【少少甜】扑野扑得你心碎: 二十

夜晚十一點。
 
由朝早兩點搵完貓，跟住去深水埗再去元朗，再出返九龍，搞完一大輪返到公司，將從黎生屋企帶返黎既黃麗麗生前部分遺物、儲藏黃麗麗社交網站所有對話記錄既USB同埋一隻橙貓放抵響公司，依家攰到仆街既我終於可以返屋企順便食個dinner 了。
 
落到樓下諗住行過兩個街口去茶記食個飯醫下肚子，殊不知行到中途有兩條友截停左我。
 
「你就係張立生？」其中一個戴住口罩，著住黑色襯衫既男人問我。
 
「係呀。」我答。
 




「我地係CID。」另一個著住藍色外套，無戴口罩既男人展示佢既證件，「我地黎呢，就係提下你，唔好咁多事，唔關你事既唔好查。」
 
我心諗佢嗡乜春呀？
 
「阿sir依家同你講野，你聽到就答人啦！」口罩佬隔住個口罩聲大夾惡咁講。
 
我一時三刻唔識俾反應，答佢：「阿sir我唔明你講乜喔？」
 
「既係，依家，我地要求你，停止調查你手上既案件，明唔明？」藍色衫自稱CID既男人擺曬款。
 




「咁…阿sir，我地呢d偵探仔同你地差唔多都係靠查野搵食架喔。咁……」
 
「咁乜撚野！講埋咁多廢話，阿sir叫你唔好查就唔好查啦！」口罩佬露出兇狠既眼神。
 
我正要開口反駁佢，藍色衫阿sir撥開一邊衫角露出掛在腰間既手槍，佢對我說：「喂，兄弟，俾下面啦，幫幫忙，唔好再插手果單野，得唔得，唔係我地呢邊都好難做。」
 
我見佢出到槍黎威嚇，成個黑社會咁，心底除左鄙視仲有點不忿。
 
我點點頭答應：「好，你做到咁，你點話點好咯。」
 




「記住呀！渠頭，唔好再查呀！」口罩佬指住我個頭大聲講，「如果唔係到時唔好怪阿sir唔客氣！」
 
講完佢地兩個就走左。
 
我見佢地上車離開左，立即WhatsApp左Lucy問佢今日有無奇怪既人黎搵過佢，跟手我就繼續行去茶記搵野食醫肚，將頭先兩條疑似差佬講既野放埋一邊。

第二日朝早，我打開電視，見到新聞，記者報道話警察於今日早上六點鐘響深水埗一個唐樓單位拘捕一個年約三十歲疑兇，懷疑佢同早前兩單全裸女棄屍案有關，現扣留疑犯等待進一步調查。
 
Oh, no! Seriously?