［校園鬼故 X 陳生回歸 X 角色崩壞］無能子鋒與無能鬼: （六十七）我還是這樣無能
「竟然會係別西卜......」天命叔皺了皺眉，臉上一副不安的表情。
「無錯，我本來以為我會死，點知醒返嘅時候，就見到阿奶......」想起阿奶，我心又有點不知所措起來。
「估唔到又係佢......今次真係麻煩。」天命叔沒有理會我的說話，仍然一臉不安地思考著。
「麻煩？」我為他的不安感到奇怪，畢竟我很少看到天命叔露出這樣不安的神情。
「嗯......其實我以前同別西卜有交過手......」天命叔說到這裡，臉上帶著少許厭惡的神情。
「你同佢交過手？無理由㗎，如果係，你今次點會唔知係佢？」
我聽到這裡不禁感到奇怪，要是天命叔真的跟別西卜曾經交手，天命叔應該早能猜到這次的對手是誰才對。
「其實......當年嘅唔算得上係交手，我只係單方面被佢折磨......」
「咩話？」我實在無法想像天命叔被單方面折磨的情況，即便那是年輕時期的他。
「當年我嘅功力仲未夠，再加上根本無諗過別西卜嘅能力會咁麻煩，所以......不過都已經過咗去啦......」
天命叔嘆了口氣，口頭上雖說沒有問題，但聽得他仍有點耿耿於懷。
「佢究竟有啲咩能力？」我隨即詢問，天命叔卻以異樣的眼神看著我，好像從回到天命道場後，他對我的態度便一直有點奇怪。
「別西卜嘅能力，係疾病同詛咒。」
「疾病......同詛咒？」
「無錯，如果要講戰鬥能力，路西法絕對比佢厲害。但佢擁有嘅能力，會大大降低對手嘅身體能力，而且對人類尤其有效。」
「如果係咁......炎冰佢咪好危險？」
天命叔聽到我的說話後，雙眼直直地看著我，沒有作出回應。
「做咩望住我？我問你炎冰係咪好危險呀？」
「頭先我講咗，別西卜可以話係疾病與詛咒嘅化身，而你直接同佢接觸過，竟然無受到佢詛咒嘅影響，到底最後嗰陣發生咩事？」
天命叔看著我，眼神裡充滿著懷疑，大概他也猜到我在最後隱暪了一些事情。
我猶豫了一會，實在不知道應該怎樣告訴天命叔。
「你知唔知，其實每次你飲嘅嗰碗黑色嘅藥，其實係用嚟引導你本身嘅靈力，從而驅散體內嘅邪氣。你嘅靈力愈高，呢碗藥飲落去就愈難飲。被我封印咗靈力嘅你，無理由會咁快可以恢復正常！」天命叔把我全身上下掃描了一遍，表示我不可能像這樣安然無恙。
「呢層......」
「子鋒，你老實答我，你係咪曾經主動使用過靈力？」 我聽到後，一時反應不過來。
原本我以為，天命叔察覺到我體內的異樣，才會這樣看著我。
但主動使用靈力，我可不記得亦不認為自己能做到，畢竟我的靈力被封印後，我已經多次嘗試，結果都是一無所鑊。
即使最近被靈體襲擊所使出的靈力，我認為都是體內那邪物造成的，我實在沒有記憶有主動使用過靈力。
若硬是要想出一些可能性，今天被別西卜襲擊後昏迷過去，最有可能便是那個時候我主動使出了靈力。
但......我卻不這麼認為，即使我無意識地主動使用靈力，以我自身能夠引出的靈力，亦應該不足以對抗別西卜才對。
所以我能夠平安無事，以我的猜測，應該是體內那邪物在我失去了意識後，奪去我身體控制權，並且強行引出我的潛能，我才能逃過一劫，但這種情況，實在不能算得上主動使用靈力啊。
我把我想到的可能性告訴了天命叔，他搖了搖頭，像是無法輕易相信我的說話。
「照你咁講，你應該仲未能夠控制自己嘅靈力，頭先碗藥唔應該對你有效......除非......」
