自從住咗hall先知，扑野原來可以咁簡單: 《十、404 not found 》10.4
呢日我唔洗返工，廢青無野做梗係打牌。
呢個係我入咗hall最常做既事之一。
「碰隻先。喂Kate，阿信呢？」講緊野既係晴晴，同之前都有一齊打牌既Kenny一樣都係我啲牌腳黎，佢地呢pair情侶成日搵我做佢地電燈膽，我地都因為咁所以好熟。
「下，我點知呀。」我打咗隻牌出去。我無諗過佢會咁樣問，因為我無話佢知我同呀信啲野。
「你唔知？你地呢排行得好埋喎。」Kenny奸笑，好似想chok我咁。
「咩呀，邊有呀，你聽邊個講架。」我若無其事咁繼續打牌。
「唔洗扮野啦，我話哂都係老鬼黎，hall呢就無秘密既。」Kenny好似預咗我唔會講咁，一臉從容咁望住我講。
「咁你知啲咩呀下，懶醒。」
「知你地好似有啲野囉，點姐點姐，扑咗未？」晴晴搶住答。
「痴線，你地就扑咗。」我個心雖然好虛，但都即刻否認咗先，呢樣野我係點都唔會講既。
「哦，呢個就基本啦。」Kenny大笑咗一下，之後反牌，屌，係我出統。
「食呀，清對無花，爆棚呀！叫咗你睇路架啦，仲打索子。」佢好開心咁彈咗起身，之後mark返數。
「屌，最衰都係你地，無啦啦問我，搞到我分心。」
「掛住人咪搵人囉，屌我都無用架，哈哈。」佢地好仆街咁笑咗我一陣，我地就繼續下一鋪。
打緊第三圈個時，我收到阿信whatsapp，我地已經幾日無聯絡。
「係hall？」我見到係佢，我諗緊我應唔應該即刻覆佢。
因為佢幾乎每次搵我，我都會秒回佢，而佢梗係唔會咁樣對我。
於是我等到四圈完咗先覆返佢。
我：係呀。
阿信：做乜咁耐唔搵我。
我：下？係你唔覆我先。
阿信：乜你咁小器架，都話你份人易嬲架啦。
我：鬼有。
我地傾多幾句之後，佢問我第二晚有咩做。
然後佢話一齊食飯。
個日我地約八點，佢差唔多搭半先到。
「sorry呀，頭先要等我個friend比野我所以遲咗。」
「唔緊要啦，我地去邊呀？」
「一陣你咪知囉。」
－－－－－
之後佢帶咗我去一間係中環既酒吧，成間鋪散發住暗紅色既燈光，因為鋪頭入面有塊好大既霓紅燈招塊，寫住間吧既名。
我地一人叫咗一杯手工啤酒。
杯酒叫咩名我已經唔記得，因為我好少飲啤酒都唔鍾意飲。我只係記得我個杯甘得黎有桂花香味，唔係好苦，算易入口。
我地一路飲一路傾計，由講下佢想買咩衫講到我返工平時點樣對啲閪客，總之乜都講一餐。
我望一望佢，佢塊面好紅。
有可能係因為酒精；可能係因為塊霓紅燈牌；可能因為我。
佢見我望住佢，我無講野；佢都無講野，之後就哄咗埋黎。
我地錫咗一下，佢隻手好似想伸入我裙底，我輕輕推開佢。
「呢到好多人。」我細細聲係佢耳邊講。
「怕咩呀。」佢無理我，繼續想摸入黎。
「唔好啦。」我再推開佢隻手。
「唉，你唔想就算。」佢好似好掃興咁講低呢句，之後我地都無再出聲。
我地靜靜地食埋枱上既意粉、飲埋剩返既啤酒，佢嗌埋單，之後比錢、離開。
沿路我地一直無出過聲。
個晚涼咗好多，我著住白色長袖衫加件薄既格仔裇衫，下身係牛仔短裙，我開始起雞皮。
「好凍呀，你唔凍咩。」我嘗試打破沉默，雖然我唔知點解要由我黎打破。
「唔凍。」佢毫無語調咁回應我，就好似電子辭典機入面既男聲咁。
我都唔知可以講咩好，於是我選擇繼續沉默。
沉默係面對另一方沉默最好既應對。
咁樣大家都唔需要再為要點樣去打破沉默而煩惱。
我地行行下行咗去中環碼頭，我無問佢搭唔搭船就自己入咗閘。
因為我好鍾意搭船。
呀信跟係我後面，入咗閘，之後佢問我：「做乜唔搭地鐵？」
