意奔馳。七彩琉璃珠沿住賽道奔跑，幻彩絢麗，紛紛亂亂。去到終點，一粒粒琉璃珠整齊排列，機關將暗門依次開啟，每次只係畀一粒穿過，將琉璃珠導入透明玻璃管道，送去遠方不知名地方。立體聲低音喇叭嘅振膜強烈震動，卻聽唔到音樂。四葉式風車平穩轉動，但唔覺有風。一道實木門交替開合，但係睇唔出當中嘅意義。一面魚旗好似凋謝嘅植物咁，頹然下垂。
「男人不發一言，依然細心觀察。佢個頭有時緩緩移動，好似跟住某樣物件嘅移動路徑咁。有時突然放棄追蹤，抬高頭將視線隨機擲去另一個坐標之上。間唔中又會見佢膊頭一起一伏，似係深深嘆一口氣。有時磨拳擦掌，表現得心急如焚。仰首俯首，左顧右盼，踱步停步，蹀躞不下；男人應該係搵𡁵某樣嘢。
「呢個畫面維持咗十幾分鐘。我係出唔到聲嘅旁觀者，只可以默默觀察。之後突然見佢伸手一指，手舞足蹈，膊頭抖動，好似喺度開懷大笑咁。似乎已經搵到要搵嘅嘢。下一刻，男人挺直腰，莊嚴咁提起腳，堅定咁跨過紅線。開始倒數計時。
「男人毫不猶疑，向住機械某一點邁步。鏡頭緊隨住男人嘅身影移動。六十秒。男人以不急不徐嘅步速接近機械。機械似乎都留意到男人嘅動靜，提高警覺。督督聲響得更加頻密。男人到達機械底部，身邊密集嘅齒輪好似千萬隻老鼠吱吱叫。四十五秒。男人仔細端詳佈滿古靈精怪零件嘅牆壁，好快就搵度兩塊白色麻布。麻布釘喺一個木框上面。木框就係出入口，大細僅僅足夠一人爬過。男人掀開白布，烏低身穿過木框。不過鏡頭過唔到去，所以當白布再次冚埋，男人就從眼前消失。鏡頭急速拉後。我見到機械氣急敗壞咁運轉。一下一下嘅督督聲匯聚成一聲長響。曲柄同活塞快速抽插，鋼面上泛起淡淡紅光。琉璃珠前仆後繼堆湧上前，由賽道傾瀉而出，散逸喺下一層水泥平台，噠噠作響。齒輪高速旋轉，似乎就快頂唔順，抖動晃動，發出𠺝嘞𠺝嘞嘅呼叫聲。成座機械猛烈搖動，驟眼睇好似抖顫一樣。三十秒。
「嚓一聲，鏡頭一轉，我睇見某個閉路電視嘅影像，畫面顯示住白布遮蔽嘅空間。男人亦都喺影像入面，不過依然淨係睇到背面。閉路電視影像質素非常之差，但係好彩仲睇得見房入面嘅情況。間房四四正正，係一個正立方體。四面牆、地板同天花都舖咗比外面更密質質嘅齒輪同路軌。所有零件快速運作，睇落好似腸壁蠕動一樣。房間中心放咗一張三腳圓檯，檯上面有隻晶瑩剔透嘅酒杯。天花板中心有一個細窿，細窿駁住一條鐵線織成嘅管道。管道好似莽蛇一樣盤旋向下，對住一個木制。木制瞄準住一條橡筋，橡筋扯實一隻楓木造嘅旋臂，旋臂尖端鑲住一個銅制實驗鉗，鉗嘅內側有兩塊白色軟膠，軟膠夾住嘅係一枝直立嘅”The Botanist”。似乎只要觸動適當機關，旋臂就會傾側酒樽，將清澈無色嘅氈酒傾注落酒杯入面。呢度應該就係終點。二十秒。
