有冇搞錯！我畀咗成千蚊人情去飲，竟然九道菜全部都係橙（實體書已出版，感謝各位支持）: 第八章第四回

4

我集中精神望向Yuki，她繼續解釋：「《陪審團條例》喺2024年修改咗，成為新嘅《陪審團條例》，而『陪審團遊戲』亦係根據呢條條例來舉行。其中一啲修改包括：列入陪審員名單嘅條件改為年滿十八歲、豁免出任陪審員嘅情況改為只有軍人及國家公職人員等。」

這些並不是重點，所以我只點點頭，期望Yuki快點繼續。她續說：「國家三年前冇廢除呢條法例，而係修改來用，係因為覺得陪審團呢個制度好有趣，佢哋為咗達成一啲目的，就索性以修改後嘅呢條法例為背景嚟舉行『陪審團遊戲』。其實『陪審團遊戲』嘅精神同本身嘅陪審團制度有啲相似，就係畀人民自己決定被審判者係咪有罪，只不過喺『陪審團遊戲』中，陪審員自己審判緊人嘅同時，自己亦都係被審判嘅對象之一。」

「咁即係喺『陪審團遊戲』中輸咗，就係畀社會判為有罪？咁……咁輸咗會點？」我緊張得口吃地問，因為這個答案正關乎我之後的命運。

「陪審團只係協助裁定邊啲人有罪、邊啲人冇罪，但刑罰從來都唔係由陪審團決定，而係由法官決定。而家冇法官，所以就由國家決定。由於無法順利通過『陪審團遊戲』嘅人，其實亦等同冇遵從軍人嘅命令，所以依法可判處死刑囉。」





「咁……咁……咁即係我會死？但死咪死囉，做咩有個抽獎輪？」

「嘿嘿！」Yuki奸笑了數聲後說：「你唔記得咗喇？三年前國家仲係香港實施咗《港奴法》，徵召所有在港被判死刑或終身監禁嘅人終身做奴隸，為國家服務，其中可能包括徵用器官、進行人體實驗等。你條命好珍貴㗎，香港人食得有毒嘢相對少，剩係個肝就好多人想要，仲可以切完再生再切，邊有你死得咁易呀？」

「我……咁……」我這時想起，從2024至2027年這幾年間，有關失蹤人口的新聞暴增，看來就是因為新修訂的《陪審團條例》及《港奴法》結合產生的「陪審團遊戲」之故。那就是說，我也將會變成失蹤人口，以及成為國家的奴隸嗎？

「咁Patrick佢地點？你又點解係負責人？」我追問。

「邊有得點解啫？我係國家嘅人咪係國家嘅人囉，只不過我同時駐守喺藥廠咁解。『陪審團遊戲』的目的，係一種『另類免疫系統』，不過詳情我都唔可以話你知呢！另外史廖兩家人都冇嘢，只係畀我哋按條例徵用咗場地而取消婚宴，但你放心，佢哋會有足夠嘅賠償㗎。」





Yuki似乎已把可以說的都說過了，這時把軍人召回來喊道：「（普）同志們回來。」

「時間都差不多，我哋係時候玩下酷刑輪喇！」Yuki把頭靠近我的臉說：「放心，我只係循例玩一下啫，唔會折磨得你太勁嘅，因為你死咗我都會好大鑊。之不過呢，我知你成日都叫我做monkey囉，嘿嘿！