《我竟然同左一個陌生男仔去歐遊...》: 《比利時篇- 布魯日 Bruges (2.2)》
朝早酒吧當然未開始營業，但即使平時喺嗰度倒酒調酒既職員，都要準備好早餐比客人。
Bruges果然與眾不同，連人睇落去都好似有吸引力啲。
年輕帥氣既bartender同我地傾計既同時，比左一張free walking tour既傳單我地，出發點係距離呢度十五分鐘既另一間Hostel。
雖然經過左上次沉悶既歷史考察團，對呢種tour都存有少少猶疑，但係我相信Bruges會比到我地一種截然不同既經驗，而且夜晚就要起程返翻去Brussels搭機，所以把握埋唯一一次既機會。
因為黎開始既時間仲有一兩個鐘，所以我地將早餐慢慢咁不留殘渣地食完，先上返房慢條斯理地準備。
踏出Hostel，我第一次見到陽光下既布魯日，遊客都開始出發到處參觀。
我地照著帥氣Bartender比我地既地圖，佢細心劃上不同既記號，令我地不花吹灰之力就搵到一間叫Charlie Rockets既Hostel（我十分喜歡這個名字），即係Tour既出發點。
入到去，就好似一間普通酒吧咁，卻不見有人影，我地睇多次Hostel個名，對一對張地圖，明明就冇去錯地方。
行過去bar臺，問左抹緊酒杯既職員，佢話呢度的確係出發點，不過只係其他人未到，就叫我地隨便搵個位置坐低。
「洗唔洗嗌返杯野飲先啊，酒鬼？」Ｎick好似將酒同我劃上等號一樣。
「唔好傻啦，我唔會朝早飲酒架。」
話音剛落，就有一個穿著橙色背心外套既女仔走過黎：
「Hey! Are you guys here for the walking tour? 」
「Yes, we are, are you here for the tour as well? 」
「Fun fact, I am actually the tour guide! Welcome! 」
面前呢位笑容滿面既年輕女子，叫做Rebecca，佢既英文非常流利，一問之下，原來佢本身係愛爾蘭人，不過已經喺Bruges住左十年。
作為一位導遊，佢當然非常健談，喺等候其他遊客既時候，佢不斷同我地分享佢黎到Bruges既經歷，話當初第一次黎到呢度旅行，就愛上左呢個與世無爭既城市，之後就過左黎讀書，最後仲定居喺度。
喺嗰度聚集既人慢慢地增多，有啲仲係嗰間Hostel既住客，應該多數都係黎參加呢個Walking Tour。
集齊足夠既人數後，Rebecca就帶隊出發。
嗰度離舊城區只需行三分鐘左右，果然日頭既布魯日比起琴晚，有生氣得多。
喺Brussels遇過最差既導遊；但就喺Bruges搵到最好既導遊。
即使同樣在簡介城市既歷史，Rebecca亦描述得生動得多，大概導遊都係一種需要靠依靠天份既職業。
Bruges喺荷蘭語原本既意思，係解作一道橋，所以都唔難睇到運河喺市中心穿梭，好多建築物都係倚著運河而建，原來Bruges有一個別名，就係「北方威尼斯」（因為位於歐洲北部），我頓時覺得一圓當初冇去到威尼斯既遺憾。
同時布魯日亦都係現今歐洲保留得最好既中世纪城市，喺戰火彌漫得最嚴重既時候，布魯日卻幸運地沒有被摧殘多少，所以好多古舊既建築先得以保存下來。
當初走在佛羅倫斯既街道，已經有種誤闖古城既感覺；黎到布魯日，更彷如真的置身於中世紀時期內。
行到黎Market Square，即係我地前一晚已經去過既地方，但第二次黎到先注意到廣場一旁被塗上不同顏色既山形小屋，底層都係餐點同一啲小商店，整排望過去甚有特色。
而廣場內都有好多為觀光客而設既馬車，價錢不菲，但捨得花錢既話，應該都可以金錢換黎一次古代既皇室體驗。
環觀整個廣場，無法被錯過的，就當然係嗰一座令我摸不著頭腦既鐘樓。
Rebecca開始重點介紹呢座鐘樓（Belfort），係布魯日最重要既地標之一，喺某一套電影會時常見到佢既蹤影，而嗰套電影，就係《In Bruges》。
我驀地想起：「原來係In Bruges！」
有冇電影迷睇過呢一套電影？係一套關於兩個愛爾蘭殺手既黑色幽默片，劇情就唔詳細講，有興趣可以去睇下，幾有深度既一套戲。
聽完Rebecca講，終於諗起自己幾年前其實睇過呢套電影，只係印象唔係特別深刻。原來Bruges對我黎講都唔係一個完全陌生既名字，怪唔知得琴晚望住個鐘樓，有種似曾相識既感覺。
“I didn’t even know where Bruges fucking was.”
“It’s in Belgium.”
“Bruges is a shithole.”
“Bruges is not a shithole.”
“We’ve just got off the fucking train.”
這是電影開始的頭幾句對白，睇嗰陣都唔覺布魯日有幾靚，加上男主角由頭到尾（因為好多因素）都非常討厭呢個地方，但當我親身黎到時，可以肯定，Bruges is not a shithole.
