自從住咗hall先知，扑野原來可以咁簡單: 《十、404 not found 》10.1
quit hall period係令人傷感既季節，因為好多人走咗就唔會再返黎。
有啲人你可能無機會再見到，連撞到既機會都好微。
以前總會怨自己好黑仔成日都撞到你，但係我諗以後連呢個碰面既機會都無。
你既hall life咁就完咗，我地都就就咁完咗。
－－－
「今晚三缺一，你幫手頂下啦。」我係lobby同阿軒講，佢住我下兩層，之前因為食聯層樓飯識既。
「唔好啦，我咁渣，唔想同你地打呀，一陣又輸錢。」因為阿軒上幾次同我地打都輸到仆街，佢似乎係怕咗我地。
「打牌有贏有輸架嘛，怕咩姐！」我極力游說佢打，因為我地真係搵唔到第四隻腳，而我地又好想打牌。
「唉真係不了，你搵第二個啦….喂阿信！」佢仲推緊我個時突然間望向大門個邊，有個男仔行咗入lobby。
「喂呀，打啦，真係差你一個咋。」我繼續同阿軒講。
「打牌？」啱啱入黎lobby果個男仔講，呢個時候我先留意到佢。
「係呀，你想唔想打？我地差一隻腳呀。」我轉身望向佢。
「真係有啲想打喎。」佢個樣心郁郁但又有啲猶豫。
「打囉，我可以陪你去架，唔洗怕醜喎。」阿軒聽到佢話想打，個樣好似甩難咁，係咁慫恿佢打。
「唔，一陣睇下點啦，我而家要出去踢波，我上房換衫先。」佢講完之後同阿軒say咗個bye就上返樓。
「佢邊個黎架，未見過既？」雖然我都唔係話識好多人，但係呢個人我好似從來都無見過。
「哦，佢係我roommate，佢叫阿信，條友好摺架，唔係我叫佢一齊玩佢應該乜人都唔識添呀。」
我本身對靚仔係無乜興趣，唔係扮野，係真係無乜興趣。
我覺得男仔個樣普普通通都夠，只要我睇得順眼。
阿信個樣點都稱唔上係靚仔，我諗可以話唔差既。
佢步入lobby個刻著住件黑色波衫加條Nike波褲，然後拖住對人字拖，頹到仆街。佢個時仲要戴住副眼鏡，望落都幾似毒撚，但係我又出奇地覺得呢個人幾順眼。
然後就係咁，個晚佢就真係黎咗打牌。
記得佢一黎到係濕住個頭、連副眼鏡上面都有水珠，一睇就知佢係啱啱沖完涼仆過黎。
「嘩你眼鏡都仲有水係上面喎，唔洗咁趕下話。」我既牌腳晴晴笑鳩佢。
「er係呀，廢時你地等嘛，哈哈。」佢搔一搔頭，有啲靦腆咁講。
佢似乎係比較靜既人，因為除咗一開頭佢講過自己叫阿信之外，佢就無乜出過聲。
大家慢慢都開始傾下計，講下玩過咩ocamp呀，邊個hall淫啲，又有啲咩八卦野咁。佢淨係打牌出牌，有時叫下碰同食咁，無其他。
見佢有時會碌下電話，但佢坐我對家其實我望唔到佢睇緊咩。
講講下，有人問阿信幾大。
「我year3架。」
「咁咪即係同Kate同年？」坐我上家既Kenny問。
「佢大過Kate，老屎忽黎架佢！」阿軒搶住答。
「喂，做咩爆我啲野出黎呀屌你！」阿信有啲慌張咁講，好快就變返無事咁既樣。
「喂，Kate，啱你喎，大過你！」呢個時候Kenny笑騎騎咁講：「阿信，Kate好鍾意啲大過佢既仔，佢而家搵緊男朋友呀！」
「屌你咪講亂啦，碰南呀！」我一邊拎返隻南返黎，一邊屌鳩Kenny。
Kenny之所以會咁講，因為個時我同男朋友分開咗無耐。
佢地成日就抽我水話我急住要搵新仔出pool，所以一有仔就會推哂比我。
因為我話過我鍾意大過我起碼兩至三年以上既男仔，所以我覺得u既男仔唔會啱我。始終好多人都係差唔多年紀、我覺得會似我細佬多過男朋友。
「下，唔係掛，咁呀你當我細過你啦Kate，千祈唔好溝我呀添呀！」阿信突然間笑笑口咁爆呢句野出黎，大家都笑到仆街。
我都幾驚訝佢會咁樣講，自從呢句之後，佢就開始加入我地既話題，同我地一齊講下笑咁。
