有冇搞錯！我畀咗成千蚊人情去飲，竟然九道菜全部都係橙（實體書已出版，感謝各位支持）: 第二章第二回

2

「吓？」我被奄尖姐的回答弄得頭暈轉向，不明白我的想法有什麼問題，追問：「只要我哋整枱人協議好，每一道菜大家都互相合作食晒佢，咁咪得囉？」

奄尖姐反駁：「咁咪即係共產主義囉！實會有人食多，有人食少，之後演變成大家都懶懶閒唔食，最後一鑊熟全部人一齊出局就真。」

「冇錯喇。」奄尖姐旁邊的肥佬也加入駁斥：「小朋友你實在太天真了，你冇聽過『三個和尚冇水飲』嘅故事咩？我哋都係各自各食最好。」

奄尖姐說：「係啦，好似以前啲乜鬼集體負責制，最後咪只係集體卸膊。」





他們二人一唱一和，然而我未有被說服。他們的說法雖然不無道理，我卻不能認同，尤其我們之間有老有嫰，問題更見明顯。我指着對面回應：「但你睇下佢哋一家人，細路仔食得少，父母就要食得多啲補數。依我觀察，父母呢兩個回合都比我們食多三分之一個橙。另外，」我這時改為望向右邊說：「老婆婆食得比較慢，好需要其他人幫手。」

然而老婆婆客氣地回絕：「你唔使擔心老身，我雖然食得摩，但實食得晒㗎。」

對面的父親也跟隨老婆婆的口吻回應：「多謝你嘅好意，但我哋兩公婆暫時仲應付到。」

我還想繼續遊說，但奄尖姐搶先我一步說：「你睇下，大家都冇意見。而家人人平等，自己食自己嘅，唔係幾好咩？」

「但平等唔代表公平同合理，咁樣根本唔係正義。」我不忿地說。





奄尖姐得勢不饒人，一口氣地回應：「正義？就算係民主社會，都只係夠膽講法律面前人人平等，而唔係人人公平公義，更何況係而家嘅香港？今時唔同往日喇！而且，正義的界線到底由邊個決定？仲有，你唔好唔記得，你遲到，食少我哋兩個橙，先有本事巴巴閉閉。一陣你食多幾個橙落肚，就知味道。」

「你哋咪嘈啦！」一直很少說話的毒男，這時突然高聲插嘴打斷我們：「剩返三十秒咋，但老婆婆仲有兩塊未食完啊！」

我回頭望去，發現果真如此，而且老婆婆口中還在咀嚼上一塊橙。

奄尖姐不理會毒男勸阻，把握機會教訓我：「都怪你頭先撩阿婆講嘢啦。」

肥佬再次和應：「係啦，你半夜食黃瓜 就咪亂講嘢啦！頭幾回合阿婆只係啱啱好食得切，佢頭先嘥咗十秒應你，而家有麻煩喇。」





「又係我？」我不服，卻沒有說出這句話，因為現在顯然不是爭辯的時間。我趕緊向叔父重複早前的問題：「我確認多次，幫人食真係冇問題吖嘛？」

「可以，但最好咪啦……」

「咁就得啦！」話音剛落，我就搶走老婆婆剩餘的兩片橙，一次過塞進口中。

「叮」的一聲，第四道菜限時結束。我和老婆婆總算在限時前嚥下口中的橙，成功通過第四道菜。

｛第四道菜完
十一號枱在席賓客人數：11｝