[少年監獄] 感受沙咀: 31. 朋友,我當你一隻禽獸
「喂,肥仔! 你有信喎 !」
「Yes sir !」
我地在倉內集合, 等待著坐係到既君實sir和戈sir 派信
戈sir打開了我封信,開始細閱
然後立即講左幾句
「哇..肥仔你仆街啦...你知道牌頭嫁啦?」
戈sir開始讓我感到不安
「Sorry sir....?」
我疑惑道
「寫出去既信,同收到既信, 唔可以有啲咩啊? 英文唔比, 粗口字眼唔比啊嘛.」
戈sir提醒了我呢個規矩
啊屌 ! !係wor！
我突然覺悟 ! !
我個Friend好似唔知呢啲野喎 ! ! !
「哇哇..我屌啊..你個Friend真係大膽咯..呵哼」
戈sir一路睇一路不懷好意地發笑
全個S都開始對我封信感到興趣
「拿,肥仔, 呢封信就唔比得你嫁啦, 我宜家讀出黎比你聽啊, 阿峰, 我地既牌頭,一個英文字或者粗口字, 找幾多板啊?」
戈sir笑住向身後既牌板同學問話
「同sir報一個字5板」
阿峰亦笑住回答
「哇 ! 咁多? 咁肥仔個pat pat咪要開花咯 ! ?」
戈sir故作驚訝,戲弄我道
「Sorry sir......」
我屌
大佬
你到底寫左啲咩入黎比我啊?
「拿我讀啦, 大家一齊幫手計下要找幾多板啊....」
整個S好鬼齊心，興奮地應機
「Yes sir ！」
空氣一下停頓，大家都等緊戈sir讀信
「致親愛既衡仔......................」
戈sir開始緩緩讀出我個 朋友A 既信
我的心開始七上八落
「衡仔聖誕節，新年快樂呀 !」
「今年既聖誕我同成班基友又係過住LONELY CHRISTMAS 啦!」
屌我唔想知啊 ! 我只知道, 呢到已經要計十板啦!
成個A座開始發笑
一股歡樂恥笑既氣氛開始蘊瀼
阿峰都在戈sir身後竊笑,
就連君實sir都開始期待封信既後文
戈sir繼續讀出:
「雖然有女性朋友, 但係以我既毒撚性格係無可能會主動邀請人地去同我過聖誕,去倒數.說話你阿媽話你無咁早可以回信比我地, 我心諗咁單向式溝通點樣長期書信, 邊有話題啊? 不過, 好彩 朋友B 提我,可以講下自己近排既生活,我先有野可以寫下 等號 逗號 等號 哇哈, 表情符號都用埋出黎」
「Sorry sir …. 」
屌...姐係 呢個emoji =,=
寫信唔係whatapp啊 仆街!
「近排我岩岩過完SEM 1, 又考完試, 開始放SEM break, 不過可惜呀, 大家放假既時間都唔一致, 人地考完試係到打LOL既時候, 呵呵 LOL .」
哎..又英文奶野
「我就埋頭溫書, 到我得閒, 其他人就要考試或者開始新既SEM.」
「每次有其他人問你去左邊, 我都話你去左大陸, 其實呢個大話真係搵鬼信 冒號 右括號 , 呵呵」
整個S都開始竊笑, 因為封信既內容開始爆
「其實我真係想知你果到既生活係點嫁, 點知你又唔可以咁早回信, 識到朋友嗎?」
識到你就夠啦屌
「管得好嚴嗎?」
呃..真係幾嚴
「有無特別技能可以學?」
你估我打緊ONLINE GAME 可以學技咩?
「有無工作係令你減到肥 ?」
有啊, 日日都有啊, 你唔好再問啦好無 ! ?
「夜晚可以打J ?」
我屌
成個S立即爆發出讓人噴飯既笑聲, 阿峰已經係後面笑到拍Locker, 而君實sir都笑到唔停口
戈sir則繼續一副頑皮整蠱笑,笑住望我
「未講完嫁 , 仲有嫁, 如果可以的話, 我會寄幾張J圖比你.」
哇我頂你個肺, 你真係有我心
「喂肥仔, 咩野係J圖啊 ?」
戈sir笑住問道
「Sorry sir..」
我點答啊......