我地幾個都有上開高登，所以好多時既話題都會圍繞住啲戅鳩野。
而我同佢交流都係呢個展開之下愈來愈多：
「你又同我著埋同一條褲，點搞呀！」我對住阿信講。
「喂我都唔想架，你條戇鳩成日撞我。」佢對住我既語氣同態度明顯愈來愈唔客氣，好似同我好熟咁。
就算我地無講野，有時我打啲牌可能係佢想要既，佢又會笑住咁啤下我。
有時我見到我拎住佢啲牌，我又會笑笑口咁望住佢。
我地成晚就係咁望黎望去，望望下就好似熟咗少少咁。
臨走之前Kenny女朋友晴晴細細聲係我耳邊講：「喂你同阿信好frd咁喎？見你成晚同佢傾得好開心咁！係咪有機先！」佢講完之後個樣好奸咁望住我笑。
「傾下計姐，啱啱識同邊個都好傾架啦係咪先！」我廢時佢亂咁噏，所以都係求其敷衍下佢就算。
因為阿信同我都唔係住個晚打牌個層，我同佢一齊等lift返房。
我地講緊canteen有咩野食係無咁伏既時候，佢問我拎電話。
「反正我成日毒撚一個食，得閒搵下你食飯都好。」佢一路入我電話一路講。
「好呀，我都成日自己一個食飯。」我笑咗笑咁講，唔知點解佢咁講我有啲開心。
之後我地就自各返房，我返到去開咗佢whatsapp icon黎睇。
我以為會係佢自己既樣啦，點知居然係海賊王入面隻路飛黎。
佢話自己毒都真係無講錯，我好少見人用呢啲圖做whatsapp icon，至少我識既男仔入面無。
我都幾好奇阿信到底係一個點既人。
－－－－－
第二日一起身，我睇電話，無收到任何新既whatsapp。
我有少少失落，可能因為我期待緊阿信搵我啦。
我諗咗陣，鼓起勇氣將我個時追緊既故send咗俾佢。
我好記得係羊格既文青女，個時仲live緊。
隔咗一陣都無收到咩回應，我都無再諗住，因為我要返工。
返工既時間我基本上都唔會點樣睇電話。
直到放lunch，我先有時間睇下部電話。
「我都有睇呀，幾撚好笑個故。」佢終於覆咗我，係半個鐘前既事。
「你唔會係醒咗無耐掛？」因為而家已經係五點鐘。
「係呀，我今早九點幾先訓。你食野未？」嘩，無諗過有人啲作息時間仲痴線過我，我自問已經係個超級夜貓，無四、五點都唔願訓個啲黎。
「我返緊工，而家放緊飯呀。」
「仲諗住搵你食lunch添。」
就係咁，我地就開始咗係whatsapp傾計。
其實我地傾既話題都無咩營養，純粹係大家都好戅鳩，多數都係傾下鳩野。
阿信係一個幾慢熱既人，同佢唔熟你會覺得佢好靜唔係幾出聲，熟咗先發掘到佢其實有另外一面。
當傾下咁上下熟，我地都真係有得閒出黎食下學校canteen，有時會出遠啲食。
得閒出下黎加上日日傾計既節奏，其實我都feel到自己對佢都有啲好感。
－－－－－
有一次，我同佢出去食野，我地講開拍拖既話題。
「聽七樓班人講，你好似分手唔係好耐？」因為我有次係hall飲酒飲到好醉，個個都以為我仲因為個ex唔開心。
「分咗一排啦。」
「你仲好唔開心呀？」
「唔係啦，唔好聽佢地亂講。」
之後講多幾句，佢無啦啦問我：「咁你同你ex…有無咩過？」
「咩呀？」我無諗過佢會咁樣問，因為我地熟得黎又未至於講啲咁深入既話題。
「咪咩囉。」佢好似有啲尷尬咁講，之後搔一搔佢個頭。
「哦，有呀，拍拖拍咗成兩年有都好正常啫。」我廢時搞到個氣氛咁奇怪，索性直接話有算，反正對於大學生黎講拍拖有扑過野真係好閒。
「哈，無呀，我都係問下咋，正常既。」
我地準備過馬路個時，因為我無睇清楚就想行出去，佢就一野搭住我膊頭，拉返我返黎。
「喂，唔好發夢啦戅鳩，睇車好喎。」佢好鍾意窒我，熟咗之後就窒得更加唔客氣。
「咩呀，我邊有發夢呀。」
「諗咩諗得咁入神呀？諗我呀？」佢笑笑口咁問我。
「痴線。」