自從住咗hall先知，扑野原來可以咁簡單: 《九、致 從未公開過的前度》9.3
我都唔知自己點解咁大膽，可以係同一間學校拖住兩條女。
或者我個下比性慾沖昏咗頭腦，所以先會講出啲咁唔理智既決定。
為咗保持住同Nicole呢段關係，我叫佢唔好同人講住，因為我想穩定啲先公開。
我用好多report打黎做借口，推搪成日話要見面既女朋友Mandy，其實只係想將時間騰出黎比Nicole。
「咁係學校拖手都唔得呀？」有日佢係我房，個陣我roommate已經無再返黎訓好耐。
「唔好住喇，一陣比人見到又唔知講啲咩，我地一齊耐啲先公開啦好無。」我錫咗佢額頭一啖。
「好喇。」Nicole嘟住嘴咁講。
隨住同Nicole見面既時間愈來愈多，甚至比我同Mandy以前見得更加密之後，我對Mandy既感情當然變得愈來愈淡。
而我都開始發現自己鍾意咗Nicole。
正當我設法諗緊點樣同Mandy分手既時候，我收到Nicole既message。
Nicole：我有啲野想問你。
見到呢句無任何emoji既message，我都已經心知不秒，心諗唔通比佢知道咗我同Mandy？
我：做咩事呀BB？
我嘗試以一個輕鬆啲既語調去問佢。
之後佢send咗一張相黎。
係我ig既cap圖。
Nicole:點解你要呃我你無用ig？
呼，好彩。我ig係private咗，所以佢咩都睇唔到。
起碼佢未見到我同Mandy既合照先。
我：因為我好少用ig架喇而家，我無心呃你，唔好嬲喇。
Nicole:咁你而家add返我。
屌，世紀大難題。一比佢follow就實穿崩。
我：太耐無login，我唔記得password喇，入唔返。
呢個藉口實在太爛同太勉強，但居然咁樣都過到骨。
我暗暗地為自己既幸運而感到開心。
－－－－－
如是者我維持咗呢個關係成個月，Mandy都開始感覺到我同以前唔一樣。
「呢排你真係好忙咩，話想見你都話唔得閒。」佢好不滿咁講。
「啲堂好chur呀，今個sem我想追gpa，啲野又唔識，咪要花多啲時間落去溫下書囉。」我敷衍佢。
「其實你有無野呃住我？」佢突然間神色凝重咁問。
「痴線，可以有咩呃住你呀。」我好淡定咁答佢，盡量以一個平靜既聲線去掩飾自己確確實實講緊大話。
「有人同我講你同隔離莊個Nicole行得好埋喎。」佢冷冷地拋出呢句說話。
「屌，我地之前搞聯莊活動先要傾野姐，你聽邊撚個講呀？」
「係咪架？」佢半信半疑咁講。
「梗係喇，唔信比whatsapp你睇。」
我拎部電話出黎，將我同Nicole傾莊務既對話比哂佢睇。
「拿，睇到未呀，我同佢之後都無聯絡架喇。」
實際上我已經將我同Nicole之後既對話delete哂，而我同佢而家都轉咗用telegram傾計。
我既藉口係telegram比whatsapp更加好用，而且有腦魔icon用。
雖然呢個都係事實，但更大既原因係萬一Mandy check起我電話上黎，我都唔會比佢斷正，就好似而家咁。
Telegram就係我同Nicole既偷情工具。
當然呢樣野得我自己知。
Nicole比起Mandy既性格更識體諒人，呢樣野係我真真正正咁同咗佢一齊先知。
例如係我好忙既時候，我想自己一個人靜靜地係hall打assignment，Mandy會chur住話想見我，但係Nicole唔會，佢會問我辛唔辛苦，然後係電話入面同我打氣，話等我忙完先再見。
呢種體貼令我更加想放棄Mandy，真真正正咁同Nicole起埋一齊。
我發現自己對Nicole都愈來愈鍾意，個種心態已經唔同當初對佢咁樣。
Nicole：我好掛住你呀。
我：我都係呀。
平時Mandy同我講「掛住你」，我覆返佢「我都係」，純粹係一個例行公事，好似人地同你say hi你就一定要應返人咁，唔應會無禮貌。
但係我對Nicole唔係，我係真係好想見到佢。