然後等大家笑夠,氣氛緩和了一下後, 戈sir繼續讀信
「早排, 我同我啲家姐玩交換禮物, 其實第一次聽到呢個活動真心興奮, 原來我一直都好期待同人地交換禮物同埋係呢方面展現下自己既創意同體貼. 最衰我地成班麻甩佬既世界無呢樣野, 唔係既話我都想大家一齊拆大家既禮物, 一諗到有人可能會送絲襪就覺得好正好有聖誕氣氛.」
我宜家唔慌唔有氣氛啦.
「下年聖誕, 一定要試下玩交換禮物,食飯,唱K直落啊 XD 」
我聽完, 心頭一酸, 下年呢個詞, 我覺得好遠
「可惜今年又係少一個人同 朋友C 慶祝生日, 不過你知嫁啦, 有女就唔理兄弟嫁啦, 重色輕友真係我地既座右銘之一, 朋友D 讀書果面又九成都係女仔, 享緊齊人之福. 朋友E果面又好似有女冧佢, 而朋友F呢, 就不嬲都多圈子玩嫁啦, 其實諗諗下, 我同你都算「同是天涯淪落人」, 最多時間陪大家既, 唔係你,就係我, 我地兩個成個閒人咁, HEHE ! 」
「Sorry sir..」
我知道,呢到又衰左唔少野..但內容中透露既其他朋友既近況,都讓我開心不少.
戈sir繼續讀
「睇黎經過多災多難既呢一年後, 我諗你既人生閱歷肯定比我多了, 我未試過既野,你都試埋, 哈哈」
可以既話, 呢啲閱歷我真係唔想要...
「唔知你有無得係入面睇新聞呢? 今年20XX年真係好戲劇性........」
戈sir之後讀既,都係我既 朋友A話比我聽既近期新聞,當然都衰左唔少係到
「唔知你想唔想知呢, 其實人真係會變嫁, 我地個 朋友Z(公認係廢青既極品), 終於肯出去做野,唔知係唔係食錯藥, 仲話做野之餘, 等九月份再報毅進考警察乜乜乜.......睇住個個都開始有啲目標, 而我地重係到迷茫緊未來條路點行, 都唔知「隨遇而安」呢個宗旨可以玩到幾多年. 」
你都好啊..仲有得諗路點行, 我宜家就真係得返一條死路.
「所以,下年你出返黎後,真係要去多幾次旅行呀,屌你 ,拿肥仔係你個Friend屌你嫁,唔關我事嫁」
戈sir笑道
「Sorry sir..」
仆你個街你真係係封信入面寫屌我? !
.
「草多幾個臭錢都咁難為你, 我想同你地去旅行就黎等到撚都長埋啦.」
大棚又再次笑到失控
我真係喊出黎.你啲比喻可唔可以唔好咁變態啊?
