［校園鬼故 X 陳生回歸 X 角色崩壞］無能子鋒與無能鬼: （四十八）謊言
「我要知道，我離開呢度之後，究竟發生咗咩事？」我死死地看著天命叔，因為我知道，在沒有天命叔的答允下，阿奶和小詠根本不會對我說出實情，我要知道真相，只能從天命叔那裡下手。
「你……真係無晒印象？」天命叔認真地看著我。
「係呀，你快啲話畀我知發生咗咩事啦！」
「其實……」天命叔猶豫了一會後，還是開口了。
「噚日你走咗之後，我就叫小詠一直跟住你。」
我朝小詠看了一看，她有一瞬間露出了奇怪的表情，然後又肯定的點了點頭。
「因為我幫你起咗支卦，知道嗰隻嘢會對付你，所以我就叫小詠跟住你，希望可以唔駛等到星期五就收拾嗰隻嘢。而小詠喺你屋企埋伏咗一日，直到夜晚，你終於有動靜。」
「點解……我完全唔知，小詠又無同我講？」我不是不相信天命叔，只是感到一點違和感，但又說不出哪裡不妥。
「你唔記得咩？我咪講過要令到隻嘢誤會你同我哋斷絕咗關係咩？所以我先叫小詠暗中保護你，而最重要係，去到夜晚嘅時候，你真係畀隻嘢控制咗，走咗去附近嘅天台。」
「吓？我畀佢控制咗？點解我一啲記憶都無？同埋點解會係附近嘅天台，而唔係我楝大廈嘅天台？」
「原來隻嘢一直都喺你附近，所以先會咁清楚你嘅動向。佢揀咗附近一楝陰氣比較重嘅天台做佢嘅基地，將你引去佢嗰度，諗住控制埋你。好在喺你上去之前，小詠強行入侵你身體控制你，先阻止到你。或者就係因為噉，你先會失去咗部份記憶。」
天命叔說得雖然頭頭是道，但我內心仍是有種不滿足的感覺。
「小詠，係咪真㗎？」我看著小詠，嘗試找出一開始看到的那種違和感。
「係真嘅，當時為咗阻止你，我夾硬進入咗你嘅身體，拎咗你身體嘅控制權。不過唔知咩原因，本來我想控制你返去屋企，但係去到一半嘅時候就開始控制唔到，我唯有打畀你女朋友，叫佢嚟接你。不過嗰陣已經好夜，唯有叫佢先送你嚟道堂先，點知你一暈就到第二朝先醒啦。」
「原來……係噉……」我把頭轉向阿奶，尋求她的答案。
只見她點了點頭，然後又別過頭去，該不會仍在生我的氣吧？
「我見到你哋嚟嘅時候就知道出咗事，不過好在最後都無嘢。我諗你失憶嘅情況，應該唔駛太擔心，始終你只係無咗少部份記憶，大部份嘅情況你都仲記得。所以我估計只係暫時性嘅失憶，唔駛太擔心。」
「嗯……呀，咁隻嘢咪發現咗我同你哋仲有聯繫，個計劃咪失敗囉？」
「呢層就唔會，你今日開始都未遲，或者你今日先開始噉做會仲好啲。」天命叔語帶相關地說，可惜失去了記憶的我並不明白。
「吓？咩叫仲好啲？」
「無，時機問題啫。總之今日之後，你要當我哋喺你嘅仇人一樣，噉樣嘅話，應該會一切順利。」
「好……係呢，咁德叔嗰邊？」不知道甚麼原因，我突然又想起德叔，而且想起德叔時，頭部有一種微微的痛楚，是記憶混亂的症狀嗎？
而在我頭痛分神的同時，小詠和阿奶其實都露出了一絲不安的神情，只是我沒有注意到而已。
「德叔嗰邊你唔駛擔心，只要計劃順利，佢自然會開心㗎啦。」
為甚麼是「開心」呢？算了，想太多了吧。
「嗯……」
「唔好嗯啦，為咗唔好畀隻嘢發現，你同你女朋友都係快啲返學啦，依家先七點，你哋應該仲趕得切嘅。」
經天命叔的提醒，我才想起已經是星期一了。
「噉好啦，我走先啦，阿奶你……」
「你行先啦，我……我自己走。」阿奶別過臉去。
「噉……噉好啦，我走先啦，學校見啦。」我以為阿奶還對我感到生氣，只好自以為識趣地先行離去。
「師傅，我哋咁樣呃子鋒，會唔會有事㗎？」小詠緊張地問。
「係囉，佢會唔會發現有問題㗎？」阿奶亦問。
「唉，我都唔想噉做，但係依家只能夠見步行步。你哋諗下，如果個細路真係記返起德叔嘅事，佢絕對會做出啲傻事，到時成件事就會變得更加複雜。我哋只能夠希望星期五嚟到之前，佢都記唔返起件事。」
「但係，德叔件事，新聞都會報㗎嘛，萬一佢睇咗之後恢復記憶點算？」阿奶追問。
「呢層就要你幫手啦，依家得返你係可以喺平時睇住子鋒，你要盡量避免佢睇到單新聞。雖然單新聞應該唔會影得噉清楚，但小心駛得萬年船，呢點要靠你啦。」天命叔拍了拍阿奶並鼓勵她。
「我……我盡量啦……我從來無諗過，原來子鋒一直都係過住呢種生活。」
「呢個細路條命就係噉，不過都唔駛太擔心，只要佢保持到自己嘅信念，就唔會有問題。」
「但係師傅，德叔嗰邊，我哋有無嘢可以做到？」小詠帶點內咎地說。
「你唔駛自責，呢件事你已經做得好好。」
「但係，如果我可以早啲趕到，又或者……」
「呢個世界係唔會有如果嘅，況且，唔係你嘅話，德叔已經死咗，依家做到噉，已經係最好㗎啦。」
「不過……德叔佢……可能過唔到呢關……」
「喺咁高跳落嚟唔死已經係奇蹟，你唔好再怪自己，況且，隻嘢仲生存緊，再係噉嘅話，下一個可能係炎冰，又或者係子鋒㗎啦。」
「我……我明白啦……」小詠雖然這樣說，但仍然維持一臉內咎的樣子，看來短時間內不會恢復過來。
天命叔跟阿奶交待了兩句後，阿奶便直接回學校了。
這次的事件一而再，再而三的出現變數，到底天命叔的計劃能否一如預期般，把入侵了炎冰身上的東西消滅呢？