「男人直行到房中心。垂吊落嚟嘅管道毫無動靜，似乎粒鋼珠有排都未嚟到。男人右手握實樽頸，嘗試將佢扯出嚟。不過銅爪同佢鬥力，死都唔肯放手。男人好似冇預料到對手會有此一著，神態同動作睇落有啲急躁。十五秒。男人發覺鬥力都唔係辦法，所以鬆開手。佢突然靈機一觸，一手搶起酒杯，用力向下掟。酒杯失去本來嘅形態，化身成碎片，散落周圍。男人執起一塊銳利碎片，對準軟膠部位，快速前後鋸動。十秒。軟膠出現一個小缺口，男人繼續用力將佢𠝹開。五秒。男人雙手緊握樽頸，扎穩馬步。四秒。男人出力拉扯，手臂壯如岩石。三秒。酒樽由缺口突破而出。兩秒。男人將樽口對準喉嚨，酒水好似缺堤一樣湧入體內，直至喺咀角滿瀉出嚟。一秒。男人瀟灑咁將酒樽抌落地，酒樽瞬間裂成兩半。男人面對鏡頭，面上帶住勝利嘅微笑。
「就喺嗰一剎那，所有零件突然停頓，一切噪音霎時靜止；仿佛機械覺得驚訝愕然，冇預計到結局居然係咁。下一秒，機械崩裂，化成灰塵，傾倒下墜，灰飛煙滅。轟隆轟隆，砰拎硼爛。閉路電視訊號斷裂，鏡頭轉換到原先嘅畫面。龐大嘅機械四分五裂，零件各以唔同速率轉化成微粒，塵雨灑落地下，物件失去既有形態，傳出雜亂無章嘅白色噪音，所有訊號失去意義，熵值提升至最高。最後，剩低落嚟嘅，就只係一個灰黑色嘅土丘，孤零零咁存在喺白茫茫嘅空白之中。而嗰個男人，原來就係年輕時嘅我。
「成個畫面突然急劇變細。土丘變成黑色一點，白色畫面縮細成一個小方格。影像繼續遠離，成為小光點，喺漆黑嘅屏幕中心發出垂死嘅光芒。最後，白點歸於暗淡，屏幕漆黑一片。鏡面屏幕反照出我自己。我瞓咗喺梳化度。
「我望出窗，一片黑暗，不過遠方隱約泛起深邃藍色。我睇一睇電話，原來已經係凌晨五點幾。我斟咗杯酒，灌落肚，然後換衫出發。我決定好要做一件愚蠢嘅事。我仲記得落到街，天氣清爽，萬物寧靜，間唔中聽到班鳩咕咕啼叫、同埋馬路上稀疏嘅引擘聲。我覺得成個人輕鬆舒暢。一路行，我喺度諗：我準備做一件又衝動又愚蠢嘅事，咁係咪代表我年輕呢？不過身體嘅腰酸背痛幫我解答咗呢個問題。我又諗，咁我同後生嘅自己有咩分別呢？以前我愚蠢，但不自知；而家我明知愚蠢，但依然去做。咁代表啲乜？或者可以咁講，後生嘅我係個無能嘅結果主義者，嗰一日嘅我，係一個刻意嘅蠢材，要從愚蠢抉擇之中發掘出賴以維生嘅人生意義。
「我去到佢屋企樓下，嗰陣七點都未夠。我打畀佢，電話入面聽得見佢滿腹疑惑，一頭霧水。我問佢可唔可以出一出門口，落一落嚟，我有嘢想同佢講。佢先係沉默咗幾秒，然後支吾咗幾句，最後都答應咗我嘅請求。佢話要稍為梳洗一吓先。我喺樓下等，諗𡁵結局會係點。冇耐就見到佢著住灰色T Shirt、白色短褲，一臉狐疑咁望住我，急步行過嚟。佢老公喺佢背後，用奇異同充滿戒心嘅目光打量住我。
「我同佢講：『我知道你會覺得好荒謬同離譜。但係我想話你知同你分開之後其實我一直都放唔低。會唔會有一個機會，我哋可以重新嚟過？』我直望住佢，見到佢由狐疑變成混亂，由混亂變成驚慌，一面蒼白。『痴線㗎？』佢擰轉頭望一望老公，面上係帶住咩神情我睇唔到。下一刻我就見到佢老公面如死灰，金剛怒目，大步向前，將老婆拉去自己後面，向住我大喝：『咪搞我老婆！』話口未完，佢已揮動拳頭，指骨硬班班咁打落我塊面度。
