有冇搞錯！我畀咗成千蚊人情去飲，竟然九道菜全部都係橙（實體書已出版，感謝各位支持）: 第四章第九回

9

本來激動得站着爭辯的正義妹，因着我的動作停了下來。她似乎對我的窩囊感到反感，坐下後仍不忙我在耳邊嘮叨：「做咩啫你？我幫緊你拗緊㗎！」

「你睇下先啦，」我安撫她道：「個橙已經拎咗過來，繼續嘈都改變唔到啲咩。」

「你估我睇唔到咩？」她解釋：「但係你唔同佢哋嘈過，其他人就會覺得我哋好蝦，就會得寸進尺。」

「之但係我哋呢圍枱而家得返七個人，四個人決定咗，剩返老婆婆同我哋兩個咋。」





「唔……」正義妹想了想：「你都講得啱，但畀人無啦啦質兩個橙過嚟唔忿氣嘛，就算之後冇人再搞我哋都好……」

不過，事實很快就證明我錯了，想我死的仍大有人在。

我萬萬猜不到，一直看來安分守己的老婆婆，竟在此時送我一程：「根據經驗，老身只能夠勉強食八個橙，如果今日真係加咗糖水，我真係頂唔緊呀，所以……」

「喂！」正義妹知道事態嚴重，已立刻出口喝止：「唔得呀！老婆婆你咁做會害死佢㗎！」

「反正佢五分鐘都食唔到咁多個，多一個唔多……」





老婆婆竟一臉平淡地說着她的歪理，而且，我察覺到她剛才的話有點不妥，一陣強烈的不安感流過我的全身，早前多道菜之間發生的事，亦有如走馬燈般在我的腦海內快速重播。

這一刻我就像突然頓悟一切，也察覺到原來只有我一個人被蒙在鼓裏！

我禁不住內心的激動，一口氣地追問老婆婆：「咪住先，你頭先話『根據經驗』、『如果今日真係加咗糖水』？即係話你已經唔係第一次被迫玩呢個遊戲，所以先知自己只食得落八個橙？仲有，三個橙我本來食得晒㗎，點解你係都要將個橙畀埋我？畀其他人唔得咩？」

肥佬聽到我連珠砲發後，也想通了什麼似的說：「哦，我明喇，原來你係第一次參加『陪審團遊戲』，唔怪之得你咁多嗲，成隻黑白天鵝 咁啦。」

我在短時間內又聽到不得了的詞彙，又問：「咩陪審團遊戲？你到底講緊咩？」





肥佬不經意地說：「『陪審團遊戲』咪就係由早幾年香港……」

「咳咳！」老婆婆乾咳了幾聲，肥佬這時也好像突然想起了什麼似的，忽然收口別過臉去。

我既疑惑又憤怒地掃視其他人，期望他們代肥佬解答，但母親、父親都逐一別過臉去，之後竟然連正義妹也稍稍側頭，不敢正視我一樣。

我明白了！原來我不但成為了這回合的犧牲品，也是這場遊戲的祭品！眾人由始至終都打算隱瞞我這個新手，然後乘機在我身上找好處；又或者，他們甚至一開始就想令我出局！

「哈……」我為自己的愚蠢冷笑了一聲後，對着正義妹心灰意冷地說：「我只係估唔到，原來你乜都知道晒，但就一直當我傻仔咁舞，我頭先仲驚你咩都唔知，詳細向你解釋呢度發生咗嘅事。」

正義妹委屈地為自己辯護：「正義哥，你誤會喇，唔係我想唔講你知，只係遊戲規則講明，我哋唔可以將過往喺『陪審團遊戲』發生過嘅事講畀其他人知。」

我怒火正盛，即使跟正義妹交情再深，也無法掩蓋這裏發生的一切，對她我也照樣大喝：「我遲到聽唔到規則呀！你哋而家講咩都得㗎啦！我呢種新參加嘅人，本身就特別容易輸，而你哋全部人一早就知道呢場遊戲嘅真面目同秘訣，於是就把持着優勢，當我係羊牯咁犧牲，你哋就可順利過關，繼續安穩地生活落去。」

「（普）你猜對了，不過我們最初只是想犧牲港女及毒男，沒料到再來一個遲到的新人，我就一直找機會送你上路。」母親毫無感情地說，彷彿在她的眼中，其他人的性命全都是可有可無。





肥佬聽罷不悅地道：「妖，你知佢都係新來就早啲提我啦……」

到這刻我終於肯定我的猜想沒錯，他們全都是一伙。然而正義妹仍想為自己開脫：「正義哥，佢哋點諗我唔知，但我真係唔係咁㗎……」

我沒好氣地說：「你都係既得利益者之一，唔使再呃我喇……」

「唔係，真係唔係咁㗎，你信我啦，我……」

她的話還未說完，軍人已把第四個橙拿到我的面前。五分鐘，四個橙，我吃得再快，也不可能完成，這回合我是必死無疑了。

只是，正義妹仍不肯放棄道：「正義哥，你真係要相信我，同埋我諗到一個方法可以令你全身而退呀！」