最後一單大茶飯-修訂版: 第四回-炮

持械打劫最重要係D咩？
 
有人話係要有精密計算既計劃。
有人話係要有膽量。
有人話要夠狠。
 
我就話，緊係要有炮喇。
 
無炮點打劫姐，邊有械比你持姐，唔通同人地露械咩。
咁樣，你計劃幾好都無用啦。




 
所以我話持械打劫第一件事緊係要去買炮先。
 
不過，小弟之前都不過係一個老笠底褲既低級賊，
點知依D野呀。
 
好在有搞屎雄個老手係度，唔係都唔知點算。
 
「係香港你要有槍牌，都可以買槍，但把槍靜係可以放係人地槍會d倉庫入面，仲要年年繳幾皮野會費比個槍會。」
 




我心諗，咁樣老笠之前，未先比人老笠？
 
「咁要係邊到先拎到炮？」我問搞屎雄。
「依家，你識上網，咩野都買到。」
 
「唔係掛，我之前上網，又唔見有真炮買，得d假既空氣炮。」
「你平時上個d網叫做表網(surface web)，非法緊係去暗網(deep web)啦。」
 
「你知唔知平幾多？」
「買炮唔係好貴既咩？」




 
「係非洲一把ak只不過係30美金。」
「二舊水港紙就買到！！」
 
「緊係要加番少少運送既費用啦。」
「咁方便！」
 
「緊係啦，仲有買一送一服務。」
「抵到爛。」
 
過幾日，搞屎雄已經攞咗d炮。
佢真係好有效率。
 
「D炮錢，我會係你個報酬到扣番既啦。」
 




我折開個紙袋包裝。拎咗枝炮出黎欣賞。
發現枝炮並無果個AK象徵性既木柄。
 
「依把都唔係AK啦既。」我內心不滿。
「賊王葉繼歡上電視果陣都唔係用依把啦。」
 
「我知你好鍾意AK47，但佢一早比人淘汰咗啦，現家無人生產。」
搞屎雄係我手上拎走枝槍。
 
「依枝係AK12，5.45x39mm口徑，射擊既時候比AK穩定多多聲。重可以自己卡石埋(custom)。」
佢炯炯有神，眼中發亮，一邊講。
 
「卡石埋？」
「洋腸黎既，姐係你可以根據射擊既習慣同需求去整一枝屬於自己既槍。」
 




搞屎雄，將枝Ak12上咗腔。
「咔嚓。」枝炮發出脆亮既聲音。
 
「咁我地依家要去邊到老笠呀？」
「唔好咁心急，我地都未夠人。等我籌多D馬先。」
「你番去等我消息喇。」
 
我伸手想拎枝炮走。
「枝炮擺係我依道安全d」
 
我惟有無所事事咁返屋企。
 
尖沙咀既街上充滿住一個個係地下爬行既怪物。
一唔小心就會比依D慢速行駛工具輾過自己隻腳，痛不欲生。
 




我都忍唔住用普通話爆咗句粗口︰「你奶奶的。」
 
眼前依幢殘舊既唐樓就係我既屋企。
我打開充滿鏽跡既鐵門。
 
係依到都住咗幾耐下。
 
習慣性咁一步一步移動自己沉重既腳，去行果條死人樓梯。
 
四樓。
打開自己單位果度閘門，行入去。
樓下吵雜既街道聲音，傳到我既耳邊。
 
有引擎既聲音，有吵鬧人既聲音……依道唯一欠缺既聲音係清靜既聲音。
 




再捱多陣，我就可以離開依道。


----------------------------------------------------------------------------------------------------------------
植入式作者的話:
小弟平生無咩叻，最叻係道FFd故仔，
如果鍾意我既作品，歡迎黎我既專頁 ​
https://www.facebook.com/graylittledog/ 
比我一個Like，比我知道你既支持，比我有更大既動力去創作。

想睇我其他作品，或者想追故仔最新既動向可以去依道
https://www.shikoto.com/author/11830/%E7%81%B0%E8%89%B2%E5%B0%8F%E7%8B%97.html