紙言

我係喜達,撈麵界既亞視: 黑林頓與黃俊篇(3)





黑仔到最後都無去到李嘉欣既喪禮

就讓所有對李嘉欣既回憶,留返係醫院

對李嘉欣既回憶,就只有拖住佢對手同擁抱住佢既畫面

黑仔唔想比靈堂呢個咁傷感既地方沾污個呢一段回憶

黑仔無好似電視劇咁係海邊大叫,無飲酒飲到好似爛泥咁





黑仔每日都係屋企

困自己係房

黑仔每一日都寫一封信

足足寫左一百日

係呢一百日入面





特敏福抗疫成功

黃俊再次賣車,老闆再次大屋搬細屋

父母開始有怨言,點解黑仔唔去搵工

係咪想比人收樓

一百日之後





黑仔戶口得返一萬蚊

黑仔再唔工作真係會比人收樓

黑仔去到一個露天賣車場工作

四千蚊底薪+佣金

無f50,無911

只有客貨車,低價二手私家車

黑仔都好比心機做

老實既作風,令到老闆想炒佢好多次





點知做落,又比黑仔做得掂,留到一班熟客

更有人搵黑仔一次過買左十一部客貨車用來經營佢既運輸生意

黑仔今日放假

一早拎住一個大袋

去到天主教聖十字架墳場

黑仔無買花,黑仔記得李嘉欣唔鐘意花

黑仔坐係李嘉欣既墳前





用濕紙巾仔細咁抹乾淨李嘉欣既墓碑

黑仔拉開個袋,拎左一堆信出來

黑仔依住號碼排好左

由1開始讀

黑仔讀左一百封信比李嘉欣聽

黑仔就好似同一個老朋友咁傾計

讀到有趣既地方,黑仔會笑

內容黑仔無同我講,我地亦都無問





黑仔讀左四個鐘頭

黑仔將一百封信放低

『你還欠我一張合照』

黑仔係墳場門口撞到當日比黑仔扑穿個頭既男人

男人見唔到黑仔

男人拎住一大札好靚,好靚既花去拜李嘉欣

『死蠢,李嘉欣唔鐘意花架』黑仔係心入面講





講完之後,黑仔首先係呆一呆,然後望住男人既背影笑左一笑




『李嘉欣唔係唔鐘意花,係唔鐘意我姐』


二零零四年

朗豪坊正式落成

黑仔仍然係車場工作

由於同事之間都係食煙既關係,黑仔學識左食煙

仲有飲酒

慢慢食煙飲酒講粗口成為左黑仔既精神寄托

每當黑仔比回憶折磨既時候

黑仔吸一啖煙,佢覺得可以將不快噴出黎

每當黑仔係屋企掛念李嘉欣既時候

黑仔會飲酒,飲左酒之後

訓係張床到令用幻覺,將佢同李嘉欣既距離拉近



黑仔如常倒一杯滿既威士忌入房,準備明天工作需要既東西

電話響

係黃俊

係沙士過後,黃俊一家去左廣州,好似係話做成衣批發

『喂~~~手足』

『俊!點呀,返左黎呀?』

『係呀,出黎啦』

『去邊呀?』

『都係果到啦,黃大仙冬菇亭』

好似時光倒流返左去幾年前咁

黑仔好開心

黑仔好耐都無試過唔飲酒都識得開心

企係冬菇亭門口等黃俊

『嗚..』耳邊傳來引擎聲

黃俊落車向黑仔揮手

黃俊都知到李嘉欣死左,無講多餘野

佢地再次好老套咁擁抱

黃俊剪短左頭髮,外表踏實左,但係黑仔感覺得到

黃俊對眼好有神,同以前唔同..好似

多左一份野心咁

我地係冬菇亭坐低左

咁岩都係幾年前坐果個位

黃俊既lamborghini diablo變左E46,guccissima煙盒,已經變左一個普通煙盒,而佢既Cartire火機,亦都變左做zippo

唯一無變既就係大家既友情

『今次返黎搞咩呀』黑仔洗好兩個杯,倒左兩杯啤酒

『哦..無..上面d生意都算過得去,咪返來睇下你囉,係呢,你點呀?』

『老本行啦,好在你爸爸以前教識我好多野,我到呢家都用得著,係呢我都想搵老闆食餐飯』