「除非咩呀？」
「除非你同你體內嘅邪物已經逐漸同步，佢唔單單再係控制你，而係開始同你融合，所以佢用你身體使出靈力嘅時候，就好似你自己用靈力一樣。不過......照道理我已經封印咗你嘅靈力，佢應該無咁快可以同你融合先啱......」天命叔搖了搖頭，似乎對自己的答案不是那麼滿意。
聽到這裡，我腦海裡閃過了在光球裡，那一段小時候的記憶。我用力搖了搖頭，那段記憶雖然可怕，但我實在找不到任何和現在的狀況有所連繫的地方。
「天命叔，算啦，我身體點都好，依家最重要係救返炎冰，然後消滅別西卜。」不明白的東西再多想也沒有用，所以我決定先面對眼前的困境。
「嗯......你都講得啱，你身體嘅狀態我已經無辨法再去改變，之後到底會點，只有順其自然。依家最重要係解決眼前嘅事。」
天命叔拿出了一張命盤，低頭默默的計算著甚麼。
我在旁邊安靜地看著天命叔，等待他完成計算。
「大概......炎冰唔會有事。」過了良久，天命叔總算再次開口，而得出的結果，總算是令人安心的。
「真係？咁就好啦！」我不禁為這結果感到高興，畢竟好像已經很久沒有一種事情順利發展的感覺。
「不過......變數仍然存在。」
「變數？」
「無錯，雖然炎冰嘅命盤係樂觀，但係命盤始終只係指出有咩可能性，而每個可能性中間都存在一定嘅變數。而今次，炎冰存在嘅變數實在太多，我都唔敢一口咬定佢會無事！」
「咁......咁我哋可以點做？」
天命叔若有所思地看了我一眼。
「靜觀其變。」
「咩話？」我簡直不敢相信自己的耳朵。
「正確啲嚟講，我哋根本無嘢可以做到。」天命叔無奈地說。
「點會？無理由，點都有啲嘢係我哋可以做嘅！」
「子鋒，你聽我講。原本我哋係計劃咗星期五完結呢件事，喺星期五之前本來唔應該有任何變數。但係依家唔單止你受到襲擊，就連你體內嘅力量都已經變得無辨法控制，依家嘅情況我哋只能見步行步。」
「見步行步？我哋依家知道咗對手係別西卜，應該有方法先發制人。再唔係我哋搵拉斐爾佢哋......總之，我哋點都要做啲嘢。」
在得知別西卜的能力後，我對炎冰的情況更是感到憂慮，而更多的，是來自於我內心的燥動，今天早上那煩人的感覺又來了。
「子鋒！」天命叔大喝一聲，一陣強勁的壓力向我襲來，但同時，我內心的燥動亦好像稍為緩減，是錯覺嗎？
「你冷靜啲，你今日遇到嘅事絕對唔係偶然。對方引得你出去，但最後放過你，即係佢哋都仲等緊一個時機，所以依家我哋除咗等，係無嘢可以做到。」
「我唔信......」
「子鋒，我明白你嘅心情，依家唯一可以做嘅，就係平服自己心情。」
「平服心情？呢個時候你要我平服心情？」
「無錯！如果你嘅心情能夠保持平靜，今日嘅事可能唔會發生。」
天命叔的話直達我的心坎裡，的確，如果我的情緒沒有出現波動，我便不會從學校逃了出去，亦不會在公園裡碰到這件事。
或許，更可以一直平安地等待到星期五的到來，事件更能完滿地解決。
「是......我的問題？」
「子鋒，我咁講唔係想你難堪。重要嘅係，你要識得控制你嘅心情，唔好畀你嘅心魔控制你。」
然後天命叔對我說了一大堆話，我已沒法聽進耳內。
原本想跟天命叔打探一下，以前我有沒有跟他碰過面。
但我已沒這種心情再去詢問任何事，我帶著無限的懊悔離開了道場，回到了家裡。
一切，仍然是我的錯。