「我成個人仆咗落地，好鬼狼狽。之後論論盡盡咁企返起身，單手撳實鼻樑，防止鼻血噴灑出嚟。另一隻手做出抱歉嘅姿勢。『咁樣嚇親你哋，唔好意思。多謝你哋，我以後都唔會再嚟打搞㗎喇。』我擰轉身，面上不由自主咁露出勝利嘅笑容，好似年輕嘅嗰位自己一樣。我流住鼻血笑住走，十足十個傻仔咁，但係心情無比自由舒暢。之後我就再冇同佢見過面喇。另外，我都順便辭咗份朝九晚八嘅工，邊打散工，邊學調酒。後來不知不覺之間，調酒師就已經成為咗我嘅工作同身份。」
Jack已經講完，阿康卻有短暫一刻無法理解呢一點。佢呆咗幾秒，思緒仍然停喺奇幻嘅畫面上。大家有幾秒靜默。然後阿康恍然大悟，碌大對眼望實Jack。
「吓？成件事係真事嚟㗎？」
「睇你點介定為真？」
「我係指嗰啲奇怪感覺啊、電視影像啊、咩機械啊、去搵返你前妻啊之類嗰啲。」
「唔...我諗同你見到白兔一樣咁真啩。」
Jack嘴角上揚，展現一絲同情嘅微笑。阿康仍然未收返難以置信嘅表情。或者係頭先聽得太入神，又或者係酒吧入面空氣頗乾燥，阿康喉嚨乾裂難受，於是佢拎起酒杯，呷咗一啖。
「你有冇諗過，如果萬一佢話同你喺返埋一齊，咁你會點？」
「唔..我一直都係打定輸數。不過如果佢真係咁講，我諗我會當場拒絕佢，叫佢負返應負嘅責任啩。」
「你份人真係得意。」
Jack露出神秘嘅笑容。
「等我整多杯畀你啦。呢杯我請嘅，要你聽我講咁耐嘢。」
然後Jack就好似識得隱身咁，退到黑暗之中消失。
於是得返阿康一個。佢一邊飲住酒，一邊諗返Jack所講嘅故事。就好似一首歌入咗腦咁，呢個故事都一樣縈擾不散。Jack似乎有唔少客人要應付，所以冇乜時間再去理阿康。阿康坐喺吧檯邊，一杯又一杯，好似一部機械咁，無意識按照程序處理呢一連串嘅動作。
唔知幾時開始，酒吧播放住日本舊曲。耳邊響起結他撥弦聲同埋一把溫柔嘅嗓音，歌名叫《青春之影》。捕風捉影。或者自己都捉𡁵影，阿康心諗。大門嘅玻璃容讓街燈隨意穿透，Welcome一字反轉印喺酒吧木地面。阿康雙眼凝視出口。仿佛自己入咗嚟之後，就冇人再推開過呢度大門。嗯，自己又幾時走好呢？
佢再望一望地下反轉咗嘅welcome，發覺同之前有少少唔同。有一個小黑影。阿康視線向上移，好快就同一對鮮紅色嘅眼對上。白兔安靜坐喺門外，石像一樣，眼神堅定直視阿康。阿康即刻叫Jack過嚟埋單。
「呢度唔洗找。」
阿康二話不說，想立即奪門而出。當佢向門口再望，白兔已經失去蹤影。不過喺下一刻，佢見到一幕比起白兔、比起舊式電視、比起魯布·戈德堡機械更難相信嘅畫面。佢見到阿琦喺門外經過，有個男人喺佢隔籬，拖住佢隻手。