【少少甜】扑野扑得你心碎: 二十一

我返到公司，岩行入門口，Lucy就沖埋黎屌鳩我。
 
「乜事呀你！放隻貓響度，你無撚野下話。」Lucy十分勞氣，「呢隻貓周圍屙屎屙尿，我張個Keyboard全部成陣貓尿味呀屌你。」
 
「我……」個「我」字都無講完，Lucy就一句彈埋黎：「我未講完，尿呢d都少事，最仆街係d屎呀！你返黎聞唔問到呀，成個office都係貓屎味，我返黎唔為意就踩左屎呀！頂你個肺！你下次帶d野返來可唔可以征詢過我先呀！」
 
「得，唔好意思，對唔住，係我錯，唔好意思，係我唔岩，sorry，Lucy姐。」我扮曬死狗道歉，費事解釋咁多免得火上加油。
 
「仲有呀！頂你，琴日我返屋企有兩條乜春CID響我樓下，仲行埋黎聲大大咁警告我叫我唔好插手查單野！係咪你條仆街爆我屋企地址出黎？」
 




「下，係咪一個有戴口罩一個無戴口罩？」我問。
 
「唔好岔開話題！我問你係咪你爆我地址出黎呀？」
 
「無呀！頂你！佢地係差佬要搵我地個地址有幾難呀！」我說，「唔好講呢d住，你有無睇今日新聞？」
 
「睇左啦。」
 
「你點睇呀？」我問。
 




「班差佬今次又求其搵個替死鬼交差，兇手另有其人。」Lucy言之鑿鑿。
 
「唔係掛？你又知？我頭先睇左下新聞，佢地好似搵曬證據指控個疑犯喔。」
 
「證據都可以係假既，真正既兇手我已經知道左。」Lucy露出詭異的微笑。
 
「你知道邊個係兇手？唔通係果個溫泉中心d人做既？」
 
「錯！錯曬！」Lucy從裝住部分黃麗麗遺物既箱拎出一張CD，指出封面上五條友講：「兇手係佢地。」
 




瘋狂的橙？
 
對band叫做Crazy Orange，專輯名叫瘋狂的橙。
 
「下？」我滿腦問號。
 
「無錯，兇手就係呢班band仔！」一把奇怪既男人聲傳來，我望下周圍，只見琴晚帶返黎既橙貓從地板一躍跳上檯面，仲開口講野：「Lucy，你d貓糧唔係好岩我，都係午餐肉好食d。」
 
點解，隻貓會識講野？