我諗我真係鍾意咗Nicole。
我曾經有好幾次想同Mandy分手既念頭，但最後我都無做到。
可能因為貪心，都可能係我懦弱，我唔敢踏出分手呢一步。
結果我拖拖下又一個月。
而sem尾既忙碌真係令我無時間再兼顧兩個女朋友，我覺得好攰。
一方面我對Mandy既熱情已經沖淡到所剩無幾既地步，我連見面都唔想；
另一方面我要承受住萬一有一刻比人揭穿既時候，我兩邊都會無哂，一諗到呢到我就好驚，所以我真係好煩。
終於係呢個時候，個天迫咗我做決定。
－－－－－
嗰日我係hall做緊assignment，又係收到Nicole既message。
Nicole傳送了一張圖片。
我一打開，我幾乎嚇撚到心臟停頓。
係我同Mandy既合照。
相入面既我地係迪士尼入面，笑得好開心好燦爛。
呢張相係上個月我同Mandy一週年既時候去迪士尼影既。
嗰時我同Nicole已經一齊咗。
我開咗張相之後，想打sorry，但又覺得好廢，所以我又delete咗。
然後我重重覆覆咁輸入中，又delete返，我都係一句說話都講唔出。
我知我講咩都無用。
我地兩個都僵持咗係呢個上線中既畫面中，兩個都無打字。
然後我見到Nicole輸入中。
我個心跳得好快，我好怕見到佢鬧我，但呢個又係我意料之中既反應，佢除咗鬧我應該無說話再想同我講。
Nicole：點解你要咁對我，你知唔知我好愛你…
我：對唔住，係我仆街，但我真係鍾意咗你…
Nicole：我都好愛你，我唔介意之前既野，你同佢分手好無…唔好離開我…
男人係好撚賤既生物，當你見到一個女人唔介意你做過既野，仲要用呢個苦苦哀求既態度叫你唔好同佢分手，你會好理所當然咁當係老馮，然後真係唔同佢分手。
我：你比一個月時間我。
但係我無立即同Mandy分手。
因為我貪心。
每次諗起同Mandy呢一年既經歷，雖然淡咗好多，但始終有感情係到，真係要分手我又唔係好捨得。
所以我好撚仆街咁繼續一拖二，而且仲要係Nicole知情既情況下。
我地既行徑比以前更加小心，因為而家呢個秘密唔係得我一個人守住，而係有兩個人。
Nicole好聽話好配合我，為既就係想盡快可以光明正大同到我一齊。
而我就只想抱住過得一日得一日既心態，每次佢問我講咗未，我都用sem尾好忙做藉口，希望可以拖住先。
－－－－－
學校始終係學校，要撞到既機會其實好高。
嗰日我拖住Mandy，係學校最大既canteen撞到Nicole。
Nicole見到之後呆咗呆，之後望一望我地兩個，佢轉身走咗。
Nicole：我地分手喇。
或者因為Nicole見到我同Mandy拖手呢一幕實在太hurt佢，就算佢明知道呢個係事實，但親眼睇到又係另一回事。
我承諾過佢我會盡快分手，但我一直都做唔到，甚至我同佢講我呢排都無見過Mandy。
實際上我都有抽下時間陪Mandy，畢竟佢都係個陪咗我成年既人。
我無辦法係兩個女人之間作出取捨。
我無去挽留Nicole，可能因為我覺得挽留完我又係無勇氣分手，然後又係重重覆覆，我居然會覺得好攰。
我諗我話愛Nicole，其實都唔係真係好愛，我最愛係我自己。
我驚最後乜都無，所以我唔敢放棄任何一個，而到最後，我選擇咗犧牲Nicole。
佢係最無辜果個，因為由頭到尾佢咩都唔知，只係我呃咗佢，仲要佢白白等我。
呢段關係收埋係我心入面三年，直到我U grad埋，同Mandy到今時今日都仲一齊緊。
而Nicole，我無打聽到佢既消息，或者係我心虛，唔敢知道呢個我負咗佢既女仔過成點。
係人地面前我永遠都係好好先生，大家見到我同Mandy一齊咗好耐，都覺得我地好幸福，我都係個好錫Mandy既絕世好男友。
而我自己先知道，其實呢段感情有個永遠都抹唔走既污點，既呢個污點就係源於我作為男人既貪心同自私。
Nicole，唔知你而家過成點呢？