我只能傷害妳，對不起: 31.

　　決定deadline以後，她比以前顯得釋懷，不會再在我面前常常提起我的家庭，而且約會的時候比以前更加翻倍的甜美可愛，打扮也比以前要悉心，「咁先襯到你呀嘛！」
 
　　「妳唔係話我唔靚仔咩？」
 
　　「你點會唔靚仔喎。」
 
　　她悉心打扮後在街上的回頭率比以前更高，她質素本來就不低，如果要說她像哪個藝人，我覺得有點像骨感變肉感的楊采妮。回頭率直線上升反而讓我不自在，不想她被別人看，她的漂亮只要我看到就夠了，你們這些路人看個什麼看！ 
 
　　「喂，你公司果個靚女叫咩名？」
 


　　「下？」
 
　　「果個大波靚女呢──」
 
　　「大波你個頭！唔好打佢主意。」
 
　　「咩啫，問下啫。」
 
　　「問都唔得。」
 


　　「喂，我係你個客來架喎。」
 
　　「又如何！」
 
　　「你咁緊張，莫非……」
 
　　「莫非你個頭。」
 
　　「唓，獨食難肥呀。」
 


　　「我冇食。」
 
　　「你有老婆架喎，聽講。」
 
　　「佢係好女仔黎，你呢d一睇就知心懷不軌既唔好接近佢。」
 
　　「哇，你係佢老豆咩。」
 
　　「總之你唔好亂黎。」
 
　　一邊為她趕走狂風浪蝶，另一邊我就對她說，「不如妳都係唔好著咁靚。」
 
　　「點解？你唔中意咩？」
 
　　「我唔想其他人睇蝕妳！」


 
　　「冇人睇我啦，放心喎。」
 
　　「妳自己唔覺咋嘛！」
 
　　「唔……咁有你0係側邊，係人都知望都冇用啦！」
 
　　「妳以前明明都唔會讚我靚仔……」
 
　　「你有冇聽過乜野叫傲嬌？」
 
　　「妳講妳自己係？」
 
　　「而家唔係啦！」
 


　　「請問點解而家又唔係呢，呂小姐？」
 
　　「因為李先生太好太靚仔，呂小姐決定放棄一切傲，只係剩番d嬌比佢。」
 
　　「咁而家李先生可唔可以錫呂小姐？」
 
　　她閉上眼嘟起嘴巴。
 
　　我當然二話不說吻下去。
 
　　就讓我們之間的煙火在最後的一刻綻放得最燦爛吧。