「我想搭船，好耐無坐過啦。」我目光停留係準備開既船到，無望過佢一眼。
我地好似啞咗咁，大家都無再講野，直至返到宿舍。
佢跟咗我入房、熄哂所有燈，又開始錫我。
「夠啦。」
佢無理我，繼續錫。
「屌，其實我係咪雞黎架姐？」我忍唔住講咗呢句。
「都話唔係囉，做乜呢排成日要咁樣講姐。」佢好唔耐煩咁講。
「因為我真係唔覺你鍾意我。老實講，你係咪只係貪方便求其搵條女扑下野就算？係既話你同我講呀，我唔想咁白痴鍾意你呀。」我諗返起都覺得自己好傻，就算人地個心咁樣諗又點會同你講，邊有人做賊同圍同人講我係賊，一樣道理。
「我都話有鍾意你囉，你死都唔信咋嘛。」佢放開咗捉住我膊頭既一雙手，之後坐咗係電腦櫈到望住我。
「但係你成日唔理我，你得閒先搵下我，唔鍾意就唔理我，我真係唔覺得你鍾意我。」
「唉，我份人係咁樣，我成日唔覆人架啦，我已經覆得你好快好密架啦。」
就係咁，個晚我又比佢氹返。
－－－－－
呢段不知所謂既關係維持咗一段日子。
每日既心情都會好似過山車咁係咁上上落落，有時好開心；有時好唔開心。
因為佢既忽冷忽熱真係令我諗唔透，到底佢對我係點？
我好耐都無經歷過呢種好似要玩心理戰既角力遊戲。
久而久之，我因為煩厭咗呢種好似做狗咁既生活，我嘗試放棄再同佢糾纏。
「食唔食飯？」有日一起身，就見到阿信再次咁樣問我。
「ok呀。」其實我從來都唔會拒絕佢，只要我得閒。
然後我起身沖涼刷牙洗面，就同佢講我出得門口。
然後就再沒有然後。因為佢又無覆我。
我記得個時係連續第三日佢搵我食飯，然後又無咗人影。
我真係好撚厭。
雖然我好鍾意佢，但係佢呢種態度真係令我唔好受。
「算啦，佢認真就唔會咁啦，你不如唔好理佢罷啦。你個關係屌穿咗架啦，以後唔好咁易比啲男仔扑你啦，好蝕架。」有個男仔frd咁樣同我講過。
其實有啲野我又點會唔知，不過人係犯賤架嘛，又點會肯聽。
終於，個次我肯下定決心唔理佢。
而我都準備去旅行，我就同自己講，去完個旅行返黎就要放得低。
於是，佢再搵我我都無再應佢。
「你幾時飛？」
「你今日去咗邊？」
「你嬲咗我？」
「做咩你唔應我？」
我雖然好想應佢，我望住個對話想輸入又唔敢輸入，個心掙扎咗好耐。
我同自己講忍住。
不小忍含得撚呀嘛。
有好幾次係hall area撞到佢，我都扮唔識佢。
佢個樣好似有啲尷尬咁，同我一樣無出聲，好似我地兩個完全唔識對方咁。
之後即使我唔係香港，係異地玩得幾開心都好，我點都會有一瞬間係諗起佢。
明明唔係發生咗好耐，我地之間又無經歷過啲咩，感情絕對稱唔上係有幾深厚，但係我感覺到自己既情緒波動因為佢而變得好大起落，真係好奇怪。
我返到香港之後，佢又再搵我，我地已經無聯絡大個半月。
「我件衫係咪係你到？」佢借過件外套比我，因為個時天氣轉涼我又未搬冬天衫返hall，所以佢話比件褸我頂住先。
「係呀，你係咪想拎返？」我應咗佢，因為我想比返件衫佢，咁樣先係真正既了斷。
「呢排凍呀，你著住先啦。點呀，泰國好唔好玩？」
就係呢一下，我又好似之前咁開始同佢講返野。
呢個世界就係咁，你想放低一個人，偏偏佢又會再搵你。
定力稍為唔夠，就會好似我咁，再次比佢牽著鼻子走。
不過好明顯我地無咗之前個份熟稔，取而代之係好客氣既對答。
「可唔可以借洗衣粉比我？」
「Thank you唔該哂。」
「好呀唔該哂你呀，我比返錢你呀。」
呢啲咁客氣既對答話比我知，我同佢既關係已經同之前唔再一樣。
我調整咗自己既心態同佢相處，我希望可以當佢係朋友。