屍殺大廈: Ch.20
「我畀啊爸落咗咒……好快…好快就屍變架啦……你走啦……唔洗…理我」小纓連說話都感到吃力
「我唔會留低你喺到……我應承過自己……要同你出返去呢個鬼地方……喺出面重新開始！」我說
「啲殭屍嚟喇！快啲啊！」師奶大叫
「我喺後面掩護你哋！」神父說「肥雪！你帶頭啦！你得架！相信自己！」
「前面就係防火門，落去地下，就得架啦！」達叔說「各位！要捱埋佢！唔好死！」
我們拼命地跑，與此同時殭屍越來越多，而教主在『他們』面前，帶領着。
突然神父停低了，迎接殭屍們
「雪！唔好辜負我對你嘅期望！怯！就輸一世！」語畢
神父便從袋拿起黃色的咒符，在空中寫字，念起咒語「……急急如律令……敕！」
教主便立即躲在殭屍群裏，而前面的殭屍亦灰飛煙滅。
「呢度有我頂住！你哋快啲走！」神父說
「華叔！後面啊！」坤仔二話不說走到神父的方向，爲他掩護……
「我哋要走喇！」達叔開了防火門「行啦！」
原來喺最黑暗嘅時侯，人係會出手相助，而唔係袖手旁觀，你有你死，佢有佢亡。
走到了2樓，我們便放下腳步，因為大家都在等待坤仔和神父的來臨。
突然從2樓的防火門傳來刺耳的聲音
「咁快殺到嚟」達叔說
突然，師奶開了門
「命仔！多謝你當初救咗我，依家到我報答你嘅時候…後生仔！你前途一片光榮！」師奶準備入去「你啊……出到去同政府講我犧牲自己去救人，叫佢燒個洋紫荊勳章畀我啊！」她望了望她的傷口，原來她並不是跌倒而整親，而係畀殭屍整到
「師奶……」我不知為何落淚了
「要走喇！」肥雪催促
我們繼續往下移，到了地下，但通往大廈出口的大閘被上鎖了……大家又再次被困
「命！我唔得啦……」小纓說
「你要撐住啊！好快……好快就可以出去！」我便放下小纓，然後拿起鑊鏟，試圖打破門鎖
「細佬！加油！」達叔亦一起打爛門鎖
但刺耳的聲音越來越近。突然大廈的𨋢啟動…由3樓往下到地面，我們拿起武器，靠近𨋢門。
「啊華！」𨋢門一開…原來是神父「四眼仔呢？」達叔問
「佢為咗保護我……畀殭屍咬死……冇佢，我就落唔到嚟……」神父感到羞愧
「華！嚟幫手！道門鎖咗！」肥雪說
他們三人合力將門弄破，而我卻在後留守。不久，門破了，通往自由又再近了一步。