［校園鬼故 X 陳生回歸 X 角色崩壞］無能子鋒與無能鬼: （四十七）失憶 X 失憶
一片漆黑的環境裡，存在著我和另一個人。
我和他，雖然互相看不到對方的容貌，但身形、輪廓、聲線等等，仍能清楚感受到。
「點解你唔解開封印？」
「咩封印？你係邊個？」
「我問你，點解你唔解開封印？」
「唔可以解開，解開咗，會有更多人死㗎。」
「但依家有人死喺你面前，值得咩？」
「我……我唔知……」
「解開咗封印，佢根本唔駛死。」
「萬一解開咗，都唔肯救佢呢？又或者，解開咗之後，都救唔到呢？」
「你真心噉諗？定只係你嘅藉口？」
「咩藉口？」
「逃避你害死德叔嘅藉口！」
「唔係……我……我無噉諗！」
「真係？定你唔想承認有噉諗過？」
「我……我……」
「你知唔知，因為你嘅無能，因為你嘅優柔寡斷，件事先會變到呢個地步！」
「我……我都唔想……」
「唔想？當初天命叔點同你講？當初炎冰嚟搵你又講咗啲咩？仲有，你唔強行切斷同小詠嘅連繫，會搞成噉？」
「我咪改囉！我都改咗啦，我改咗啦……點解呀……點解德叔會搞成噉……」
「你後悔？但係後悔已經太遲！一切都返唔到轉頭！」
「返唔到轉頭……返唔到……轉頭……」
「無錯，你點後悔都好，已經返唔到轉頭，你真係好無用！」
「我......我無用……唔係……唔係……」
「點會唔係，我一直都睇住你，你就係一條廢柴！」
「我唔係！你……你到底係邊個？我……我知，係你！你想我解開封印咋嘛！我知，係你！」
「所以話你係廢柴，係白痴！你竟然連自己都唔認得！」
「你……你講乜嘢？」
漆黑的環境，變得光亮澄明起來，站在我面前的，的確是另一個「我」。
但這個「我」，我能肯定，並不是潛伏在我心內的那個傢伙，那麼，這到底是誰？
「做咩呀？連自己都唔認得呀？廢物！」
「你……你到底……」
另一個「我」，不由分說地往我面就是一拳，我被擊飛得整個人倒在地上。
「唔……唔痛嘅？」我摸了摸自己的臉頰。
「白痴！仲有心情諗呢啲無聊嘢！」
「你……」
「我有錯咩？你自己諗下啦，堅叔堅嬸、雷少冰冰、阿奶、德叔，有邊次唔係因為你搞到件事愈嚟愈複雜！」
「我……」我無法反駁。
「仲有，你細個嗰陣，亦都因為你，害死咗一個人！」
「害死咗人？你……你講咩？」
「你以為你收埋啲記憶就得咩？正正因為呢啲記憶，先會有我！」
「我……我唔明你講咩……」我感到頭部一陣劇痛。
「哼！你繼續扮無知啦，你總有一日會記起！因為你，就係我；而我，亦即係你！當你記起返呢段記憶，唔知你仲有無可能面對你嘅好朋友呢？哈哈哈哈！」
「呀！！！！」我頭部劇痛，痛得大叫起來。
「子鋒！子鋒！你無事呀嘛？」在我身旁的，是阿奶。
「咦？點解……你會喺度？我發生咗咩事？我個頭好痛！」我按著自己的頭，痛苦地說。
「細路你醒啦？點呀，仲有無咩唔舒服呀？」天命叔到我的身旁，我才察覺到這裡是天命道壇。
「我……我個頭好痛！」不知道甚麼原因，我醒來後，頭痛得十分厲害。
「嗯……無畀邪氣入侵，應該只係撞親下啫。係呢，你隻左手無事咩？」
「我隻左手？哇，發生咩事？」我看了看左手，發現又紫又紅又黑的，好像傷得頗為嚴重，我嘗試揮動左手，卻發現無法移動。
而更糟的是，經過天命叔提醒後，那手臂的痛苦取代了頭部的劇痛，感覺非常難受。
天命叔看到我的樣子，他走過來拿起我的左臂，像在玩耍般又推又托，我被他弄得慘叫起來。
「痴……痴線㗎你！」我本能地推開天命叔，才發現本已不能動的左手，現在竟能動了，只是仍然腫得不像話罷了。
「子……子鋒……」熟悉的聲音響起，我抬頭一看，才發現是小詠，只見她一臉擔心的樣子，看來是替我的傷勢感到憂心吧。
「我無事呀小詠。」我勉強動了動左手，希望讓她安心。
他們三人看到我的反應後，臉上閃過了一絲疑惑的神情，難道我做了甚麼古怪的事情嗎？
「你哋幾個做咩咁嘅樣呀？同埋，點解我會喺度嘅？」我明明記得離開了道堂後，是直接回家睡覺的，只要撐到星期五就好了。
「子鋒，你……」小詠剛剛明顯想說些甚麼，但天命叔在一旁阻止了。
「細路，你答返我啲基本問題先！」天命叔一臉嚴肅地走近我。
然後，他就像審問犯人一樣，詢問了我很多事情。
「我問你，你記唔記德……」天命叔的話還沒有說出口，我便感到頭部又傳來一陣劇痛！
「呀！！！好痛呀！！！」我按著頭部，痛苦地呻吟著。
天命叔見狀把我扶好後，用力在我頸部和背部用力按壓，緩和了我的痛楚。
「到底發生咗咩事？點解我會無啦啦痛成噉？點解我一醒就會出現喺呢度？到底發生咗咩事？」我感到，有些東西是我遺忘了的。
但阿奶和小詠均避開了我的視線，只有天命叔仍然看著我。
我只好堅定地看著他，我一定要知道這段期間發生了甚麼事情。