［校園鬼故 X 陳生回歸 X 角色崩壞］無能子鋒與無能鬼: （六十八）天命叔的用意與過去
在我離開了道場後，天命道場有以下一段對話。
「師傅，點解你要咁樣刺激子鋒呀？」小詠在我離開後，從窗外飛回道場裡。
「小詠，你覺得我唔應該咁做？」
「唔係......不過我諗唔明，點解要特登咁同子鋒講啫。」
小詠雖然不太希望天命叔這樣說話，但內心亦明白這其中必有其原因。
「你有無留意到，子鋒頭先完全無察覺到你唔喺度？」
「咦？又係喎，佢頭先完全無問過我喺邊。」
「小詠，子鋒依家嘅情況好複雜，一時三刻我都好難講得明白。頭先嗰啲說話，係我特登用嚟刺激子鋒，希望佢可以保持住自我。」
「我唔明。」
「我唔怕同你講，其實我同子鋒，仲有佢嘅屋企人見過面，當時仲幫佢哋處理過子鋒身上嘅問題。自從嗰次之後，子鋒嗰種樂觀、善良等等嘅性格就開始形成，而佢呢種性格係維持住『陳子鋒』呢個個體嘅存在。」
「吓？」小詠聽到後，不敢相信自己所聽到的說話。
「但佢承受嘅壓力實在太大，導致佢開始懷疑自己嘅一切。如果再係咁落去，我驚子鋒會變得唔再係佢。」
「係咁嘅話，點解仲要刺激佢？」
「因為佢依家內心只有不安、燥動、憤怒呢啲負面情緒，我同佢講任何嘢都聽唔入耳。我唯有用炎冰嘅情況去刺激佢，始終，子鋒本性係好嘅，我相信佢會諗得通。」
「萬一佢諗唔通呢？」小詠語帶不安地說。
「呢層就要靠你。」
「靠我？」
「無錯，子鋒依家嘅靈力其實已經慢慢恢復緊，你應該會更加容易感受到佢嘅情況。如果佢有啲咩情況，到時就要你去幫佢。」
「但係我可以點幫？」
「呢個要靠你自己，總之你要記住，你一定要相信子鋒嘅本性係善良，唔好放棄。」
小詠聽到天命叔的說話，默默地點了點頭，臉上卻仍是充滿不安。
「係呢師傅，子鋒情況我已經明白，但點解你頭先要我離開道場，唔畀子鋒見到我？」
「我只係想試下佢，到底靈力恢復到咩程度。另一個原因，就係提防畀別西卜知道我哋嘅部署。」
「你嘅意思係，別西卜控制咗子鋒？」小詠驚訝地說。
「別西卜擅長嘅並唔係控制，但佢可以透過佢嘅病毒同詛咒，去觀察被施術者嘅情況。」
「你懷疑子鋒已經被別西卜施咗法？」
「小心駛得萬年船，始終今次子鋒被別西卜引咗出去，我覺得並唔係一個偶然，好有可能佢已經知道咗我哋要對付佢。」
「咁我哋依家可以點做？」
「我頭先故意講已經無晒辨法，一半真一半假啦。星期五嚟到之前，希望我可以搵到炎冰，然後救返佢！咁到時我就可以同你一齊去幫子鋒。只係......」
天命叔眉頭皺了一下，臉上露出了猶豫的神情。
「只係咩呀？」
「只係，我怕到時我無辨法分身去幫子鋒。最壞嘅情況，就係只有你同子鋒去對抗別西卜。」
「吓？」小詠一臉驚訝地看著天命叔。
「你唔駛咁擔心，呢個係最壞嘅情況啫。而且，別西卜要用咁多功夫去引導子鋒，雖然唔知原因，但我估計別西卜嘅力量應該受到某程度上嘅抑制。相信你自己，相信子鋒，呢關我哋一定過到嘅！」
「係！我明啦師傅！」小詠聽到天命叔的鼓勵，也自信起來。
「呢段時間，你就繼續提升你嘅靈力，我會盡快搵出炎冰。」
「明白！」 小詠本想就這樣回去繼續訓練靈力，但突然想起了甚麼。
「係喎師傅......」
