《我竟然同左一個陌生男仔去歐遊...》: 《波蘭篇- 克拉科夫 Kraków (1.2)》
我孤身一人跑來了Oskar Schindler Enamelled Factory，只看名字可能會覺得毫無頭緒，但若果我提起《辛德勒的名單/Schindler’s List》呢套電影，應該就能喚起大家對Oskar Schindler既印象。
一個德國商人，二戰時期本想趁機靠戰爭發不義之財，黎到Kraków開設工場，只聘請薪金最低既猶太人。
後來當辛德勒親眼目睹當時既納粹軍係如何殘忍地避害猶太人時，決定要親手拯救佢地，列左一張工人名單黎避免佢地被送去集中營。
最終呢張名單上面既1200名工人全部都被安全移送，免收納粹軍屠殺，但佢本人卻因為呢件事而傾家蕩產，去世時雖然身無分文，但得到永世流芳，係近代史上我最為尊敬既一個人。
工廠位於一個叫Podgórze，偏離市中心既地區，周圍既環境非常破舊，似一個尚未開發既貧民窟，而且位置隱密。
如果唔係事前搜集清楚，我應該唔會諗到呢個鳥不生蛋既地方就係景點既所在地。所以我成功搵到呢個地方，都確實係一件頗為值得自豪既事。
畢竟過去一個月，我都只係不斷跟隨住Nick既步伐，或者佢講得啱，我要學識與自己相處，反正這本應就是一次一個人的旅行。
冇睇過《Schindler’s List》，或者對Oskar Schindler唔熟悉既人，未必會有意欲專程走過黎，始終呢度完全冇任何迷人既景色，只係對我黎講有特殊意義。
當時我睇到電影既結尾時，我記得辛德勒還自責自己點解唔賣出更多既家當，去拯救更多既人，Liam Neeson既精湛演技，令甚少睇電影會喊既我都忍不住淚流滿面，絕對係其中一套最能令我深受感動既電影。
當初的工廠名牌早已被拆除
工廠最後被改建為博物館，所以並非好多人所想係還原左電影裏面工廠既原型，但博物館裏有大量關於二戰時期波蘭被納粹德軍佔領期間既資料，重現當時猶太人被迫害既生活，望著一張張真實存在過既「身份證」，就好似回到電影裏佢地被黨衛隊逐個逐個核對身份時既場景。
辛德勒既工廠，對當時既猶太工人黎講已經係一個不可奢求既天堂，雖然當時佢地所有工資都要上繳納粹軍，但因為辛德勒不但提供佢地三餐溫飽，而且允許佢地保留傳統猶太習俗。
確實，辛德勒作為一個絕頂聰明同善於交際既商人，原意只係為左一己私欲，賺一輩子都花不完既錢財。
目的達成了，但良知戰勝左佢既貪欲，最後寧願犧牲自己一生所賺到既名利，拯救左一千二百條生命，同佢地既後代，但佢最終拯救既，遠遠多於此。
“Whoever saves one life, saves the world entire.”
在漸催腐敗既現代社會，即使納粹軍已不復在，但貪念同對權力既渴望永遠都會係人類既一種特性。
可惜，大概很難很難，再有像辛德勒般的人能拯救這世界了。
***
喺辛德勒工廠既旁邊，仲有一間現代藝術博物館（MOCAK Museum），都係由工廠原址改建而成。
我當時見尚有時間，而且入場費非常平，就打算一場黎到，不妨都參觀埋。
入面展示左好多Contemporary Art 藝術品，但離閉館時間不遠，我無法詳細去睇每一件千奇百怪既展品。
喺準備離開之際，我被卻一段名為《80064》既影片吸引左，當時博物館內既人已經所剩無幾，我戴起耳機，靜靜睇呢一條影片。
影片只有十分鐘左右，卻非常沉重。
80064，係屬於一個二戰猶太倖存者，當時被送到Auschwitz集中營時被刺上既編號。
佢依家年事已高，但一個紋身師主動提出為佢將編號刺青還原。
老人答應左，但呢個行為令到好多人都不解，點解佢要將一段人生入面最痛苦既經歷，再清楚地呈現喺自己眼前？
訪問期間，老人被問到，佢對呢個編號既感覺，佢既回答係：
“Do I like it? I never liked it because I could not like it, it was made in such circumstances… and for such reasons.“
到最後願意將呢個編號再次刻上自己既手，所需既勇氣並非常人能想像。
連一段十分鐘既影片都能令我眼角沾濕，我無法預想當我親身去到集中營時，所感受到既情緒會有幾沉重。
好多人會選擇逃避人生入面既陰影部分，但老人卻選擇大膽地面對自己最黑暗既時期，或者咁樣先真正代表佢能克服自身。
***
我趁住天色未黑前，就到左猶太區（Kazimierz）一逛，呢度相對起我從民宿一路走過來經過既老城區冷清得多。
周圍冇老城區令人目不轉睛既華麗建築，只有破敗平凡既舊建築物，卻顯得更有真實感，更能貼近同瞭解波蘭猶太人既生活，呢啲係一般景點唔會比到我既體驗。
我當日既晚餐，係一種捷克食物，但唔記得係乜黎
由於昨晚徹夜無眠，體力已耗支得七七八八，打算返到民宿就立刻沖涼訓教，預備聽日早起到集中營參觀。
回到房間，Nick已經唔喺度，大概係我出門冇耐後，佢都出左去。
以前臨訓前，佢總會與我談天說地一番，再亂發一篇佛經，話等我可以安心入眠，而佢永遠都比我早訓著。
整整一個月黎，我地幾乎都出雙入對，眨眼間卻突然只剩低我一人，好不習慣。
而嗰一晚，我冇再收到Nick既晚安訊息。