『哈,實有機會既』

『好』

兩人談天說地,食煙飲酒講粗口,好開心

『喂黑仔呀,有無興趣同我拍住打江山先』

『梗係好啦,我地兩兄弟,無野搞唔掂既,搞咩先?』黑仔已經醉到訓左落黃俊到

『我想搞中港運輸公司,你呢家做二手車岩晒啦,預埋你架壇野』

『岩啦,預埋我』



黑仔又再飲醉酒應承黃俊


黑仔跟左黃俊上廣州

認真咁再聽黃俊講一次

黑仔都係聽唔明,只係知道

信黃俊就足夠

但一聽到投資既金額黑仔即刻嚇親

黑仔初步需要拎二百萬出黎

唔好講二百萬,黑仔二十萬都無

係,黑仔有層樓

黃俊哄左黑仔好耐

黑仔決定按左層樓

當然係瞞住父母

黑仔心諗當初買到層樓都係因為黃俊,黃俊是可靠的

買左車,係中港都設立左貨倉連辦公室之後

可以正式開張

『改咩名好呀黑仔』

『唔知呀,你有無主意呀?』

『不如我地每人係個名到抽個字出黎加埋佢』

『黑俊?唔得唔得..林俊?唔好..黃黑?屌..』

『屌好撚難諗呀』

『...』

『...』

『不如叫嘉俊』黑仔提意

『嘉俊?好老套喎,人名咁』

『嘉俊啦..嘉俊好』

『黑仔哥你話點就點啦』

運輸公司初期只係做黃俊爸爸成衣既生意

係頭兩年無人脈既關係,公司一路都赤字

黑仔二按左層樓

守到第三年,黑仔遇到當日買十幾架貨車既周生

周生見黑仔老實,自己公司亦都有好多單做唔切

就判左好多生意比黑仔做

嘉俊運輸公司開始做起左

接到好多電子零件,紅酒,書本,衣服既生意

環境開始好起上來,黑仔重新供樓都供得好輕鬆

運輸公司既車隊由三架車,變到十三架

去到二零零八年

黑仔買多一層樓比父母渣手

黑仔係星河明居買左一個高層單位

完媽媽當初一個心願

二零零八除夕

黑仔同黃俊係尖沙嘴間酒店既天台睇煙花

黑仔第一次咁近睇煙花

黑仔覺得好靚

『那..黑仔,又一年喇,今年我想公司呢..搞呢樣野..呀下..同埋咁搞』

黑仔無專心聽黃俊講野,黑仔仍然好開心咁睇煙花


『如果比我揀,所有野都唔好變就係最好』


黃俊睥左黑仔一下,轉眼間又笑住咁搭住黑仔膊頭睇煙花

黃俊心入面講左一句


『爛泥扶唔上壁』


零八年金融海嘯

『唔怕啦俊,我地又無炒金又無買股票』

『唔好咁天真啦黑仔,全世界都關事點會唔關我地事』

『就算真係唔關我地兩個呀,我地d客關事都仆街啦』

黑仔開始明白發生緊咩事

車隊由有二十部車做野

慢慢變到十部車

慢慢再變到當初既三部

生意都係來自香港既連鎖服裝店

黑仔感受到壓力

對黃俊來講,係再次跌落地獄

『喂黑仔你聽我講,我諗到方法』

『點呀點呀?講黎聽下』

『睇下呢部電話』

『哦,iphone呀麻』

『大陸對呢部電話需求好大,我地一於做上去』

『點做呀?』

『聽我講,你去申請信用卡,有幾多張就申請幾多張,然後上網訂機,我地再運上去』

『下,好似每次有限訂幾多部架喎』

『所以咪要你申請好多張囉』

『咪住先,俊,我地咁樣係走私喎』

『我搭通晒上面d人脈架喇,我地做電話姐,又唔係白粉,定期交足數人地會識做架啦』

『唔好啦俊,唔好搞呢d野』

『聽我講,黑仔,我地乜都唔做就只有等死』

『俊..唔好犯法啦』

『黑仔你都想公司好架係咪?』

『唔係呀,唔俊..我唔想..』

『你唔諗我地,都諗下班伙計,佢地個個都有家庭,唔通真係要炒晒佢地?』

『...』