「嗯，你講啦。」
「師傅你同別西卜咪交過手嘅，到底當時發生咗咩事？」
「點解你會咁問？」
「因為，頭先師傅你提到同別西卜交手嗰陣，神情有啲奇怪。雖然子鋒察覺唔到，但我喺出面睇得好清楚。而且，師傅你都講咗，同別西卜對戰，應該無咁易全身而退，所以......我先會咁問。」
「唉，估唔到會畀你留意到。其實，頭先同子鋒都有講過，我同別西卜交手，根本連對手都稱唔上，我只係單方面被佢玩弄。而我之所以無死，係因為我打傷咗佢。」
「打傷咗佢？」
「無錯，我諗當時嘅別西卜，諗都無諗過會畀一個完全唔起眼嘅人打傷佢。仲記得當時我年少氣盛，成日會逃走唔練功。嗰次我照常咁偷走，點知偷走途中，我竟然遇到別西卜。當時嘅佢正喺度吸食緊人嘅靈魂，而我嗰陣完全唔識個死字點寫，竟然夠膽出去阻止佢。」
－－－－－－－－－－－－－－切換為天命叔年輕時視角－－－－－－－－－－－－－－－－－－－－－－－－
那天晚上，天空中下著毛毛細雨。
由於已踏入深秋，加上月已降臨，在荒山中隱隱發出一股寒意。
我為了躲過那悶得發慌的靈力訓練，我又一次往荒山的深處逃去。
「痴線，夜媽媽捉人嚟練功，我真係睬你都傻，搵個地方瞓下好過。」
年輕時的我十分習慣在訓練中途逃走，並找個地方安穩地休息。
而這荒山對我來說，已經跟自己家沒有多大分別，即使閉上眼走路，我也有信心可以離開這座山。
「好，今晚就係呢度瞓啦。」
我選了靠近山頂的一棵大樹，爬到樹幹上準備休息。
可是，不知道甚麼原因，我竟然無法睡著。
「搞乜鬼？明明平時好快瞓著㗎！」
我換了好幾個姿勢，卻仍然無法入眠，而且心中更傳來一陣陣的悸動。
無法入眠的我，只好從大樹上下來，在山上到處行逛，希望換個地方再次入眠。
我在山上走著走著，發現自己竟像迷了路般，走回原本的大樹下。
「搞咩？無可能㗎。」
我心裡感到奇怪，於是集中精神感應山上的能量，希望藉此走回山下。
當我閉起雙眼，聚精匯神地感受著四方的能量時，才發現本應充滿靈氣的山頭，竟混雜著一絲邪氣。
「點會咁？」
這山頭是師傅特意選來給我們練功的，原因是這山頭充滿靈氣，一般妖邪不會貿然靠近，好讓我們能專心練功。
所以我有一剎那懷疑自己的感應出了問題，於是我閉起雙眼再嘗試一次。
發現邪氣不但沒有消散，而且比剛剛更為濃厚了一點。
而那邪氣跟我非常靠近，所以才會影響了我的感觀，使我一直徘徊在山頭裡。
在一片邪氣蔓延的山頭裡，我運起自身靈力，用以驅散擾亂我觀感的邪氣。
果不期然，當我運起靈力後，我的感觀馬上變得澄明起來。
由於事不尋常，我便決定先行下山跟師兄們會合，之後再想辨法處理這些邪氣。
就在我準備動身之際，山裡卻傳來一下尖叫聲。我感到尖叫聲離我並不算遠，二話不說便向聲音來源處跑去。
只是當我每靠近一步，我的心臟就猶如被甚麼掐著似的，既痛且亂。
而我亦感到，邪氣的濃度逐步上升中，剛剛那尖叫聲之處，必定有甚麼不祥之物存在。
我本能地感到，這不祥之物的力量比我強大多了，即使我勉強前往，相信亦不會是那不祥之物的對手。
正常來說，回到山下找尋救兵，才是正確之道。
可是，不知道是年少氣盛還是其他原因，我沒有馬上回頭。
就是這一停頓，便改變了我的命運。