「算啦, 講住咁多先, 唔知有無得拜你山, 但係我地會再寫信比你嫁啦, 加油早啲返出黎啦, 碌撚」
「掛住你既..朋友A」
唉最尾都仲要衰多十板
成個過程, 我越聽，就越清楚自己要找好多板，但心入面既開心，卻不斷增加
一方面我好怕我個朋友A到底會錯幾多野,然後找多數
但另一方面我都好想繼續聽落去, 因為漸漸我開始感受到,
出面真係仲有班兄弟,係到期待,掛住我既回歸
人生流流長, 你總會認識到一啲ON9，仲會同佢做埋朋友
而呢個朋友A, 真係算得上我咁多Friend入面最ON9 果個
所以呢個，可以同我做到兄弟
「哈哈..肥仔, 知唔知呢到有幾多板啊?」
「Sorry sir....」
我有啲害怕, 粗略估計都至少100板以上吧
不過好多時候, 環境和氣氛真係會主宰好多野
宜家S充滿左歡樂既氣氛
「拿, 一係叫你個Friend寄多啲J圖入黎, 我就找少啲, 好無?」
戈sir開心笑道
「Sorry sir....」
我今鋪真係被佢累死，但可能氣氛影響，我已經覺得無所謂了哈哈
「哎算啦算啦,念你初犯, 找你五板算啦, 下次寫信返去記住提你個Friend啊 , 呢到唔比英文,粗口同符號乜差乜差嫁,知無?」
「Yes sir !」
哈哈, 氣氛居然比我逃過一劫,打數完果五板之後,
「喂阿峰, 收好呢封信佢, 等肥仔出冊既時候先比返佢.」
「Yes sir 」
阿峰應完,將我封信收埋了
這時候,
大棚亦預備結束鬧劇,進入返倉靜坐時段
但我真係好期待再次睇返封信, 不過戈sir又話過,因為封信太過違規,所以我唔收得
屌...但我又真係好想睇返
入了倉,鎖閘
靜坐完,倉內既人當然免不得過來對我恥笑一番.
因為頭先出既醜,的確幾大
無辦法,因為我個Friend寫既內容真係太爆了.
不過, 我真係好想,好想拎返封信
於是我向三年班既培傑問,有無辦法
「下? 你想拎返封信? 戈sir 唔係話唔比咩? 不過你個Friend 真係好撚正, 笑死我地」
培傑笑鳩我道
「所以我咪想再睇返咯...有無辦法再拎返啊 ?」
「呃...你可以試下問啊排版既...你識唔識阿峰啊? 」
阿峰? 我諗左諗
姐係成日企係阿sir身後,幫手寫薄之類,做太監工作既果個?
「唔識啊..但係問佢既話, 佢就會比返信我? 」
我回答
「唔知嫁..但你唔問既, 又點知唔得呢 ?」
培傑雖然無比答案, 但都暗示了答案未必係"唔得"
「哦..好啦...我試試..」
「喂但係你個Friend真係好盞鬼wor, 咁都夠姜寫入黎, 但下次真係唔好啦.」
「哈..我知嫁啦」
「咁等陣開始體能訓練啦.」
「呃!...好啊...」
我勉為其難道
那一晚，係開心興奮既一晚
那晚過後既第二日, 在早上練完步操後,
「全部人去廁所, 五分鐘好出返黎集隊啦 !」
君實sir帶完我地操後命令道
「Yes sir !」
我地回到A座, 而我確定了,呢個時候,係個好時機,去問排版阿峰關於封信既野
我行去了Locker那邊,阿峰正在忙啲寫薄既工作
「呃...阿峰..」
我小心翼翼,打了聲招呼
「咦? 做咩野啊衡仔?」
阿峰發現我,問道
「我想問問呢....琴晚果封信..有無得比返我..」
我一早決定左,要問,就問得開門見山些,不轉彎抹角
「噢...但係你聽唔到戈sir話咩, 你唔收得呢封信嫁嘛..」
阿峰問道
「但係戈sir都無話過...你唔可以私下交比我啊嘛..」
屌佢仲未get到我講乜,所以我唯有再講得白啲.
「噢~~~!! 我明你講咩啦 」
阿峰好驚訝地,對我O嘴
「哇, 你都算精wor 蔡衡同學..識得黎求我.但如果比阿sir發現既話, 真係會好大獲嫁wor.」
阿峰說著後果回應我
「但係..我真係想要返...當我求下你呀..峰哥.」
我試著耍了耍賴皮求佢
「都唔係無辦法既..不過我要有啲著數咁咯...」
阿峰故作高竇說道
「下? 咩著數啊? 你講啊? 如果我比到既, 一定比你 !」
我驚喜地開始追問牌板
但我又真係唔明, 一年班既我, 其實又可以有啲咩著數比到佢呢?
「你啲反應又唔使咁誇張既,我要你一樣野就得嫁啦.」
「咩野? 」
我問
比到既, 我一定比!
「我要你既.......」