《我竟然同左一個陌生男仔去歐遊...》: 《波蘭篇- 克拉科夫 Kraków (1.3)》

第二日既朝早，我起身後轉身望過房間另一邊既單人床。

依然係空無一人。

琴晚就好似食左安眠藥一樣，整個人睡在床上，一分鐘就已經進入夢鄉，對我黎講應該係難得一遇既情況。

正正係因為進入熟睡狀態，我唔知道Nick幾點返左黎，或者有冇返過黎，定係好早好早就起身出門，反正我自從琴日晏晝出門後，就冇再見過佢。

我諗，佢咁識照顧自己，應該唔會出左咩意外，只係，有衝動想知佢喺邊。





不過當初又係自己提出話唔好問大家去邊，就無謂打倒昨天的自己。

琴晚上網睇既時候，Auschwitz既門票已經被預定到下個月，心頭即刻一緊，如果黎到Krakow，卻無法去到集中營，應該會係一大遺憾。

最後決定，點樣都要去博一次機會。

***

由Krakow到Auschwitz，需要到市中心既一個小型車站，嗰度有一架貨van定時出發。





其實一開始都心存懷疑，因為貨van比我既感覺，就好似被帶去賣豬仔。

若非連車站既工作人員指示我去，我大概唔會夠膽自己一個女仔上呢架車。

猶記得當日落著細雨，坐在靠窗旁既我，聽住外面既雨聲，特別容易訓著。

車程大概一個多小時，但我幾乎訓足全程，到司機話到達目的地時先即刻扎醒。

落車後需要行幾分鐘既路程，途中有路牌指示到Auschwitz既方向。







到真正去到集中營前，已經看到人潮湧湧，等著排隊進入。

由於參觀人數眾多，所以大部分人都會預先上網訂好時段先黎。為左控制人潮，嗰度有個規定，由早上十點到下午三點都一定要參與團體導覽，唔可以單人入去。

我去到售票處，喜出望外地發現四十五分鐘後既英文導覽團尚有空位，就即刻二話不說地買左門票，所以最後幸運地，沒有浪費我千里迢迢既一場到訪。

趁仲有時間，我到入口前寫滿左集中營歷史既資訊板，上面記載左好多當時集中營既囚犯，包括最著名既Anne Frank。



驗票時需要經過嚴格既安檢，隨身行李都要寄存於櫃檯，所以只能手拿著相機入去。

開始導覽前，可以到一間播放室觀看一段大約十分鐘既短片，簡單介紹左二戰時期波蘭被納粹侵佔同興建集中營既歷史。





希特勒統治波蘭期間，喺各處興建大大小小既集中營，原先係為左收納戰俘，後來納粹德國通過左「最後解決方案」（Final Resolution），呢一場人類史上最殘忍既種族滅絕計畫就正式開始。