『你想佢地無飯開呀?』

『唔係..』

『咁你就聽我講啦,一世人兩兄弟,你條命即係我條命,我一定係諗過度過做得來先會同你講』

『知道..』

『我已經同人收左五百部返黎架喇,今晚就做野』

『五..五百部?』

『係呀,用左二百二十萬,數還數,你係做既一陣就過返百一萬比我』

『第一次就咁多..怕唔怕呀?』

『都話搭通左咯,上面都係我既人,黑仔你幾時變到咁多野問架,你唔信我呀?你淆撚晒底咁既』

『..我一陣過比你』


黑仔係淆底,黑仔好擔心

黑仔主要唔係擔心自己,係擔心公司,伙計,同黃俊


金融海嘯

沖散緊兩人之間既友情


當晚黑仔同黃俊去左旺角

將d電話放晒入鞋盒

然後就開車出發北上

『黑仔呀,sorry今朝語氣重左』

『唔緊要』

『你知我份人架啦,都係想為左壇野好,你唔會嬲我掛』

『唔會』

黑仔根本無心情理黃俊

今次係黑仔第一次犯法

黑仔好擔心如果出左事,間公司會點呢?班伙計會點呢?

反而黃俊好冷靜

過左香港關之後

差唔多到大陸關口

黃俊打左個電話

『喂,陳總,對呀對呀..哈哈哈..對呀..哈哈哈哈,對啦,你的鞋我們送到了』

收左線之後三分鐘

黃俊收到個sms

『嗯..行二號通道』

去到關口,大陸海關過來拎左黑仔同黃俊既証件

『喂呀俊,佢拎左我地d証件喎..點算呀』

『正常程序黎姐』

海關行返過黎

『貨櫃運的是甚麼』

『鞋,運動鞋』

『好啦,沒事啦,去去去』

順利過關



黃俊開車去到華強北

停車之後有幾個人過來開貨櫃

一個泊左係前面既私家車有個著西裝既男人落車行過黎

『喂,俊哥』

『喂..龍哥你好,貨都在這裡啦,叫你的兄弟驗下貨吧』

『對俊哥不用來這套啦,我唐龍相信你啦』

『對啦,這位是』呢個叫唐龍既男仔指住黑仔

『他是我的兄弟,叫他小黑就可以了』

『呀,黑哥,你好你好』

『黑仔,同人握手啦』黃俊用撞左黑仔一下

『哦哦..龍哥你好』


『老闆,可以啦』貨櫃既貨已經搬晒去另外一個客貨車

『好啦黑哥我們來計計數』

『我九千塊港幣一台跟你要,總數是四百五十萬,幫你疏通用了二十萬,總數是四百三十萬?對吧』

『對了對了哈哈..』

『那你點一下吧』

唐龍既下屬拎左一個大袋出來

入面以十萬蚊港幣為一札,總共四十三札

『唔用點了,難道我會不信龍哥嗎?』

『哈哈..』

『哈哈..』

『哈哈..』

等黃俊同唐龍哈完之後

黃俊同黑仔上返車

『喇黑仔,四百三十萬一人一半,即係每人二百一十五萬,疏通用左二十萬,我地一人一半,即係比返二百零五萬你』

今晚用左三個鐘頭,黑仔以百一萬既本錢,賺左九十五萬

『掂喇呀俊,我地快d返去出糧比班伙計同佢地開心下啦』

『好啦好啦』

『係呢,俊呀,咩叫疏通呀?』

『疏通你就當比d過路錢d牛鬼蛇神囉』

『咩係牛鬼蛇神呀?』

『如果唔係比左錢,頭先會咁易過到關咩?』

黑仔覺得好黑暗,同自己既作風好唔合襯

不過唔緊要啦,最緊要係呢個時期撐住間公司

金融海嘯過後,貨運公司重新上返軌道,有某部份係舊客之外,亦都有好多新客

多得黃俊搵到好多新客

自從上次走私之後,黃俊成日都去夜總會,酒吧,哥爾夫球場同d乜總物總,領導哈哈哈

黑仔唔知佢同d領導其實係做緊咩,只係每次見到佢地都係係到哈哈哈

自從上一次之後,黃俊無再同黑仔提起過走iphone

直至到二零一零年

iphone4既出現